Umusha Uwaumfwilile Lesa

Yosefe ali pa bana abaice abo Yakobo akwete. Abakalamba bakwe abaume balimwene ukuti Yosefe e o wishi atemenwe sana pa bana bonse. Bushe ulemona ukuti baleumfwa shani ifi bawishi batemenwe sana Yosefe? Bandume nankwe ba kwa Yosefe balimufimbiile kabili balimupatile. Ilyo Yosefe alotele ifiloto ifyaibela, alyebeleko bandume nankwe. Balemona kwati ifiloto fyalelanga ukuti bushiku bumo bakamufukamina. Ici calengele bamupate sana!

Bushiku bumo, bandume nankwe balecema impaanga mupepi no musumba wa Shekemu. E ico Yakobo atumine Yosefe ukuyamona nga bandume nankwe bali fye bwino. Ilyo aleya balimumwene ninshi ali ukutali e lyo balanda abati: ‘Kalota wa filoto aisa. Iseni tumwipaye!’ E ico balimwikete no kumupoosa mu cilindi icitali. Nomba Yuda ndume nankwe atile: ‘Mwimwipaya! Lekeni tumushitishe fye pa kuti akayeba umusha.’ E ico balimushitishe kuli bashimakwebo abena Midiani abaleya ku Egupti. Bamushitishe pa ndalama sha silfere 20.

Lyena bandume nankwe ba kwa Yosefe babulile ica kufwala cakwe no kucitumpika mu mulopa wa mbushi, e lyo bacitwala kuli shibo. Baebele shibo abati: ‘Bushe ici, te ca kufwala ca kwa Yosefe?’ Kanshi Yakobo alemona fye kwati inama ya mu mpanga e yaipeye Yosefe. Ala alyumfwile ububi sana ica kuti bonse balifililwe ukumusansamusha.

Ilyo Yosefe ali mu Egupti, balimushitishe ku walebombela kwi sano uo baleita ati Potifa, kabili ali umusha wakwe. Nomba Yehova alitwalilile ukupaala Yosefe. Potifa alimwene ukuti Yosefe alebomba bwino imilimo bamupeele kabili alimucetekele. Tapakokwele Potifa aebele Yosefe ukuba umukalamba wa babomfi bonse aba pa ng’anda.

Muka Potifa atendeke ukumona ukuti Yosefe ali musuma sana kabili ali uwakosa. Kanshi cila bushiku ale-eba Yosefe ukuti alaale nankwe. Cinshi Yosefe acitile? Alikeene kabili amwebele ati: ‘Awe! Ukucita ifi kubi. Bashikulu balincetekela sana kabili imwe muli bakashi babo. Nga nalaala na imwe nalabembukila Lesa!’

Bushiku bumo muka Potifa alipatikishe Yosefe ukuti alaale nankwe. Alimwikete mu fya kufwala fyakwe, lelo Yosefe alibutwike. Ilyo Potifa abwelele pa ng’anda, umwina mwakwe amwebele ukuti Yosefe alefwaya ukulaala nankwe. Alibepele. Potifa alifulilwe icine cine ica kuti alibikile Yosefe mu cifungo. Lelo Yehova alitwalilile ukupaala Yosefe.