Ifyo Bakangalila Benda Babomba nga Abalashi ba Cishinka

“Mulepyungilana, umuntu onse ifyo apokelele ica bupe, nga [balashi ba pa ŋanda, NW] basuma ba fya kusenamina fya misango misango ifya kwa Lesa.”—1 PETRO 4:10.

1, 2. (a) Ni shani fintu mwingalondolola ishiwi “umulashi wa pa ŋanda”? (b) Ni bani basanshiwamo pa balashi ba pa ŋanda ababomfiwa na Lesa?

YEHOVA abomfya Abena Kristu ba busumino bonse kwati balashi ba pa ŋanda. Umulashi wa pa ŋanda kuti na kabili aasakamana imibombele ya ba mu ŋanda. Kuti na kabili aasakamana imibombele ya bukwebo iya kwa shikulu wakwe. (Luka 16:1-3; Abena Galatia 4:1, 2) Yesu ainike ibumba lyakwe ilya basubwa aba busumino pe sonde ukuti ‘umulashi wa pa ŋanda uwa cishinka.’ Kuli uyu mulashi wa pa ŋanda e ko aseekesha “ifyuma fyakwe fyonse,” ukusanshako ne mibombele ya kushimikilo Bufumu.—Luka 12:42-44; Mateo 24:14, 45.

² Umutumwa Petro atile Abena Kristu bonse baba balashi ba fya kusenamina fya kwa Lesa ifya misango misango. Umwina Kristu umo na umo alikwate cifulo apo engabombela ubulashi bwakwe ubwa pa ŋanda mu busumino. (1 Petro 4:10) Baeluda basontwa aba Bwina Kristu baba balashi, kabili pa kati kabo paba bakangalila benda. (Tito 1:7) Ni shani fintu aba baeluda benda balingile ukumonwa? Mibele nshi na mabuyo ifyo balingile ukukwata? Kabili ni shani fintu bengabomba bwino mu kufishapo?

Ukutootela pa Mulimo Wabo

3. Mulandu nshi bakangalila benda bengenikilwa ukuti “balashi ba pa ŋanda abasuma”?

³ Abaupana ba Bwina Kristu ilyo balelembela kangalila wenda no mukashi wakwe, batile: “Tulefwaya ukulumbulula ukutasha kwesu pa nshita no kutemwa fintu mwaatupeela. Pamo ngo lupwa, twalimwenamo nga nshi mu kukoselesha no kupanda amano kwenu. Twalishibo kuti tulingile ukulakula lwa ku mupashi, lelo mu kuba no kwaafwa kwa kwa Yehova no kwa bamunyina na bankashi abapala imwe, ukukalipwa ukuleya kulekulilako kulabako eyefilya.” Ukulumbulula kwa musango yu kulomfwika libili libili pantu bakangalila benda balasekelela mu basumina banabo, pamo fye nga fintu umulashi musuma uwa pa ŋanda asakamana ifyo aba mu ŋanda balekabila. Bamo ni bakalanda basuma. Abengi balipulamo mu mulimo wa kushimikila, ilintu bambi baishibikilwa ku cikabilila bakwata ne cililishi. Ukupitila mu kulundulula no kubomfya ifya bupe fya musango yo mu kupyungila bambi, bakangalila benda mu kulungika kuti baitwa “abalashi ba pa ŋanda abasuma.”

4. Cipusho nshi nomba icalalangulukwapo?

⁴ “Icafwaikwa [mu balashi, NW], ca kuti umuntu abe uwa cishinka,” e fyalembele umutumwa Paulo. (1 Abena Korinti 4:2) Ukupyungila Abena Kristu banabo mu cilonganino capusanako umulungu no mulungu lishuko lyaibela kabili ilileto kusekelela. Nangu ni fyo, caba na kabili cishingamo cafina. Ni shani, kanshi, fintu bakangalila benda bengabomba ubulashi bwa pa ŋanda muli bucishinka na mu kutunguluka?

Ukubomba Ubulashi bwa pa Ŋanda Mu Kutunguluka

5, 6. Mulandu nshi ukushintilila kwabamo ipepo pali Yehova kwacindamina mu bumi bwa kwa kangalila wenda?

⁵ Ukushintilila kwabamo ipepo pali Yehova kwalikatama nga bakangalila benda bali no kuba abalashi abatunguluka. Pa mulandu wa fintu ubwingi ifitantikwa no kufula kwa fishingamo, limo limo kuti bayumfwa abafinininwa. (Linganyeniko 2 Abena Korinti 5:4.) E co bakabila ukubomba mu kumfwana no lwimbo lwa kwa kemba wa malumbo Davidi ulwa kuti: “Poosa pali Yehova icisendo cobe icafina, wene alekulama; pe fye takasuminishe uwalungama ukutelententa.” (Ilumbo 55:22) Amashiwi ya kwa Davidi na yambi ayasansamusha, ni aya aya kuti: “Abe uwacindikwa Shikulu, . . . ubushiku no bushiku [uutusenda].”—Ilumbo 68:19.

⁶ Ni kwi kuntu Paulo afumishe ubukose bwa kubombela ifishingamo fyakwe ifya ku mupashi? “Ndi na maka aya kucite fintu fyonse mu ulenkoselesha,” e fyo alembele. (Abena Filipi 4:13) Ee, ni kuli Yehova Lesa e Kwalefuma ubukose bwa kwa Paulo. Mu kupalako, Petro apandile amano ati: “Ngo muntu apyunga, apyunge ngo upyungila ku maka ayo Lesa apeela, ukuti muli fyonse Lesa acindamikilwe muli Yesu Kristu.” (1 Petro 4:11) Munyina umo uwali kangalila wenda pa myake ingi akomaile pa kukabila kwa kushintilila pali Lesa, ukulondololo kuti: “Lyonse mulesubila muli Yehova mu kubomba pa mafya, no kufwaya ukwaafwa kwa kuteyanya kwakwe.”

7. Ni shani fintu ukushikatala kwafwilishako mu mibombele ya kwa kangalila wenda?

⁷ Ukushikatala kulakabilwa ku kutunguluka kwa kwa kangalila wenda. Ukupala Abena Kristu bambi, alatukuta ‘ukusuminisha ifyacilamo.’ (Abena Filipi 1:10)a Lintu baeluda ba pa cilonganino balefwaya ukwipusha pa mulandu umo, cilawama ukwipushako kangalila wa muputule uuletandala. (Amapinda 11:14; 15:22) Mu kupalishako, imimwene yakwe iyashikatala no kufunda kwa mu Malembo fikaba ifya kwaafwa nga nshi ilyo baeluda baletwalilila ukubomba pali uyo mulandu pa numa abe naya ukufuma pa cilonganino. Mwi tontonkanyo lyapalako, Paulo aebele Timote ati: “Ifintu ifyo waumfwile kuli ine mu nte ishingi, ufipeele ku bantu ba cishinka abengasambilisha na bambi.”—2 Timote 2:2.

8. Mulandu nshi isambililo lya Baibolo, ukusapika, no kwetetula fyakatamina?

⁸ Isambililo lya mu Malembo, ukusapika, no kwetetula filafwaikwa pa kupeela ukufunda ukusuma. (Amapinda 15:28) Kangalila wa citungu umo atile: “Lintu tulekumana na baeluda, tatulingile ukumfwo mwenso ukusumino kuti tatwishibe casuko ku cipusho cimo.” Ukuibikilishako pa kuti twingakwata ‘umuntontonkanya wa kwa Kristu’ pa mulandu umo e kulenga ukuti tupeele ukufunda kwashimpwa pali Baibolo ukukaafwa bambi ukubomba mu kumfwana no kufwaya kwa kwa Lesa. (1 Abena Korinti 2:16) Limo limo kangalila wenda alakabila ukulembela ku Watch Tower Society ukufwayo butungulushi. Kwena, icitetekelo muli Yehova no kutemwa icine e fyacindama ukucila ukulumbuka nelyo ukulongoloka kwa kulanda. Mu cifulo ca kwisa no “kupulama kwa cebo nangu ukwa mano,” Paulo atendeke ubutumikishi bwakwe mu Korinti “mu kunaka na mu mwenso na mu kututuma ukwingi.” Bushe ici camulengele ukukanaba uufumamo cimo? Nakalya, cayafwile abena Korinti ukuti icitetekelo cabo “ciiba mu mano ya buntunse, kano mu maka ya kwa Lesa.”—1 Abena Korinti 2:1-5.

Imibele Imbi Iyakatama

9. Mulandu nshi uo icililishi cabele cakabilwa kuli baeluda abenda?

⁹ Icililishi caafwa bakangalila benda ukuletako ifisuma. Petro acincishe Abena Kristu bonse ukulanga ‘ukulangulukilana,’ nelyo “ukuba abalangulukilako.” (1 Petro 3:8, NW utulembo twa mwi samba) Kangalila wa muputule umo alayumfwa ukukabila kwa ‘kusekelela mu uli onse mu cilonganino no kumusakamana mu cine cine.’ Mu mupashi wapalako, Paulo alembele ati: “Sekeleleni pamo na basekelela; lileni pamo na balila.” (Abena Roma 12:15) Imibele ya musango yo ilasesha bakangalila benda ukulabombesha mu kucincila ku kumfwikisha amafya ne mibele ya basumina banabo. Lyene kuti bapeela ukufunda kwa mu Malembo ukwa kukuulilila ukwingaletako ubusuma bwine bwine nga kwabomfiwa. Kangalila wa muputule umo uwapulamo mu kulange cililishi apokelele uno kalata ukufuma ku cilonganino cimo mupepi na Turin, Italy uwaleti: “Nga ulafwaya ukusekelelwa, sekelela muli bambi; nga ufwayo kutemuna bambi, ba uwa kutemuna; nga ufwayo kutemwikwa, ba uwingatemwikwa; nga ufwayo kwafwiwa, iteyanye ukwaafwa. Ici e co twasambilila ukufuma kuli imwe!”

10. Bakangalila ba miputule na ba fitungu baalandapo shani pa lwa kuicefya, kabili ca kumwenako nshi Yesu aimike muli uyu mulandu?

¹⁰ Ukuba uwaicefya kabili uutununukwa kulaafwa bakangalila benda ukucito busuma ubwingi. Kangalila wa muputule umo alandilepo ati: “Calicindama sana ukusungilila imibele ya kuicefya.” Alasoka bakangalila benda abapya ukuti: “Mwilasongwa mu kukanalinga na bamunyina abasambashi pa mulandu wa fintu bengamucitila, nelyo ukupanga fye icibusa na ba musango yo fye epela, lelo ukulatukuta lyonse ukubomba na bambi ukwabula akapaatulula.” (2 Imilandu 19:6, 7) Kabili kangalila waicefya mu cine cine takalekukumya fintu amona ukucindama kwakwe ngo mwiminishi wa Sosaite. Kangalila wa citungu umo mu kulinga alandilepo ati: “Beni abaicefya no kuitemenwa ukukutika kuli bamunyina. Lyonse muleba abengatununukwa.” Apantu aali muntu wakulisha uwabalile abako uwa mweo, Yesu Kristu nga alilengele abantu ukuyumfwa ababipilwa, lelo aali uwaicefya nga nshi kabili uwingatununukwa ica kuti fye na bana banono bayumfwile abayangukililwa ukuba nankwe. (Mateo 18:5; Marko 10:13-16) Bakangalila benda bafwaya abana banono, abapungwe, abakoloci—kuti twati fye uuli onse e lyo na bonse mu cilonganino—ukuyumfwa abakakuka ukubatununuka.

11. Lintu ukulombo kweleelwa kwakabilwa, ni shani fintu kwingambukila pali bambi?

¹¹ Kwena, “ifwe bonse tuipununa apengi,” kabili takwaba kangalila wenda uwalubukako ku kucite filubo. (Yakobo 3:2) Lintu bakangalila benda bacite cilubo, ukulombo kweleelwa ukwafumaluka kulapeela baeluda ica kumwenako ica kuicefya. Ukulingana na Amapinda 22:4, “icilambu ca kufuuka na katiina ka kuli Yehova, bucindami no bukata no mweo.” Kabili ababomfi ba kwa Lesa bonse bushe tabakabila ‘ukuba abaicefya mu kwenda na Lesa wabo’? (Mika 6:8, NW Ukulembwa kwa 1960) Lintu kangalila wa muputule aipushiwe ukupanda amano kuntu engapeela eluda wenda umupya, alandilepo kuti: “Ulecindikisha bamunyina bonse, no kubamona nga abawamako ukukucila. Ukasambilile fingi ukufuma kuli bamunyina. Twalilila ukuba uwaicefya. Uleba fye fintu waba. Wilaituntumba.”—Abena Filipi 2:3.

12. Mulandu nshi ukupimpila ubutumikishi bwa Bwina Kristu kwakatamina?

¹² Ukupimpila ubutumikishi bwa Bwina Kristu kulakatamika cintu kangalila wenda engalanda. Na kuba, lintu wene no mukashi wakwe baimika ifya kumwenako fyapimpa mu mulimo wa kubile mbila nsuma, baeluda, abakashi babo, na bashala mu cilonganino balakoseleshiwa ukulanga ukupimpa mu butumikishi bwabo. “Beni abapimpa mu mulimo,” e fyacincishe kangalila wa muputule umo. Alundileko kuti: “Nalisango kuti, ilingi line, ilyo icilonganino cicililako ukupimpa mu butumikishi, e lyo na mafya yacepako yantu cikumanya.” Kangalila wa muputule umbi alandilepo ati: “Nalisumino kuti nga baeluda balebomba na bamunyina na bankashi no kubaafwa ukuipakisha ubutumikishi, ici cikafumamo umutende wa muntontonkanya no kwikushiwa kwakulisha mu kubombela Yehova.” Umutumwa Paulo ‘apamine ku kulanda imbila nsuma ya kwa Lesa ku bena Tesalonika mu kupilikita ukwingi.’ E mulandu wine baleibukishisha ukutandala ne mibombele yakwe iya kushimikila mu kuba ne citemwishi no kufuluko kumumona na kabili!—1 Abena Tesalonika 2:1, 2; 3:6.

13. Cinshi cintu kangalila wenda ebukisha lintu alebomba na Bena Kristu banankwe mu mulimo wa mwi bala?

¹³ Lintu alebomba na Bena Kristu banankwe mu butumikishi bwa mwi bala, kangalila wenda alalanguluka pa mibele yabo no kupelebela kwabo. Nangu cingatila imitubululo yakwe kuti pambi yabe ya kwaafwa, aleshibo kuti bamo limbi balaba no mwenso lintu baleshimikila na eluda wabelesha. Mu milandu imo imo, kanshi, ukukoselesha pambi e kwingacilapo kuwama ukucila ukufunda. Lintu ashindika bakasabankanya nelyo bapainiya kwi sambililo lya Baibolo, kuti limbi batemwo kuti e o atungulule. Ici mu kupalako cili no kubalenga babeleshanye ne nshila sha kuwamishamo imisambilishishe yabo.

14. Mulandu nshi cingasoselwe fyo bakangalila benda abapimpa balabalamuna ukupimpa muli bambi?

¹⁴ Bakangalila benda abapimpa balabalamuna ukupimpa muli bambi. Kangalila wa muputule umo mu Uganda apitile mu mpanga yasapa pe awala limo pa kushindika munyina kwi sambililo lya Baibolo ilishalelunduluka sana. Ilyo baleya yalilokele sana ica kuti ilyo bafikile ninshi nababombe cipesha mano. Lintu ulu lupwa lwa bantu 6 baishibe ukuti uyu mutandashi wabo aali ni kangalila wenda, balitemenwe nga nshi. Baishibe ukuti baminista ba kwi calici lyabo tabengalangisha ubuseko bwa musango ulya mu mukuni. Ubushiku bwa pa Mulungu ubwakonkelepo, balisangilwe ku kulongana pa muku wa kubalilapo kabili balumbulwile ukufwaisha kwa kuti bengaba Inte sha kwa Yehova.

15. Ca kukumanya nshi cishaiwamina ico kangalila wa muputule uwapimpa aipakishe mu Mexico?

¹⁵ Mu citungu ca mu Mexico ica Oaxaca, kangalila wa muputule umo aibikilisheko mu nshila intu abantu bashaenekele. Apekenye ukuyaikala mu cifungo pa nshiku shine pa kuti engatandalila abafungwa 7 abasangwike bakasabankanya ba Bufumu. Pa nshiku shafulilako aleshindika aba bafungwa ilyo balecitilo bunte ku kalokoni na kalokoni no kutungulula amasambililo ya Baibolo. Pa mulandu wa buseko bwaleba pali aya masambililo, yamo yaletwalilila ukufika fye no bushiku. “Pa numa ya kutandala, ine na bafungwa twayumfwile abaisulamo ukusekelela pa mulandu wa kukoseleshanya ukwafuminemo,” e fyalemba uyu kangalila wa muputule uwapimpa.

16. Mulandu nshi cibela ica kunonsha lintu bakangalila benda na bakashi babo bapeela ukukoselesha?

¹⁶ Bakangalila benda besha ukuba aba kukoselesha. Lintu Paulo atandalile ifilonganino mu Makedonia, ‘abakoseleshe ku fyebo ifingi.’ (Imilimo 20:1, 2) Ifyebo fya kukoselesha kuti fyayafwa sana ukulosha abanono na bakalamba ku mabuyo ya ku mupashi. Pe ofesi limo ilikalamba ilya Watch Tower Society, ukufwailisha kwa munsaunte fye kwasokolwele ukuti bakangalila ba miputule e bakoseleshe mupepi na maperesenti 20 aba muli bakabomba ba kuitemenwa ukuti bengile mu mulimo wa nshita yonse. Umukashi wa kwa kangalila wa muputule na o, ku ca kumwenako cakwe icishaiwamina nga kabilisha wa Bufumu wa nshita yonse aba ni ntulo ya kukoselesha apakalamba.

17. Ni shani fintu kangalila wa muputule umo umukoloci ayumfwa pa lwe shuko akwata ilya kwaafwako bambi?

¹⁷ Abacikalamba na bapopomenwa e bakabila sana ukukoseleshiwa. Kangalila wa muputule umo umukoloci alemba ati: “Ulubali lwa mulimo wandi ululetako ukusekelela kwa lwa nkati ukushingalondololwa lwaba lishuko lya kwafwilishako abaleko kubomba na banakuka lwa ku mubili pa kati ka mukuni wa kwa Lesa. Amashiwi yaba pa Abena Roma 1:11, 12 yaliba no bupilibulo bwaibela kuli ine, pantu ndasangamo ukukoselesha kushaikulila no bukose lintu ‘ndepeela aba musango yo ica bupe ca ku mupashi ku kubekasha.’”

Ifilambu fya Mulimo Wabo uwa Kusekelela

18. Mabuyo nshi aya mu Malembo ayo bakangalila benda bakwata?

¹⁸ Bakangalila benda balisekelela mu kufumaluka mu basumina banabo. Bafwaya ukukosha ifilonganino no kufikuula lwa ku mupashi. (Imilimo 15:41) Kangalila wenda umo alabombesha “ku kupeela ukukoselesha, ukupayanya ukupembesula, no kulundulula ukufwaisha kwa kufishapo ubutumikishi no kutwalilila ukwikala ukulingana ne cine.” (3 Yohane 3) Umbi na o afwaya ukushikatalika abasumina banankwe mu citetekelo. (Abena Kolose 2:6, 7) Ibukisheni ukuti kangalila wenda aba ‘munensu wine wine uwa mwi koli,’ te cibinda pa citetekelo ca bambi. (Abena Filipi 4:3; 2 Abena Korinti 1:24) Ukutandala kwakwe kaba kashita ka kukoselesha ne mibombele yalundwako, pamo pene ne shuko lya mu nshita kwi bumba lya baeluda ukupituluka mu kulunduluka kucitilwe no kulanguluka amabuyo ya ku ntanshi. Ku mashiwi na ku ca kumwenako cakwe, bakasabankanya ba pa cilonganino, bapainiya, ababomfi batumikila, na baeluda kuti basubila ukukuulwa no kubimbulwa ku mulimo ubalaalilile. (Linganyeniko 1 Abena Tesalonika 5:11.) E co, kanshi, tungilileni ukutandala kwa kwa kangalila wa muputule no mutima onse, no kushukila umulimo uubombwa na kangalila wa citungu.

19, 20. Ni shani fintu bakangalila benda na bakashi babo baalambulwa pa mulimo wabo uwa busumino?

¹⁹ Bakangalila benda na bakashi babo balalambulwa apakalamba ku mulimo wabo uwa busumino, kabili kuti bacetekela ukuti Yehova akabapaala ku busuma buntu bacita. (Amapinda 19:17; Abena Efese 6:8) Georg na Magdalena bakoloci abaupana ababombele umulimo wa kwenda pa myake ingi. Pe bungano mu Luxembourg, Magdalena atununwikwe no muntu uo acitileko ubunte ukucila pa myaka 20 iyafumineko. Ukusekelela mu cine ukwa uyu mwanakashi wa ciYuda kwabimbwilwe ku fitabo fyalelanda pali Baibolo ifyo Magdalena amushiilile, kabili mu kupita kwa nshita alibatishiwe. Georg atununwikwe kuli nkashi umo uwa ku mupashi, uwaibukishe ukutandala kwa kwa Georg ku ŋanda yakwe mupepi ne myaka 40 iyapitapo. Inshila yakwe iyacincimuka iya kupeelelamo imbila nsuma kwi pele pele yalengele ukuti wene no mulume wakwe bapokelele icine. Kwena, bonse babili Georg na Magdalena balisekelele nga nshi.

²⁰ Ubutumikishi bwa kufumamo cimo ubwa kwa Paulo mu Efese bwamuleteele ukusekelela kabili bufwile e bwamuseseshe ukwambula amashiwi ya kwa Yesu aya kuti: “Ukupeela ce shuko ukucilo kupokelela.” (Imilimo 20:35) Apantu umulimo wa kwenda usanshamo ukupeela kwa lyonse, abo baibimba muli wene balakumanya insansa, maka maka lintu baishibo kuti mu kucucutika kwabo namufuma ubusuma. Kangalila wa muputule umo uwayafwilishe eluda wafuupwilwe aebelwe muli kalata ukuti: “Mwaba ‘icisansamushi’ cikalamba mu bumi bwandi ubwa ku mupashi—ukucila fintu mwaishiba. . . . Tamwakatale amufishapo kwishiba ifyo mwaba ica kwaafwa kuli Asafi wa muno nshiku, uo ‘amolu yakwe yali mupepi no kutela.’”—Abena Kolose 4:11; Ilumbo 73:2.

21. Mulandu nshi mwingasosele fyo 1 Abena Korinti 15:58 alosha ku mibombele ya bakangalila benda?

²¹ Umwina Kristu mukoloci uwali mu mulimo wa muputule pa myake ingi alitemwa ukutontonkanya pali 1 Abena Korinti 15:58, apo Paulo acincishe ukuti: “Beni abashangila, abashitelententa; ukupikintika pe mu mulimo wa kwa Shikulu, pa kwishibo kuti ukucucutika kwenu te kwa fye muli Shikulu.” Bakangalila benda mu kushininkisha baliba abapikintika mu mulimo wa kwa Shikulu. Kabili fintu twaba aba kutootela ukuti babomba no kusekelela nga balashi ba mu ŋanda aba cishinka aba fya kusenamina fya kwa Yehova!

[Futunoti]

Ni Shani Fintu Mwingaasuka?

Mulandu nshi bakangalila benda bengamwenwa nga “balashi ba pa ŋanda basuma”?

Fintu nshi fimo fimo ifyaafwako bakangalila ba miputule na ba fitungu ukucito busuma ubwingi?

Mulandu nshi ukuicefya no kupimpa fyacindamina kuli abo baibimba mu mulimo wa kwenda?

Mabuyo nshi yashaiwamina yantu bakangalila benda bakwata?

[Icikope pe bula 16]

Bakangalila benda bafwaisha ukukoselesha abasumina banabo

[Ifikope pe bula 17]

Abanono pamo pene na bakalamba kuti bamwenamo mu kubishanya na bakangalila benda na bakashi babo

[Icikope pe bula 18]

Ubutumikishi bwapimpa ubwa kwa kangalila wenda bulalundulula ukupimpa muli bambi