Mwe Bacaice—Finshi Mukacita mu Bumi Bwenu?

UMUKASHANA umo umupungwe atile, “mfwaya ukuipakisha sana ubumi.” Ukwabula no kutwishika na iwe e fyo ufwaya. Lelo, kuti “waipakisha” shani ubumi? Pa milabasa ne fibusa fyobe, napamo na bakafundisha bobe kuti batila umo kuti aipakisha ubumi nga akwata indalama ishingi ne ncito ya pa muulu—alumbuka!

Lelo, Baibolo isoka abacaice ukuti ukufwaisha ifikwatwa “kufuluko mwela.” (Lukala Milandu 4:4) Umulandu umo wa kuti banono abacaice abanonka ifyuma no kulumbuka. Abanonka ifyuma no kulumbuka ilingi balafiishiwa ku mutima. Uwacaice umo umwina Britain uwalefwaisha incito ya pa muulu atile, “Ukukwata sana ifyuma caba kwati kukwata icibokoshi umwabula kantu. Nga waloleshamo, tamuli nangu cimo.” Ca cine, limo incito kuti yakuletela ifyuma no kulenga walumbuka. Lelo, te kuti ikushe ‘ifyo ukabila lwa ku mupashi.’ (Mateo 5:3, NW) Kabili, 1 Yohane 2:17 atusoka ukuti “pano isonde paleya.” Nangu ca kutila wanonka sana muli cino calo, icuma cobe kuti capwa.

E co, pali Lukala Milandu 12:1 abacaice bakonkomeshiwa ukuti: “Ibukisha Kalenga obe ilyo ucili umwaice.” (Today’s English Version) Cine cine, icawamisha ico wingacita mu bumi bobe kubombela Yehova Lesa. Lelo, intanshi ufwile ukufikapo pa kubombela Lesa. Kuti wafikapo shani? Kabili finshi fikabilwa pa kubombela Lesa?

Ukufikapo Ukuba Inte ya kwa Yehova

Intanshi, ufwile ukufwaisha ukubombela Lesa—no ko kufwaisha takwisa fye ukwine, nangu line abafyashi bobe Bena Kristu. Na iwe ufwile ukuba cibusa wa kwa Yehova. Umupungwe umo atile: “Ukupepa kulaafwa umo ukuba cibusa wa kwa Yehova.”—Amalumbo 62:8; Yakobo 4:8.

Ilembo lya Abena Roma 12:2 lyalanda pali cimbi ico ufwile ukucita. Lyatila: “Mulinge icabo kufwaya kwa kwa Lesa, icisuma kabili ica kutemuna kabili icapwililila.” Bushe pali ifyo utwishika pa fyo wasambilishiwa? Lyene umfwila ukukonkomesha kwa Baibolo, kabili ‘ulinge’ ukuti ifi fintu fya cine! Ulesapika we mwine. Ulebelenga Baibolo ne mpapulo shilanda pali Baibolo. Lelo, ukusambilila pali Lesa te kubebeta fye ifishinka. Patulako inshita ya kwetetula pa fyo ulebelenga pa kuti fikalilile mu mutima obe. Ici cikakulenga ukutemenwako Lesa.—Amalumbo 1:2, 3.

Lyene, esha ukwebako bambi ifyo ulesambilila, napamo abo usambilila nabo. Pa numa ya ici pakonka ukushimikila ku ng’anda ne ng’anda. Limo kuti wakumanya uo usambilila nankwe ku sukulu ilyo uleshimikila, kabili pa kubala kuti waumfwa umwenso. Lelo Baibolo itukoselesha ukukanaba “na nsoni ku mbila nsuma.” (Abena Roma 1:16) Uletwala ubukombe bupeela umweo ne subilo! Mulandu nshi uwa kumfwila insoni?

Abafyashi bobe nga Bena Kristu, napamo kale kale ulabomba na bo uyu mulimo. Lelo bushe ulacitako na fimbi ukucila ukwiminina fye pa mwinshi no kutambika bamagazini na matrakiti? Bushe kuti waya pa ng’anda weka no kulanda, kabili no kubomfya Baibolo ukusambilisha mwine ng’anda? Nga te kuti ucite co, kanshi eba abafyashi bobe nelyo umo mu cilonganino uwakosoka ukukwafwa. Ulefwaisha ukuba kasabankanya wa mbila nsuma uushabatishiwa!

Mu kupita kwa nshita ukalengwa ukuipeela—ukulaya kuli Lesa ukuti wakulamubombela ukutule lyo. (Abena Roma 12:1) Lelo, ukuipeela kobe kufwile ukwishibikwa. Lesa afwaya bonse ‘ukulumbula no kupusuka.’ (Abena Roma 10:10) Pa kubatishiwa, intanshi ulingile ukulumbula icitetekelo cobe. E lyo wabatishiwa mu menshi. (Mateo 28:19, 20) Ca cine ukubatishiwa te cintu ca kutwalilako amasange. Lelo, wilashimunuka ukumona ukuti napamo kuti wafilwa ukusunga ubulayo bobe. Nga wacetekela Lesa, akakupeela “ukucishamo kwa maka” pa kuti ukose.—2 Abena Korinti 4:7; 1 Petro 5:10.

Nga wabatishiwa, ninshi waba Inte ya kwa Yehova. (Esaya 43:10) Ulubatisho lwine ulu lufwile ukukuma sana ifyo ukalacita mu mikalile yobe. Ukuipeela kusanshamo ‘ukuikaanya.’ (Mateo 16:24) Napamo kuti waleka ifyo walepanga ukucita no ‘kubala wafwaya ubufumu bwa kwa Lesa.’ (Mateo 6:33) E co, lintu waipeela no kubatishiwa ninshi nomba amashuko ya kucite co yamoneka. Natumoneko yamo pali ayo.

Amashuku ya Kubombela Lesa Inshita Yonse

● Bupainiya bwaba pali ayo mashuko. Painiya ni kasabankanya wabatishiwa Umwina Kristu uubombesha ukufika pa maawala 70 nelyo ukucilapo cila mweshi ukushimikila imbila nsuma. Ukupoosa inshita iikalamba mwi bala kuti kwakwafwa ukushimikila no kusambilisha bwino. Bapainiya abengi balacankwa ilyo baleafwa abasambi ba Baibolo ukuba Inte shabatishiwa. Ni ncito nshi iingakuletela insansa ukucila bupainiya?

Pa kusanga umwa kwikalila, bapainiya abengi balengile ncito shishili sha kuwisha akasuba. Abengi balapekanishisha limo ukubomba uyu mulimo pa kusambililako umulimo umo ku sukulu nelyo ku bafyashi babo. Nga ca kuti iwe na bafyashi bobe mulefwaya ukuti usambilileko na fimbi pa numa ya kupwisha isukulu lya ku sekondari, ishiba ukuti ico wacitile co, te kufwaya ukukwata indalama ishingi, lelo kufwaya ukwafwilisha ubutumikishi bobe napamo no kubomba ubutumikishi bwa nshita yonse.

Nalyo line, ico painiya atontomeshapo sana mu bumi, te ncito ya ku mubili, lelo, butumikishi—ukwafwa bambi ukunonka umweo! Mulandu nshi ushingatontonkanishisha ukubombako bupainiya? Bupainiya bulenga waba na mashuko na yambi. Ku ca kumwenako, bapainiya bamo balaya ku fifulo uko bakabilisha ba Bufumu bakabilwa sana. Bambi na bo basambilila icitundu cimbi no kubombela mu cilonganino umo balanda ico citundu nelyo ku calo cimbi. Cine cine bupainiya bulanonsha!

● Bumishonari nabo lishuko na limbi. Ukutula 1943 Isukulu lya Baibolo ilya Gileadi Ilya Watchtower lyalisambilisha bapainiya bafikapo ifya kubomba umulimo wa bumishonari. Abapwisha ili sukulu bapeelwa umulimo wa nshita yonse uwa bukabila mu fyalo fimbi. Mu fyalo ifingi, imikalile yalyafya sana, e co, ubumi busuma na maka filakabilwa mu mulimo wa bumishonari. Nalyo line, bamishonari balaipakisha kabili balakwata insansa.

● Isukulu lya Kukansha Ilya Butumikishi lyabelako ukukansha baeluda na babomfi batumikila abafikapo kabili abashimbe. Pa milungu 8 balasambilila sana imilimo ya baeluda na babomfi batumikila, ifyo ukuteyanya kwaba, ne fya kulanda amalyashi ku cintubwingi. Bamo batumwa ukubomba mu calo cabo. Bambi batumwa ku fyalo fimbi.

● Umulimo wa pa Bethel mulimo wa kuitemenwa uubombelwa pa maofeshi yanono aya Nte sha kwa Yehova. Bamo aba mu lupwa lwa pa Bethel bapanga impapulo shilanda pali Baibolo. Bamo bapeelwa imilimo ya kwafwilisha, pamo nga ukuwamya ifikuulwa ne fipe nelyo ukuteyanya ifyo ulupwa lwa Bethel lukabila. Yonse iyi, milimo yashila kuli Yehova. Na kabili, ababa pa Bethel balasekelela ukwishiba ukuti fyonse ifyo bacita, filafwa bamunyinabo abengi mwi sonde lyonse.

Limo bamunyinefwe abaishiba imilimo imo baletwa ukubombela pa Bethel. Lelo, abengi basambilila imilimo imo ilyo bali palya pene pa Bethel. Ababombela pa Bethel tababombela ukuti banonke ifyuma lelo, balekuushiwa ne fya kulya no mwa kulaala babapekanishisha, ne ndalama shinono isha kubomfya kuli tumo tumo. Uwacaice umo uwa mu lupwa lwa pa Bethel alondolola umulimo wakwe ati: “Waliwamisha! Uyu mulimo tawayanguka, lelo nalipaalwa apakalamba ukubombela pano.”

● Ukubombela mu fyalo fyalekanalekana kulenga umo ukukuulako amaofeshi ya Nte sha kwa Yehova na Mayanda ya Bufumu. Ababombela mu fyalo fyalekanalekana, balaya mu fyalo fimbi ku kwafwilisha umulimo wa makuule. Uyu na o mulimo washila uwapalana na untu abalekuula itempele lya kwa Solomone babombele. (1 Ishamfumu 8:13-18) Basakamanwa filya fine aba mu lupwa lwa pa Bethel basakamanwa. Mwandi lishuko kuli aba bamunyinefwe na bankashi ukubomba uyu mulimo uulenga Yehova ukulumbanishiwa!

Bombeleni Yehova no Mweo Onse

Ukubombela Yehova e cintu cawamisha ico wingacita mu bumi bobe. Mulandu nshi ushingatontonkanishisha pa lwa kubombela Lesa umulimo wa nshita yonse? Lanshanyeni pa mulimo wa nshita yonse na bafyashi bobe, baeluda mu cilonganino waba, na kangalila wa muputule. Nga ulefwaya ukubombela pa Bethel, ukusangwa kwi sukulu lya Gileadi, nelyo Isukulu lya Kukansha Ilya Butumikishi, sangwa ku kukumana kubako ku balefwaya ukucite fyo pa kulongana kwa muputule no kwa citungu.

Nalyo line te bonse abafikapo nelyo abengakumanisha ukubomba umulimo wa nshita yonse. Limo ukulwalilila, nelyo ukubulwa indalama, nelyo ukusunga ulupwa kuti fyalenga umo ukukanabombako. Nalyo line, Abena Kristu baipeela bonse bafwile ukumfwila icipope ca mu Baibolo ica kuti: “Uletemwa sokulu Lesa ku mutima obe onse, na ku mweo obe onse, na ku kutontonkanya kobe konse.” (Mateo 22:37) Yehova afwaya iwe ukubomba apapela amaka yobe. E co, te mulandu na mafya mukwete, pampamineni fye pa kubombela Yehova. Mulepanga ukucita imilimo ya kwa Lesa iyo mwingafikapo. Ca cine, “Ibukisha Kalenga obe ilyo ucili umwaice”—kabili ukapaalwa ku ciyayaya pa kucite co!

Amalembo yonse ayambwilwe muli uno trakiti yafumine muli Baibolo wa Cibemba uwa mu 1956. Apo mwamona NW ninshi Amalembo yapilibwilwe muli Baibolo wa ciNgeleshi uwa New World Translation of the Holy Scriptures.