Bushe Mwali-ipekanya ku Cinkunka?
1. Mulandu nshi cabela bwino ukuipekanishisha kabela ku finkunka?
1 Cila mwaka, abantu abengi mwi sonde lyonse, pamo na bamunyinefwe na bankashi shesu, balaponenwa ne finkukuma, icilala, ne lyeshi. Ifinkunka ficitika ukwabula ukuti abantu beshibile libela kabili kuti fyacitikila uuli onse, kanshi caliba bwino ukuipekanishisha kabela.—Amapi. 21:5.
2. Mulandu nshi tulingile ukupeela baeluda adresi yesu iya nomba line ne nambala ya foni?
2 Ukupekanishisha Kabela: Inshita shimo abapima inshita icinkunka calacitika balasokela limo ukuti kwalacitika fimo. Calicindama ukubikako amano ku kusoka kwa musango yo. (Amapi. 22:3) Nga cabe fyo baeluda bakesha na maka ukumona bonse ababa mu cilonganino ukubafwa ukupekanishisha kabela. Icinkunka nga cacitika, baeluda na kabili bakabombesha ukumona bonse ababa mu cilonganino ukumona nga bali bwino no kwishiba nga kuti bakabila ukubafwako tumo. Baeluda kuti bapoosa inshita iikalamba ukufwaya bamunyinefwe nga ca kuti tabakwete amaadresi aya nomba line aya bakasabankanya bonse. E ico cisuma bakasabankanya ukulapeela kalemba na kangalila wabo uwe sambililo lya citabo adresi ya nomba line ne nambala ya foni.
3. Bushe kuti twabombela shani pamo na baeluda nga ca kuti twikala mu ncende umucitika sana ifinkunka?
3 Nga ca kutila icilonganino caba ku ncende ukucitika sana ifinkunka, baeluda kuti baipusha bakasabankanya ukubapeela ishina ne nambala ya foni iya kwa lupwa umo nelyo cibusa wabo uushikala kuli ico cifulo kabili uo bengeba nga kwacitika fimo ifyabula ukwenekela. Ici cikaafwa baeluda ukusanga bwangu abafulumwike ku ncende ukwalacitika icinkunka. Baeluda na kabili kuti bafwaya ukupekanya ifyo bakacita nge cilonganino conse nga kwapona icinkunka. Fimo ifyo bengacita kulembela limo umutande wa tuntu tumo uto abalefuma kuli iyo ncende bakakabila. Kuti bapekanya ifyo bakalakuka ukuya ku cifulo cimbi e lyo ne nshila bakafwilamo abashingakwata amaka ya kwenda. Caliwama ukukonka uku kutantika kusuma ukwa baeluda.—Heb. 13:17.
4. Bushe finshi twingacita nga ca kuti ku ncende twikala kwacitika icinkunka?
4 Pa Numa ya Cinkunka: Bushe finshi mwingacita nga ca kuti icinkunka cacitika uko mwikala? Shininkisheni ukuti ifilekabila ulupwa lwenu epo fili. Nga kuti mwakumanisha, afweniko na bambi abalekabila. Esheni na maka ukumona kangalila wenu uwe sambililo lya citabo nelyo eluda umbi bwangu bwangu. Mulingile ukucite ci nangu ca kutila muli fye bwino kabili tamulekabila no bwafwilisho. Nga mulekabila ubwafwilisho, ishibeni ukuti bamunyinenwe balebombesha ukufwaya inshila bengamwafwilamo. (1 Kor. 13:4, 7) Ibukisheni ukuti Yehova naishiba ifyo muli; mucetekeleni ukuti alamwafwa. (Amalu. 37:39; 62:8) Ipekanyeni inshita yonse ukwafwa bambi lwa ku mupashi e lyo no kubasansamusha. (2 Kor. 1:3, 4) Tendekeni ukukonka na kabili programu yenu iya ku mupashi bwangu bwangu.—Mat. 6:33.
5. Bushe ukumfwa umwenso wa kuti icinkunka kuti cacitika inshita ili yonse kwatukuma shani ifwe fwe Bena Kristu?
5 Nangu ca kuti tulaba no mwenso wa kuti inshita iili yonse icinkunka kuti cacitika, kuti twalolesha ku nshita ya ku ntanshi ukuti ifintu fikawama nga nshi. Nomba line ifinkunka fyonse fikapwa. (Ukus. 21:4) Ilyo ifi fishilacitika, tulingile ukuipekanishisha kabela ku nshita shabipa kabili isha kucula lelo ukukanabwelele numa mu kubila imbila nsuma kuli bambi.