Ukusondwelela Kwingafwa Abantu

NAPAMO kuti mwalisapika bwino bwino no kuteyanya ifyebo fya lyashi lyenu. Napamo kuti namupekanya ne mitendekele ingalenga abantu ukufwaya ukumfwa. Nalyo line, kwashala cimo—ne ci cili kusondwelela kwa maka. Mwitila takwacindama. Ilingi line, ico mwalanda pa kulekelesha, e cibukishiwa pa nshita ntali. Nga ca kuti ukusondwelela takukwete amaka, kuti kwalenga ifyebo mulandile kale ukukanayafwa ibumba.

Tontonkanyeni pa fyakonkapo: Ilyo Yoshua ali mupepi no kufwa, alandile ilyashi ku bakalamba ba mu luko lwa Israele ilishingalabwa. Pa numa ya kupituluka mu fyo Yehova acitiile abena Israele ukutula mu nshiku sha kwa Abrahamu, bushe Yoshua alondolwele fye ifyebo na kabili kwati alesupula? Iyo. Lelo, akonkomeshe abantu no kubilima kwa mutima ati: “Beleni Yehova akatiina, no kumubombela muli bumpomfu na mu cishinka.” Ibelengeleni ukusondwelela kwa kwa Yoshua, ukwalembwa pali Yoshua 24:14, 15.

Ilyashi na limbi ilyo twingalandapo ni lilya lisangwa pa Imilimo 2:14-36, ilyo umutumwa Petro alandile kwi bumba lyalongene mu Yerusalemu pa Mutebeto wa Pentekoste mu 33 C.E. Intanshi alondolwele ukuti balemona ukufishiwapo kwa kusesema kwa kwa Yoele pa lwa kupongololwa kwa mupashi wa kwa Lesa. E lyo alondolwele ifyo ici cayampene no kusesema kulanda pali Mesia ukwa mu Malumbo, ukwasobele ukubuushiwa kwa kwa Yesu Kristu no kusansabikwa kwakwe ku kwa kulyo kwa kwa Lesa. Lyene pa kusondwelela, Petro alondolwele umulandu untu onse uwali mwi bumba akabile ukupingulapo. Atile: “E ico lekeni bonse aba ng’anda ya kwa Israele beshibe bwino bwino, ukuti, Yesu uo imwe [mwakobeke pa cimuti, NW], Lesa acita wene Shikulu kabili Kristu.” Abasangilweko baipwishe abati: “Mwe bamunyinefwe, tulecita shani?” Petro ayaswike ati: “Lapileni, no kubatishiwa onse wa muli imwe mwi shina lya kwa Yesu Kristu.” (Imil. 2:37, 38) Bulya bushiku, ico abantu mupepi na 3,000 baumfwile calibafikile pa mitima kabili balipokelele icine pa lwa kwa Yesu Kristu.

Ifishinka fya Kwibukisha. Ifyo mulelanda pa kusondwelela filingile ukwampana mu kulungatika no mutwe we lyashi lyenu. Fifwile ukuba e nsondwelelo ya mano ku fishinka fikalamba ifyo mulandile mu lyashi. Nga mulefwaya ukulanda fye amashiwi yapulilemo mu mutwe we lyashi nelyo ukubelenga umutwe we lyashi filya fine ulembelwe, cili kuli imwe.

Ilingi, ubufwayo bwa kulanda bwaba bwa kukoselesha bambi ukucitapo cimo pa fyebo mwalanda. Ubufwayo bumo ubwa kusondwelela bwaba kulanga abantu ifya kucita. Ilyo mwasalile umutwe we lyashi ne fishinka fikalamba, bushe mwalitontonkenyepo bwino pa mulandu ifyebo fyenu fyali no kubela ifyacindama kwi bumba lyenu no buyo bwenu pa kulanda? Nga ni fyo, ninshi namwishiba ico mulefwaya bacite. Nomba mulingile ukubalondolwela ico cine bafwile ukucita napamo ne nshila bengacitilamo.

Ukulunda pa kulanga ibumba lyenu ifya kucita, insondwelelo yenu ilingile no kukunta abantu ku mitima. Ifwile ukusanshamo imilandu ya kucitila ifyo fintu, pambi no bunonshi bwingafumamo. Nga ca kuti mwalitontonkanya bwino pa mashiwi ya kulekelesha no kuyateyanya busaka busaka, cili no kwikasha ifyebo mulandile mu lyashi lyonse.

Ibukisheni ukuti ilyashi lilesondwelela. Ifyo mulesosa fifwile ukulanga ati nomba ni ku kupwa kwa lyashi. Umusenselo na o ufwile ukuba uwalinga. Mwilanda lubilo lubilo mpaka fye na ku kupwa e lyo ukuleka fye mu kupumikisha. Lelo, mwileka fye ishiwi lyenu lishiminine. Iciunda cenu cifwile ukuba icalinga, lelo te kupunda. Amashiwi yenu aya kulekelesha yalingile ukumfwika ukuti mulesondwelela. Mufwile ukuyalanda nga yacindama kabili ukuba abashininwa. Ilyo mulepituluka mu fyo mukalanda, te kwesha ukufilwa ukupitamo mu nsondwelelo.

Bushe ukusondwelela kufwile ukulepa shani? Ukusondwelela takufwile fye ukupimwa ku nkoloko. Takufwile ukushokoloka. Icipima ukulinga kwa nsondwelelo ni fintu ilenga ibumba ukucita. Ukusondwelela kwayanguka, ukwa kulungatika, ukwa kukoselesha ilingi line e kwalinga. Ukwalepako ukulimo icilangililo na ko kuti kwabomba bwino nga mwalipoosesheko amano pa kupekanya. Linganyeni ukusondwelela ukwipi ukwe buuku lyonse ilya kwa Lukala Milandu, ukwaba pali Lukala Milandu 12:13, 14, no kusondwelela ukwipi sana ukwa Lyashi lya pa Lupili, ukwa pali Mateo 7:24-27.

Mu Butumikishi bwa mwi Bala. Mu butumikishi bwa mwi bala e mo mukasanga imiku ne miku ukuti mulekabila ukusondwelela. Nga mwapekanya bwino e lyo no kutemwa abantu, kuti mwabomba ifisuma nga nshi. Ukufunda kuli pa mabula yafumineko kuti kwabomfiwa na pa kulanshanya no muntu fye umo.

Ukulanshanya kuti pambi kwaba ukwipi sana. Uyo muntu kuti napamo ali ne ncito. Ukushimikila kwenu kuti kwasenda fye miniti umo. Nga calinga napamo kuti mwatila: “Namona ukuti muli ne ncito. Lelo ilyo nshilaya, lekeni mwebeko fimo ifya kukoselesha ifyo mwingatontonkanyapo. Baibolo itila Kabumba wesu alikwata ubufwayo bwawamisha no bu bwa kulenga cino calo ukuba icifulo umo abantu bengaipakisha umweo wa muyayaya. Na ifwe kuti twaisaba muli uyo Paradise, lelo tulekabila ukusambilila ifyo Lesa afwaya tulecita.” Nelyo kuti mwamweba fye ukuti muli no kubwelelako inshita imbi.

Nga ca kuti mwine ng’anda amucilima no kuputula ukulanshanya—napamo asasuka no kusasuka—nalyo line kuti mwabombapo ifisuma. Ibukisheni ukufunda kwaba pali Mateo 10:12, 13 na Abena Roma 12:17, 18. Ukwasuka kwenu ukwatekanya napamo kuti kwayalula ifyo amona Inte sha kwa Yehova. Ico na co, kuti caba mulimo usuma.

Lubali lumbi, kuti napamo mwalanshanya bwino bwino na mwine ng’anda. Nga cabe fyo, kuti mwabwekeshapo icishinka mulefwaya ukuti aleibukisha. Mucincisheni no kucitapo cimo pa fyo aumfwa.

Nga mwamona ukuti kuti asumina ukulanshanya nankwe inshita na imbi, landenipo fimo ifingalenga alefwaisha ukuti mukabweleleko. Ipusheni icipusho—napamo icisangwa mu citabo ca Ukupelulula Ukufuma Mu Malembo nelyo mu lupapulo lumbi ulo tutungululamo amasambililo ya Baibolo aya pa ng’anda. Ibukisheni ubuyo bwenu, ubo Yesu alondolwele kabili ubwalembwa pali Mateo 28:19, 20.

Bushe mulesondwelela isambililo lya Baibolo ilya mu ng’anda? Ukubwekeshapo umutwe wa cipande cikafwa umusambi ukwibukisha icasambililwa. Ukwipusha amepusho ya kupitulukamo kukafwa ukuti ifishinka fikalamba fiikalilile mu mutima wa musambi, maka maka nga tamukwankwenye pa kupitulukamo. Ukwipusha fintu enganonkelamo mu fyebo asambilila kuti kwayafwa umusambi, nelyo ukumwipusha ifyo engashimikilako bambi kuti kwamwafwa ukutontonkanya ifyo engabomfya ifyo asambilila.—Amapi. 4:7.

Ibukisheni ukuti, ukusondwelela kwenu kuti kwalenga abantu bafwaye ukubombela pa fyo baumfwa mu lyashi lyenu.