Bushe Uyu Kuti Waba E Mulimo Wawamisha Kuli Iwe?

NGA uli Mwina Kristu wabatishiwa, ukwabula ukutwishika ukutemwa Lesa kukulenga ukucita ukufwaya kwakwe. Na kabili, ubutumikishi e mulimo ufwile ukuipeeleshako icine cine. Na kuba, Yesu Kristu aebele abakonshi bakwe bonse ukubomba umulimo wa kulenga abasambi. (Mateo 28:19, 20) Ca cine, nalimo pali ino nshita ulebomba lwa ku mubili ku kuisakamana. Lelo apo uli mukonshi wa kwa Yesu kabili umo uwa Nte sha kwa Yehova, icacindamisha ca kuti uli mutumikishi wa Bwina Kristu—umuntu uucindamika nga nshi umulimo wa kushimikila pa Bufumu mu bumi bwakwe.—Mateo 24:14.

Nalimo uli mu myaka ya kulekelesha iya bupungwe nelyo mu kutendeka kwa myaka ya ba 20. Ukwabula ukutwishika, walitontonkanyapo sana pa fyo ukacita mu bumi. Ilyo uletontonkanya pa fintu ifyo wingacita, ifintu ifingakunonsha e fingesa intanshi.

Lyene tontonkanya pa fyo Jørgen uwa ku Denmark alanda pa mulimo asalile ukucita. Jørgen aulondolola nge “cintu cawamisha mu bumi ico wingacita icingakupeela inshita ya kusakamana ifintu fyacindamisha.” Eva, umwanakashi umwina Greece uuli ne myaka 31, atila: “Nga nalinganya ubumi bwandi ku bwa balya tulingene nabo, lyonse ntila ubumi bwandi bwaliwamisha, bwaba ubwa kwikusha, kabili ubwa kucincimusha.” Mulimo nshi uleta ukusekelela kwa musango yo? Kuti wacita shani pa kuti na iwe ubombeko uyu mulimo?

Bushe Lesa Alakutungulula?

Kuti caba icayafya ukusala umulimo ukalabomba. Na kuba, bamo nalimo kuti bafwaya Lesa ukubalanga umulimo afwaya bene ukubomba.

Ilyo Mose ali ku Midiani, Yehova amwebele ukubwelela ku Egupti no kutungulula abena Israele ukufuma mu busha. (Ukufuma 3:1-10) Malaika wa kwa Lesa amoneke kuli Gideone, uwasontelwe ukulubula abena Israele ku kutitikishiwa. (Abapingushi 6:11-14) Davidi alecema impanga ilyo Lesa aebele Samwele ukumusuba ukuba imfumu ikakonkapo iya Israele. (1 Samwele 16:1-13) Ifyo te fyo ifwe tutungululwa ilelo. Lelo, tufwile ukubebeta bwino ifintu no kupingulapo ifyo twingabomfya ukulamuka uko Lesa atupeela.

Yehoba aiisula “umwinshi ukalamba kabili uwa kubombesha” ku Bena Kristu bacaice ilelo. (1 Abena Korinti 16:9) Ni shani fintu acite fyo? Imyaka 10 iyapitapo, bakabilisha ba Bufumu ukucila pali 2,125,000 balilundwako ukulenga impendwa ya bakabilisha ukufulilako ukucila pali 6,000,000 mwi sonde lyonse. Ni bani bafwilisha ukupekanya amamilioni ya ma Baibolo, ifitabo, amabroshuwa, bamagazini, na matrakiti ifikabilwa ku kutungililwa lwa ku mupashi no kubomfiwa mu kushimikila imbila nsuma mwi sonde lyonse? Ulupwa lwa Bethel ulwa mwi sonde lyonse e lubomba uyu mulimo wawamisha.

Ubumi Bwabamo Amapaalo

Ishiwi Bethel, lipilibula “Ing’anda ya kwa Lesa,” kabili amayanda ya Bethel yaba fifulo umwikala Abena Kristu babomba mu kuitemenwa pa maofeshi yakalamba na yanono aya Watch Tower Society. (Ukutendeka 28:19, utulembo twa pe samba) Indupwa shaba mu mayanda ya Bethel aya muno nshiku kuti yapashanishiwa ku ‘ng’anda’ yateyanishiwa bwino ‘iyakuulilwa ku mano’ no kushimpwa pa kutemwa kwa kwa Yehova.—Amapinda 24:3.

Kuti twalandapo shani pa mikalile yaba nge ya mu lupwa iyaba pa Bethel? Uwaba mu lupwa lwa Bethel ku Estonia uuli ne myaka 25 atila: “Ndomfwa bwino ukuba pa fibusa fya kwa Yehova lyonse. Ici caba e cintu cacindamisha kuli ine mu mulimo wa pa Bethel.”—Amalumbo 15:1, 2.

Mwi sonde lyonse, kwaba abantu nalimo 19,500 ababomba umulimo waibela uwa pa Bethel. (Amalumbo 110:3) Ku United States, amapesenti 46 aya babomba pa Bethel bali pa kati ka myaka 19 na 29. Nge fyacitile Esaya, na bo batila: “Moneni, ine; ntumeni.” (Esaya 6:8) Esaya—uwaipeele kale kuli Yehova—aleipeela mu kuitemenwa ukuti abombeko imilimo na imbi. Ici cali no kulenga ukuipusula ku fintu fimo ifyo atemenwe nga nshi. Ababomba pa Bethel balasha ku myabo ne fifulo babelesha, ukusanshako banyinabo, bashibo, bamunyinabo, inkashi shabo, ne fibusa. Uku kuipusula kucitwa “pa mulandu wa mbila nsuma.”—Marko 10:29, 30.

Nangu baipusula ifyo, mwandi balaipakisha amapaalo ya ku mupashi ayaba pa Bethel! Uwacaice uwaba mu lupwa lwa Bethel ku Russia alondolola ukuti: “Ilyo twaipusula, kuti twasambilila ifingi ifikatwafwa ukwikala mu calo cipya. Pa lwandi kuti natila amapaalo ya kwa Yehova yalicila nga nshi pa fyo naipusula.”—Malaki 3:10.

Ifyo Ubumi bwa pa Bethel Bwaba

Bushe ubumi bwa pa Bethel bwaba shani? Ababa mu lupwa lwa Bethel balasumina ukuti caba cifulo cisuma kabili ica nsansa, no kucincimuna. Jens, uuli ne myaka 43, alaipakisha umulimo wa pa Bethel. Mulandu nshi? Atila: “Pa mulandu wa kuyumfwa ukuti twaba mwi bumba ilibombesha pa kubomba umulimo wacindama. Cinenga ukwishiba ubukulu no bucindami bwa mulimo wa kwa Yehova.”

Ukufuma pali Cimo ukufika pa Cibelushi, ubushiku bumo na bumo butendeka no kupepa kwa lucelo. Uku kuba kulanshanya kwa Baibolo ukutungululwa na eluda wabelesha. Lyonse pali Cimo icungulo kulaba isambililo lya lupwa ukubomfya Ulupungu lwa kwa Kalinda kabili lisenda iawala limo, lyene inshita shimo kulaba ilyashi ilikwata umutwe wa mu Malembo ilyalinga ku lupwa lwa Bethel.

Cinshi cicitika ilyo umuntu aisa fye ku Bethel? Pa kusambilisha abapya ifyo ubumi bwa pa Bethel bwaba, bamunyina bakosoka balalanda amalyashi ayalondolola ifintu ifingi pa mulimo wa pa Bethel. Pa milungu iingi mu mwaka wakwe uwa kubalilapo, umupya mu lupwa lwa Bethel alasangwa kwi sukulu lyawamisha ilibako cila mulungu ilyapangilwa ku kwafwilisha umupya ukumfwikisha Amalembo. Abapya na kabili balaipakisha programu waibela uwa kubelenga Baibolo. Abapya mu lupwa balabelenga Baibolo yonse mu mwaka wabo uwa kubalilapo mu mulimo wa pa Bethel.

Bushe uku kukansha kwafwa shani ababa mu lupwa lwa Bethel? Joshua, uuli ne myaka 33 uwaba mu lupwa lwa Bethel ku Hong Kong, ayasuka ukuti: “Ukuba pa Bethel cine cine kwalingafwa ukutesekesha sana Yehova. Kuti nabishanya na bamunyina babelesha ababombela Yehova imyaka iingi mu bumi bwabo. Kabili ndaipakisha sana amaprogramu ya ku mupashi, pamo nga ukupepa kwa lucelo ne sambililo lya lupwa ilya Ulupungu lwa kwa Kalinda. Na kabili, nalitemwa imikalile ya busaka kabili iyaanguka. Ici cinenga ukukanaba na masakamika ayengi. Na kabili ndasambilila ifya kucita ifintu mu nshila ya Bwina Kristu, kabili ici cilanonsha lyonse.”

Ababa mu lupwa lwa Bethel babomfya inshita yabo na maka ukubomba umulimo uo basalapo ukubomba mu kuitemenwa. E kuti, balabomfya amaka ya ku mubili ne mintontonkanya yabo ku kubomba imilimo bapeelwa pa Bethel. Kwaliba imilimo iingi ifwaikwa ukucitwa. Bamo babomba na fimashini fya kupulintilako nelyo ukubomba umo bapangila ifitabo ifitumwa ku filonganino ifingi. Bamo babomba mu kicini, mu muputule wa kuliilamo, nelyo umo bawashisha ifya kufwala. Imilimo bapeelwa isanshamo ukuwamya, ukulima, umulimo wa kukuula, e lyo ne milimo imbi. Bamo bapeelwa umulimo wa kusakamana ifibombelo muli ifi fifulo fya kubombelamo. Bamo basakamana abalwele nelyo ukubomba incito sha mu maofeshi. Imilimo yonse iya pa Bethel yaba iyakosa lelo iya kucincimuna kabili mwaliba amapaalo yawamisha. Umulimo uucitwa pa Bethel waliba uwa kwikusha nga nshi pantu ulatwala pa ntanshi umulimo wa Bufumu kabili ucitwa pa mulandu wa kutemwa Lesa.

Ababa mu lupwa lwa Bethel balatumwa ku filonganino, uko baimwena ubunonshi bwaba mu mulimo wabo. Balaipakisha ukusangwa ku kulongana kwa cilonganino no kubombako mu mulimo wa kushimikila. Pa mulandu wa ici, ababa mu lupwa lwa Bethel balilundulula bucibusa bwawamisha na bamunyinabo na bankashi mu filonganino balongana.—Marko 10:29, 30.

Rita, uwaba mu lupwa lwa Bethel ku Britain, atila: “Ndatasha sana pa cilonganino! Ilyo ndi pa kulongana na mu butumikishi, icitetekelo candi cilakoselako ilyo ndemona bamunyina, bankashi, abana, na bakalamba! Bonse balasangwa ku kulongana te mulandu ne ficitika. Ici cilangafwa ukuba uwapimpa mu mulimo wandi uwa pa Bethel.”

Imikalile ya pa Bethel taisanshamo fye incito, ukulongana, ubutumikishi, no kulabelenga lyonse. Ulu lupwa lulaipakisha no tushita twakukokoloka. Limo limo, kulaba amaprogramu ya kucincimuna kabili ayakoselesha lwa ku mupashi ayetwa “Family Night,” iyaba inshita ya kuipakisha ukulamuka kwa bambi ababomba pa Bethel no kusambililako ifya kukoselesha pa bumi bwabo. Cimbi ico baipakisha kutandala kusuma kabili ukwa kukoselesha uko batandala na bambi. Limo limo kuti kwaba ifya kubomfya pa kukokoloka, ifisanshako amalaibrare kuli abo abalefwaya ukubelenga no kusapika. Kabili cimbi icicincimuna caba kulanshanya kusuma ukubako pa nshita ya kulya pa matebulo.

Tom, uwaba mu lupwa lwa Bethel ku Estonia, atila: “Mupepi fye na Bethel kwaliba bemba, kabili mu mbali ya bemba mwaliba umutengo wayemba uo ine no mukashi wandi tuipakisha ukutandalamo. Kabili inshita shimo ndateya ubwangalo bwa kamombo (golf), hockey, na tennis ne fibusa fya mu cilonganino ne fya pa Bethel. Kabili nga na buca bwino, tulaya tulecofa icinga shesu.”

Cinshi Wingacita pa Kuti Ufikepo?

Ca cine, Bethel cifulo uko Abena Kristu bakosoka babomba umulimo washila kuli Yehova no kubombela bamunyinabo mwi sonde lyonse. Kwaliba ififwaikwa fimo ifyo ababa mu lupwa lwa Bethel bafwile ukufikapo. Cinshi wingacita pa kuti ufikepo ukubomba umulimo wa pa Bethel?

Ukupala Timote, uwabombele no mutumwa Paulo, abetwa ukubomba umulimo wa pa Bethel bafwile ukuba ne mibele isuma mu cilonganino. (1 Timote 1:1) Timote “aleshimikwe cisuma ku ba bwananyina ba mu Lustra na Ikonia.” (Imilimo 16:2) Nangu ali umwaice, Timote alishibe Amalembo kabili alishikatele mu cine. (2 Timote 3:14, 15) Cimo cine, abetwa ukubomba umulimo wa pa Bethel benekelwa ukwishiba Baibolo.

Ababa mu lupwa lwa Bethel bafwile ukuba no mupashi wa kuipusula. Umupashi wa kuipusula no kuitemenwa kwakwe ukutangishako umulimo wa Bufumu fyalemoneka muli Timote ica kuti Paulo alandile ulwa wene ukuti: “Nshikwete muntu uwalingana nankwe umutima, untu engasakamane cine cine ifya kuli imwe. Pantu bonse bafwaye fyabo abene, te fya kwa Yesu Kristu; lelo mwaishibo kweshiwa kwakwe, ukuti abombele pamo na ine ku mbila nsuma, ngo mwana kuli wishi.”—Abena Filipi 2:20-22.

Umulimo wa pa Bethel ufwile ukubombwa na baume na banakashi ba bumupashi. Ukutantika ukwacitilwa ababa mu lupwa lwa Bethel kwabalenga ukukula lwa ku mupashi ukupitila mu kusambilila Baibolo, ukusangwa lyonse ku kulongana na mu mulimo wa butumikishi, no kubishanya na Bena Kristu bakosoka. E co ababomba pa Bethel balafwiwa ukukonka ukufunda kwa kwa Paulo ukwa kuti: “Endeni muli [Kristu Yesu], abalimbwa kabili abalekuulilwa muli wene, abaleikashiwa ku kutetekela nge fyo mwasambilishiwe, kabili mube abalefusho kutootela.”—Abena Kolose 2:6, 7.

Pa mulandu wa musango wa ncito sha pa Bethel, abetwa ukubombako uyu mulimo bafwile ukuba abakosa lwa ku mubili kabili ukuba no bumi busuma. Nga naukumanisha ififwaikwa filandilwepo pa mulu, uli ne myaka 19 nelyo ukucilapo, kabili apo wabatishiwilwe napapita umwaka umo, tulekukoselesha ukutontonkanya pa mulimo wa pa Bethel.

Bonse Twalikwata Umulimo

Apo tuli Bena Kristu, cine cine bonse tulafwaisha ukutangishako imilimo ya Bufumu mu bumi no kubomba no mweo onse mu mulimo wa kwa Yehova. (Mateo 6:33; Abena Kolose 3:23) Kabili kuti twakoselesha ababomba pa Bethel ukutwalilila ukubomba umulimo washila palya. Kabili ukucilisha bamunyina bacaice abafikilepo e balekabila ukukoseleshiwa ukutinamina uyu mulimo wawamisha.

Umulimo wa pa Bethel waba mulimo uwikusha lwa ku mupashi—umulimo uwingaba uwawamisha kuli iwe. Waba mulimo wawamisha kuli Nick, uwatendeke ukubomba pa Bethel ilyo ali ne myaka 20. Pa numa ya kubomba imyaka 10 pa Bethel, atila: “Ilingi ndapepa kuli Yehova ku kumutasha pa cikuuku cakwe. Cinshi cimbi ico ningalomba? Pano, twikala na Bena Kristu ba busumino abalecita apapela amaka yabo ukubombela Yehova.”

[Akabokoshi ne Cikope pe bula 22]

CINSHI BAELUDA NA BAFYASHI BENGACITA?

Baeluda na bakangalila benda e bafwile ukuba aba ntanshi ukukoselesha abalumendo ukwipushako umulimo wa pa Bethel. Nomba line fye, ukufwailisha kwacitilwe pa bacaice ababa mu lupwa lwa Bethel kwalangile ukuti amapesenti 34 aya bene bakoseleshiwe sana kuli bakangalila ba Bwina Kristu ukulenga umulimo wa pa Bethel ukuba e buyo bwabo. Ca cine ukuti ifilonganino balebishanya na fyo kuti fyabafuluka. Lelo cisuma ukwibukisha ukuti nangu cingati Timote ali ca kumwenako cisuma ku bacaice ba mu Lustra na Ikonia, baeluda tabamuleseshe ukubomba na Paulo. Tabaletontonkanya ukuti ukuleka Timote ukuya na Paulo kwali no kulenga ukubulisha kukalamba ku cilonganino cabo.—1 Timote 4:14.

Abafyashi ba Bwina Kristu e bafwile ukukoselesha sana abana babo ukulosha kuli uyu mulimo. Mu kufwailisha ukulandilwepo pa mulu, amapesenti 40 aya abo abaipushiwe batile abalebakoselesha sana ukuti batendeke umulimo wa pa Bethel bali bafyashi babo. Nkashi umo uwabomba pa Bethel pa myaka inono atile: “ukubomba kwa bafyashi bandi mu mulimo wa kwa Yehova e kwankoseleshe sana ukutendeka umulimo wa pa Bethel. Ilyo nalemona ica kumwenako cabo mu butumikishi bwa nshita yonse, nalishibe ukuti iyi e nshila yawamisha kabili iileta insansa mu bumi iyo mfwile ukusala.”

[Akabokoshi pe bula 24]

BALATESEKESHA UMULIMO WA PA BETHEL

“Ndateesa umulimo wandi uwa pa Bethel. Cilansansamusha ukwishiba ukuti mombela Yehova akasuba konse no kuti nkacita cimo cine mailo, bulya bushiku, ne nshiku ishikakonkapo. Ici cinenga ukuba na kampingu musuma no kulatontonkanya pa fisuma.”

“Bethel e cifulo apo wingabomfya inshita yobe yonse na maka ku mulimo wa kwa Yehova ukwabula ukupumfyanishiwa. Ici cileta ukusekelela kwa lwa nkati. Lelo na kabili kuti wamona ukuteyanya kwa kwa Yehova mu nshila shalekanalekana. Kuti wayumfwa uwapalamisha ku cishinte ca uku kuteyanya, kabili ici cilenga umulimo ukuba uusuma nga nshi.”

“Umulimo wa pa Bethel e mulimo wawamisha uo nabombako mu bumi bwandi. Pano ukusambilila takupwa. Kabili pano, nshisambilila ukuti nkamwenemo pa lwandi, lelo, pa kuti mombele bwino Yehova. Pano umulimo wandi tawakatale auba uwa fye.”

“Ukubomfya ukulamuka kwandi pa Bethel kunenga ukwikushiwa no kuba no mutende pantu ukulamuka kwandi kulebomfiwa kuli Yehova na bamunyina.”

“Umulimo nalebomba kale tawandetele ukwanga ne nsansa. Pa myaka iingi naletontonkanya pa kubombela pamo na bamunyinane ne nkashi no kubabombela. E mulandu naishile ku Bethel. Ndasekelela nga nshi pantu nalishiba ukuti ukubombesha kwandi kukanonsha bambi lwa ku mupashi no kutasha Yehova.”