Yosefe Bamubika Mu Cifungo

YOSEFE ali fye ne myaka 17 ilyo bamusendele ku Egupti. Ilyo afikile kulya, balimushitishe kuli Potifa. Potifa ali mubomfi wa kwa Farao, imfumu ya Egupti.

Yosefe alebombesha sana mu ng’anda ya kwa shikulu wakwe, Potifa. E ico, ilyo Yosefe akulile, Potifa amupeele umulimo wa kwangalila ing’anda yakwe yonse. Nomba, cinshi Yosefe bamubikile mu cifungo? Ni muka Potifa walengele.

Ilyo aleya alekula, Yosefe alemoneka bwino sana, e ico muka Potifa atendeke ukufwaya ukulaala nankwe. Lelo Yosefe alikeene pantu alishibe ukuti ukucita ifi lubembu. Umukashi wa kwa Potifa alifulilwe sana. E ico ilyo umulume wakwe aile ku ng’anda, muka Potifa abepeshe Yosefe ati: ‘Uyu Yosefe mwaleta muno acifwaya ukulaala na ine!’ Potifa alicetekele ifyalandile umukashi wakwe, kabili alifulilwe sana Yosefe ica kuti amupoosele mu cifungo.

Tapakokwele, umukalamba wa mu cifungo alimwene ukuti Yosefe ali muntu umusuma. E ico amubikile ukuba umukalamba wa bafungwa. Inshita imo Farao alikalipe sana pa fyacitile uwalemupeela ifya kunwa e lyo no walepanga umukate kabili abapoosele mu cifungo. Bushiku bumo aba babili balotele ifiloto ifyo bashaishibe umo fyalolele. Ubushiku bwakonkelepo Yosefe abebele ati: ‘Nondolweleni ifyo mulotele.’ Ilyo bamwebele, Lesa alyafwile Yosefe ukulondolola umwalolele ifiloto balotele.

Yosefe aebele uwalepeela Farao ifya kunwa ati: ‘Pa numa ya nshiku shitatu, ukafuma mu cifungo kabili ukatwalilila ukulapeela imfumu ifya kunwa. Nga wafuma muno mu cifungo, ukanandileko kuli Farao pa kuti na ine nkafume muno.’ Lelo ku walepangila Farao umukate Yosefe atile: ‘Pa numa ya nshiku shitatu, Farao akakuputulako umutwe.’

Ilyo papitile inshiku shitatu, filya fine fye Yosefe alandile, e fyacitike. Farao aputwile umutwe wa walemupangila umukate. Lelo afumishe uwalemupeela ifya kunwa mu cifungo, atendeka no kumubombela na kabili. Lelo uwalepeela Farao ifya kunwa, alilabileko kuli Yosefe! Talandilepo ifili fyonse pali Yosefe ku mfumu Farao, kabili Yosefe atwalilile fye ukuba mu cifungo.