Twafwa Shani Bamunyinefwe nga Kwaba Akayofi

Nga kwaba akayofi, Inte sha kwa Yehova balatendeka ukwafwa bamunyinabo abali na mafya ilyo line fye. Ukucita ifyo, kulanga ukuti twalitemwana ukufuma pa nshi ya mutima. (Yohane 13:34, 35; 1 Yohane 3:17, 18) Twafwa shani bamunyinefwe?

Tulasangula indalama. Ilyo kwali icipowe icikalamba mu Yudea, Abena Kristu ba kubalilapo mu Antioke balitumine indalama sha kwafwilisha bamunyinabo. (Imilimo 11:27-30) Na ifwe nga twaumfwa ukuti bamunyinefwe mu fyalo fimo bali na mafya, tulatuma indalama ukupitila mu filonganino twabamo isha kushitamo ifyo balekabila.—2 Abena Korinti 8:13-15.

Tulapeela bamunyinefwe ifyo balekabila. Baeluda abasangwa ukwacitika akayofi, balafwailisha ukuli aba mu cilonganino bonse pa kuti bashininkishe ukuti bonse e po bali, no kuti bali fye bwino. Komiti isakamana abali na mafya ilabombela pamo na bamunyinefwe bambi pa kuti bafwaile abaponenwe akayofi ifya kulya, amenshi ya kunwa ayasuma, ifya kufwala, no mwa kwikala, na pa kuti bondapwe. Ba Nte abengi abaishiba imilimo imo iikabilwa nga kwaba akayofi, balabomfya indalama shabo no kuya ukuli akayofi mu kuwamya amayanda ya bantu ayonaike e lyo na Mayanda ya Bufumu. Ukubombela pamo kulenga twaikatana no kwishibilako ifya kucita nga kwaba akayofi na kabili. Ici e cilenga tuleangufyanya ukwafwa bamunyinefwe ukuli konse ukwaba ubwafya. Nangu ca kutila twafwa ‘abatetekela banensu,’ na balya abo tushipepa nabo tulabafwa nga cili mu maka yesu.—Abena Galatia 6:10.

Tulabasansamusha ukubomfya Amalembo. Abaponenwa akayofi balafwaya sana icisansamushi. Ilyo kwaba aya mafya, Yehova, “Lesa wa cisansamushi conse” alatukosha. (2 Abena Korinti 1:3, 4) Tulomfwa bwino ukwebako abali na mafya pa malayo ya mu Baibolo ayalanda ukuti Ubufumu bwa kwa Lesa bukapwisha amalanda yonse ayalenga tulecula no kukalipwa.—Ukusokolola 21:4.

• Cinshi cilenga ba Nte ukwafwa abanabo mu kwangufyanya ilyo kwaba akayofi?

• Finshi Baibolo yalandapo ifyo twingebako abaponenwe akayofi pa kubasansamusha?