“Uyu E Mwana Wandi”

LINTU abana balecita ifintu fisuma, ababasunga balatemwa. Lintu umukashana acita icintu cimo bwino, bawishi balomfwa bwino no kweba bambi ukuti: “Uyu e mwana wandi.” Nelyo lintu umulumendo alecite fisuma, bawishi balomfwa na bwino ukutila: “Uyu e mwana wandi.”

Yesu lyonse acita ifisekesha Wishi. E co Wishi alimutemwa. Bushe uleibukisha ico Wishi kwa Yesu acitile bushiku bumo lintu Yesu ali na bakonshi bakwe batatu?— Lesa alandile ukufuma ku muulu ukubeba ati: “Uyu e Mwana wandi uwatemwikwa, uo [nasenamina].”—Mateo 17:5.

Yesu lyonse alatemwa ukucita ifintu ifisekesha Wishi. Bushe walishiba umulandu? Pantu alitemwa Wishi icine cine. Nga ca kuti umuntu alecita ifintu pa mulandu fye wa kuti afwile ukuficita, cilakosa ukucita ifyo fintu. Lelo nga naitemenwa, cilanguka. Bushe walishiba ifyo cipilibula ukuitemenwa ukucita icintu?— Cipilibula ukufwaya ukucita icintu cimo.

Na lintu Yesu ashilaisa pe sonde, ali uwaitemenwa ukucita conse ico Wishi amweba ukucita. Alecite fi pa mulandu wa kuti alitemwa Wishi, Yehova Lesa. Yesu akwete icifulo icisuma sana mu muulu na Wishi. Lelo Lesa akwatile Yesu umulimo waibela. Pa kubomba uyo mulimo, Yesu alekabila ukufuma ku muulu. Alekabila ukufyalwa nga kanya pe sonde. Yesu ali uwaitemenwa ukucite ci pantu Yehova alefwaya ukuti acite co.

Pa kufyalwa nga kanya pe sonde, Yesu alekabila ukukwata nyina. Bushe walishiba uwali nyina?— Ishina lyakwe ali ni Maria. Yehova atumine malaika wakwe Gabriele ukufuma ku muulu ku kwisalanda na Maria. Gabriele amwebele ukuti ali no kukwata umwana umwaume. Umwana ali no kwinikwa ati Yesu. Kabili nani ali no kuba wishi kwa uyu mwana?— Malaika atile Wishi kwa uyu mwana ali no kuba Yehova Lesa. E mulandu wine Yesu ali no kwitilwa Umwana wa kwa Lesa.

Bushe uletontonkanya ukuti Maria ayumfwile shani pali ci?— Bushe atile, “Nshilefwaya ukuba nyina kwa Yesu”? Iyo, Maria ali uwaitemenwa ukucita ico Lesa alefwaya. Lelo Umwana wa kwa Lesa ku muulu kuti afyalwa shani pe sonde nga kanya? Bushe ukufyalwa kwa kwa Yesu kwapusene shani ne fyo abana bonse bambi bafyalwa? Bushe walishiba?—

Lesa apangile abafyashi besu aba kubalilapo, Adamu na Efa, ukuti balekumana pamo mu nshila iisuma. Pa numa ya ico, umwana ali no kutendeka ukukula muli nyina. Abantu batila ici cipesha mano! Ndemona na iwe ulesumina.

Nomba Lesa acitile icipesha mano cacilanapo ukuwama. Abuulile ubumi bwa Mwana wakwe ku muulu no kububika muli Maria. Lesa tabalile acitapo ico, kabili tabala acitapo ica musango yu ukutula lilya. Pa mulandu wa ici cipesha mano, Yesu atendeke ukukula mwi fumo lya kwa Maria filya fine fye abana bambi bakula mu mafumo ya banyina. Pa numa ya ico, Maria aupilwe kuli Yosefe.

Lintu inshita yafikile iya kuti Yesu afyalwe, Maria na Yosefe bali mu musumba wa Betlehemu. Lelo mwaiswile abantu. Takwali no kwa kusendama Maria na Yosefe, e co basendeme umo inama shalesungilwa. Mulya Maria afyele umwana, kabili Yesu abikilwe mu mulimba, nga fintu ulemona pano. Umulimba ni mulya babika ifya kulya fya ng’ombe nelyo inama shimbi.

Ifintu fya kupapusha fyalicitike ubushiku Yesu afyelwe. Mupepi na Betlehemu, malaika amonekele ku bacemi bamo. Abebele ukuti Yesu ali muntu wacindama. Malaika atile: ‘Moneni, ndemweba imbila nsuma iya kusekelela kukaba ku bantu. Lelo umupusushi wa bantu nafyalwa.’—Luka 2:10, 11.

Malaika aebele abacemi ukuti bali no kusanga Yesu mu Betlehemu nalaala mu mulimba. Lyene, apo pene, bamalaika bambi mu muulu batendeke ukulumbanya Lesa pamo na malaika wa kubalilapo. Bamalaika baimbile ati, ‘Ubukata kuli Lesa, na pe sonde pabe umutende mu bantu abo atemwa.’—Luka 2:12-14.

Ilyo bamalaika baile, aba bacemi baile ku Betlehemu no kusanga Yesu. Kulya baebele Yosefe na Maria ifintu ifisuma fyonse ifyo baumfwile. Bushe kuti waelenganya ifyo Maria asansamwike pa kuitemenwa ukuba nyina kwa Yesu?

Lyene, Yosefe na Maria batwele Yesu ku musumba wa Nasarete. Kulya e ko Yesu akuliile. Ilyo akulile, atendeke umulimo wakwe uukalamba uwa kusambilisha. Uyu na o wali mulimo Yehova Lesa alefwaya Umwana wakwe ukubomba pe sonde. Yesu ali uwaitemenwa ukubomba uyo mulimo pantu Yesu atemenwe sana Wishi wa ku muulu.

Ilyo Yesu talatendeka umulimo wakwe uwa kuba Kasambilisha Mukalamba, alibatishiwe kuli Yohane Kabatisha mu Mumana wa Yordani. Lyene icintu ca kupapusha calicitike! Ilyo Yesu alefuma mu menshi, Yehova alandile ukufuma ku muulu ati: “Uyu e mwana wandi uwatemwikwa, [uo nasenamina].” (Mateo 3:17) Bushe taumfwa bwino lintu abafyashi bobe bakweba ati balikutemwa?— Kuti twacetekela ukuti Yesu na o alyumfwile bwino.

Yesu lyonse alecita icalungama. Taleesha ukubepekesha fintu ashaba. Taleeba abantu ukuti ni Lesa. Malaika Gabriele aebele Maria ukuti Yesu ali no kwitwa Umwana wa kwa Lesa. Yesu umwine atile ali Mwana wa kwa Lesa. Kabili taleeba abantu ukuti alishibe ifintu ifingi ukucila Wishi. Atile: “Tata mukalamba pali ine.”—Yohane 14:28.

Na ku muulu, lintu Wishi kwa Yesu amupeela imilimo, Yesu alebomba iyo milimo. Taleti alabomba e lyo ayacita fimbi. Alitemenwe Wishi. E co aleumfwa ku fyo Wishi alelanda. Lyene lintu Yesu aishile pe sonde, alecita ifyo Wishi wa ku muulu amutumine ukucita. Talebomfya inshita yakwe ukucita fimbi. E mulandu wine Yehova atemenwa Umwana wakwe!

Na ifwe tufwaya ukusekesha Yehova, bushe te ifyo?— Lyene tufwile ukulanga ukuti tulomfwa kuli Lesa, nga fintu Yesu acitile. Lesa alanda na ifwe muli Baibolo. Te kuti cibe bwino ukubepekesha kwati tuleumfwa kuli Lesa lelo twasumina ifintu ifyapusana na Baibolo kabili twalacita ne fyo fintu, bushe te ifyo?— Kabili ibukisha, tukafwaya sana ukusekesha Yehova nga ca cine twalimutemwa.