Abo Wingapashanya—Yosefe

Yosefe aali mu bwafya ubukalamba nga nshi. Muka cilolo uo alebombako incito alemufwaya ukuti alaale nankwe. Awe bushiku bumo amufwaya ukuti alaale nankwe! Lelo Yosefe alikaaninine fye ndai. Na kuba pa kumwasuka, tamupitile na mu mbali. Amwaswike ati: “Kuti nacita shani ububi bwakula ifyo no kubembukila Lesa?” Ilyo uyu mwanakashi apatikishe Yosefe ukuti alaale nankwe, ica kuti no kumwikata amwikata, Yosefe ena alifulumwike ukwabula no kumfwa insoni. Na kuba abutukile pa nse! Ifyo Yosefe acitile fyalangilile ukuti wa cishinka.—Ukutendeka 39:7-12.

Na iwe, limbi kuti bakweba ukuti ucitepo cimo icingapwisha insuuna yobe. Nga taulefwaya ukucita ica musango uyo, taulingile ukupeleela fye pa kuba uwakosa. Icikalamba icingalenga ukuti wicita ifyo, kuba no mutima wa kumfwila kabumba obe, Yehova Lesa. Nawishiba, Yosefe na o wine aleumfwa insuuna nge fyo na iwe wine umfwa. Lelo talefwaya nangu fye panono ukupwishisha insuuna yakwe mu kucita ifyali no kukalifya Kabumba. Na iwe wine e fyo ufwile ukuba, taulingile ukulatwishika ukuti imibele yakowela ilakalifya Lesa e lyo kabili kuti yalenga washala no bulanda. E ico ulebombesha pa kuti ukwate imibele iisuma nga ilya iyakweteko Yosefe.