ISAMBILILO 16
Milimo Nshi Ababomfi Batumikila Babomba?
Myanmar
Alelanda ilyashi pa kulongana
Balelanshanya ilyo bashilaya mu kushimikila
Balewamya pa Ng’anda ya Bufumu
Baibolo ilanda pali “bakangalila na babomfi batumikila” ukuti Bena Kristu abapeelwa imilimo mu cilonganino. (Abena Filipi 1:1) Mu filonganino ifingi mulaba baeluda na babomfi batumikila abengi. Milimo nshi ababomfi batumikila babomba?
Balafwilisha baeluda. Ababomfi batumikila balibika sana amano ku kupepa, kabili balicetekelwa pantu balabomba imilimo yonse iyo babapeela. Bamo bakalamba bambi balumendo. Balabomba imilimo yalekanalekana mu cilonganino pa kuti ukulongana kuleenda bwino. Ifyo bacita filenga baeluda ukuba ne nshita iikalamba iya kusambilisha no kucema aba mu cilonganino.
Balabomba imilimo iyacindama. Ababomfi batumikila bamo bapeelwa umulimo wa kusengela abaleisa mu kulongana no kubalanga apa kwikala. Bambi babombela ku fisoselo, bamo e bapeela ifitabo na magazini, bamo nabo babombela ku ndalama sha cilonganino e lyo bambi e bapeela aba mu cilonganino ififulo fya kushimikilamo. Kwaba na babombela ku kuwamya Ing’anda ya Bufumu no kulungisha ifileonaika. Limo baeluda balapeela ababomfi batumikila bamo umulimo wa kusakamana abakote. Pa mulandu wa kuti baliipeelesha ukubomba umulimo onse uo babapeela, aba mu cilonganino balibacindika.—1 Timote 3:13.
Balikwata imibele isuma iya Bwina Kristu. Icilenga aba bamunyinefwe babasale ukuba ababomfi batumikila, mibele ya Bwina Kristu iyo bakwata. Amalyashi balanda pa kulongana e lyo ne filangililo ifyo bacita filakosha icitetekelo cesu. Apo balibika sana amano ku kushimikila, balalenga na ifwe twaba abacincila. Balomfwila baeluda, ne ci cilenga baikatana no kuba ne nsansa. (Abena Efese 4:16) Mu kuya kwa nshita, nabo balaba baeluda.
Londololeni ifyo ababomfi batumikila baba
Milimo nshi babomba iilenga ukulongana kuleenda bwino?