Ababomfi Batumikila Babomba Umulimo Wacindama
1 “Bailangishe abene beka ukuba icine cine abaume baipeela abo icitetekelo casokolokele mu mulimo wapimpa uwa Bufumu na mu kwafwilisha bambi ukukoshiwa mu citetekelo.” Ifyo e fisosa icitabo ca Abateyanishiwa ku Kupwilikisha Ubutumikishi Bwesu, pe bula 57 pa lwa babomfi batumikila. Awe cine, ica kumwenako ca ku mupashi icalangisha ababomfi batumikila besu cawamina ukupashanya. Ukubombela capamo na bo na baeluda “kulengo Mubili ukule no kuikuula mu kutemwa.”—Efes. 4:16.
2 Ababomfi batumikila babomba umulimo wacindama mu cilonganino. Tontonkanyeni pa mulimo wabo onse uwacindama! Balasakamana indalama, ifitabo, bamagazini, ukulembesha, ne fifulo fya kubombelamo; ebaba bakapyunga, ukubombela ku fisoselo, no kwaafwa ukusungilila Ing’anda ya Bufumu iya busaka. Balapeelako amalyashi mu Sukulu lya Butumikishi bwa Teokrasi no Kulongana kwa Mulimo. Bamo balalandako na malyashi ya ku cintubwingi nelyo ukutungulula ukulongana kumo kumo. Ukupala ifilundwa fya mubili, ababomfi batumikila babomba imilimo tukabila.—1 Kor. 12:12-26.
3 Ukumona ukuti ababomfi batumikila babombela capamo na baeluda mu mucinshi ne cumfwano ngo mubili umo cilakoselesha bambi ukucita cimo cine. (Kol. 2:19) Balafwilishako icilonganino ukulunduluka lwa ku mupashi ukupitila mu kubomba mu kusakamanishisha imilimo yabo cila mulungu no kufwaisha ukwishiba pa lwa bambi.
4 Cinshi twingacita ku kulanga ukuti tulatasha pa babomfi batumikila ababombesha? Tulekabila ukubeleshanya ne milimo babomba no kuiteyanya ukwikatana na bo lintu balekabila tubafwilishe. Kuti twabeba ukuti tulatasha pa milimo yabo, e lyo natulange na ku fyo tucita ukuti tulatasha. (Amapi. 15:23) Abo bacucutika pa kuti tumwenemo balinga ukutasha mu kufumaluka.—1 Tes. 5:12, 13.
5 Icebo ca kwa Lesa e catantika imilimo ya babomfi batumikila ne milingo. (1 Tim. 3:8-10, 12, 13) Umulimo wabo uwashila, uwacindama ulakabilwa icibi pa kuti icilonganino cibombe bwino. Aba baume bawamina ukukoselesha lyonse, apantu bonse “[balapikintika] pe mu mulimo wa kwa Shikulu.”—1 Kor. 15:58.