ISAMBILILO 17

Bushe Bakangalila Bamiputule Batwafwa Shani?

Kangalila wa muputule no mwina mwakwe — Malawi

Kangalila wa muputule aletungulula ukukumana kwa kuya mu mulimo wa mwi bala — Alelanshanya na balaya mu kushimikila

Kangalila wa muputule alebomba umulimo wa kushimikila abantu ku cintubwingi — Aleshimikila

Kangalila wa muputule alekumana na baeluda — Alelanshanya na baeluda

Amalembo ya Bwina Kristu aya ciGriki yalilandapo imiku iingi pali Barnaba no mutumwa Paulo, abali bakangalila benda abaletandalila ifilonganino fya Bena Kristu ba kubalilapo. Mulandu nshi baletandalila ifilonganino? Balefwaisha ukulakoselesha Abena Kristu banabo. Paulo atile, alefwaya ‘ukubwelelamo, no kuyapempula aba bwananyina’ pa kuti eshibe ifyo bali. Aliipeeleshe ukwenda amakilomita ayengi ku kuyabakoselesha. (Imilimo 15:36) E fyo na bakangalila bamuputule pali ino nshita bacita.

Besa mu kutukoselesha. Kangalila wa muputule alatandalila ifilonganino 20 no kucilapo. Atandalila cila cilonganino imiku ibili mu mwaka kabili abombela pamo ne cilonganino umulungu umo. Kuti twasambililako ifingi kuli aba bamunyinefwe kumo na bena mwabo, nga balyupa. Balafwaisha ukwishiba bamunyinabo bonse, nampo nga baice nelyo bakalamba, kabili balaya na babwananyina mu kushimikila na mu kutungulula amasambililo ya Baibolo. Aba bakangalila balaya na baeluda mu kucema aba mu cilonganino, kabili balalanda amalyashi ku cilonganino na pa kulongana kukalamba ayatukoselesha.—Imilimo 15:35.

Balabika amano kuli bonse. Bakangalila bamuputule balabika sana amano kuli bukapepa bwa ba mu cilonganino. Balakumana na baeluda na babomfi batumikila no kulanshanya nabo pa kuti beshibe nga balibombelapo pa fyo balanshenyepo e lyo kabili balabapandako amano pa fya kubomba imilimo mu cilonganino. Balafwa bapainiya ukulabomba bwino umulimo wabo, kabili balomfwa bwino ukwishiba abatendeke nomba line ukulongana no kumfwa ifyo balelunduluka. Bakangalila benda balaipeelesha ‘ukuba na ifwe mu kutubombela.’ (2 Abena Korinti 8:23) Tufwile ukupashanya icitetekelo cabo no kuipeelesha kwabo.—AbaHebere 13:7.

Cinshi bakangalila bamuputule batandalila ifilonganino?
Bushe kuti mwanonkelamo shani nga ca kuti kangalila wa muputule atandalila icilonganino?