Umukululo wa Fipusho

◼ Cinshi cilingile ukucitwa lintu ubusanso ubo bwapama bamunyina mu kulungatika bwacitika?

Nga ca Kuti Ubusanso Bwacitika mu Ncende Yenu: Mwisuswa. Tekeni umutima, kabili angweni ifili ifyacindama mu cine cine—ubumi, te fikwatwa. Sakamaneni ifya ku mubili ifyo ulupwa lulekabila ilyo line. Lyene ebeni baeluda pa lwa cacitika na kuntu muli pali iyo nshita. Baeluda na babomfi batumikila balabomba umulimo wakatama mu kupayanya ukwafwilisha kwa kukumbusuka. Nga ca kuti ukusoka pa lwa busanso nakubilishiwa libela, nga fintu ciba mu fikuuku fimbi ifikalamba, aba bamunyina balingile ukushininkisha ukuti onse ali mu cifulo cacingililwa, kabili nga kuli inshita, balingile ukufwaya ifya kukumbusuka fingakabilwa no kufyakanya.

Pa numa ya ico, bakatungulula ba masambililo ya citabo balingile ukusanga ulupwa lumo lumo no kwipusha fintu bali. Kangalila wa kutangilila nelyo eluda umbi alingile ukwebwa pa lwa fintu ulupwa lumo lumo luli, nangu cingati fyonse fili fye bwino. Nga ca kuti umo nacenwa, baeluda bakesha ukumutantikila ukundapa kwa mu cipatala. Na kabili bakapayanya ifili fyonse ifya ku mubili pamo nga ifya kulya, ifya kufwala, iŋanda, nelyo ifintu fimbi ifya mu ŋanda ifilekabilwa. (Yoh. 13:35; Gal. 6:10) Baeluda ba mu cifulo ico bakafwilisha icilonganino lwa ku mupashi na lwa mu nkuntu kabili bakatantika ukutendeka ukulongana kwa cilonganino mu kwangufyanya ukufika apo bengapesha. Pa numa ukupimununa kwafikapo kwacitwa, eluda umo, ukwimininako ibumba lya baeluda alingile ukweba kangalila wa muputule pa lwa kucenwa ukuli konse, ukonaulwa kwa Ŋanda ya Bufumu, nelyo ukonaulwa kwa mayanda ya bamunyina, pamo pene no kukabila ukuli konse ukwaibela. Kangalila wa muputule lyene akatuma lamya kwi ofesi lya musambo capamo na lipoti wa cacitike. Iofesi lya musambo likampanya ifya kukumbusuka fikalamba ifilekabilwa ifili fyonse.

Nga ca Kuti Ubusanso Bwapama mu Cifulo Cimbi: Ibukisheni abo bamunyina na bankashi mu mapepo. (2 Kor. 1:8-11) Nga ca kuti mulefwaya ukubafwilisha ne ndalama, kuti mwatuma ubupe bwenu ku Sosaite, uko indalama sha kukumbusuka shisungilwa iyi mifwaile. Akeyala ni aka: Watchtower, Box 33459, Lusaka 10101. (Imil. 2:44, 45; 1 Kor. 16:1-3; 2 Kor. 9:5-7; moneni Ulupungu lwa kwa Kalinda ulwa December 1, 1985, amabula 20-2.) Mwituma ifipe nelyo ifya kukumbusuka ku cifulo ca busanso kano fye nga bamunyina bashingemwe bamweba mu kulungatika ukucita ifyo. Ici cikashininkisha ukuti kwabako ukubombesha kwa kukumbusuka ukwabamo umuyano no kwakanya ifipe ukwalinga. (1 Kor. 14:40) Twapaapaata mwitumina lamya ku Sosaite icitumetume, apantu ici kuti cacilikila balamya baletumwa ukufuma ku cifulo ca busanso.

Pa numa kwaba ukupimununa kwalinga, Sosaite ikapingulapo nga ca kuti komiti wa kukumbusuka alingile ukupangwa. Bamunyina babimbilwemo bakebwa. Bonse balingile ukubombela pamo na baeluda abaletungulula pa kuti ukukabila kwakakala ukwa bamunyina bonse kwabombelwapo mu kulinga.—Moneni Jehovah’s Witnesses—Proclaimers of God’s Kingdom, amabula 310-15.