Afikilisha Ifyo Esaya Asobele

Ilyo aishibe ukuti abaFarise ne ntungulushi sha mu buteko bwa kwa Herode balefwaya ukumwipaya, Yesu na basambi bakwe balifumineko baya kuli Bemba wa Galili. Lelo amabumba ayakalamba ukufuma mu Galili monse yalimukonkele. Bamo bafumine ku misumba ya Turi na Sidone iyali mu lulamba lwa bemba, e lyo bambi bafumine ku kabanga ka Mumana wa Yordani, ku Yerusalemu na ku Idumea, ku kapinda ka ku kulyo. Yesu alyundepe abantu abengi. E ico abengi abakwete amalwele ayabipisha balimutitikishe. Tabalefwaya ukulolela ukuti Yesu abekate, lelo e balefwaisha ukuti bamukumye.—Marko 3:9, 10.

Abantu bali abengi sana ica kuti Yesu aebele abasambi bakwe ukumufwailako akabwato akanono umwa kuti engekala no kutalukako panono ku lulamba lwa bemba pa kuti abantu belamutitikisha. Kabili alefwaya no kuti asambilishe abantu abengi abali kwi shilya lya bemba.

Umusambi Mateo aliilwike ukuti ifyo Yesu acitile fyafikilishe “icalandiilwe muli kasesema Esaya.” (Mateo 12:17) Mashiwi nshi Yesu afikilishe?

Mashiwi ya kuti: “Moneni! Umubomfi wandi uo nasalile, uwatemwikwa wandi, uo natemwa! Nkabika umupashi wandi pali ena, kabili akalondolwela inko umwalola umulinganya. Takacite ifikansa, nangu kubilikisha, no muntu takomfwe ishiwi lyakwe mu misebo iikalamba. Takafune itete ilyafwantwa, kabili takashimye iciku icilefuuka icushi, mpaka akalenge umulinganya ukucimfya. Cine cine, inko shikasubila mwi shina lyakwe”—Mateo 12:18-21; Esaya 42:1-4.

Yesu cine cine mubomfi wa kwa Lesa uo asala. Yesu alengele abantu beshibe bwino umulinganya uo bashaishibe pa mulandu wa ntambi isho abali mu mipepele ya bufi balekonka. Apo abaFarise tabalekonka Amafunde ya kwa Lesa ukulingana ne fyo yali, balekaana no kwafwa umulwele pe Sabata! Yesu alefwaya abantu beshibe ukuti Lesa wa mulinganya no kuti umupashi wa kwa Lesa wali pali ena, e ico aebele abantu ukuleka ukukonka intambi ishalelenga balefyengwa. Ici calengele bashimapepo bafwaye ukumwipaya. Calibipile icine cine!

Bushe amashiwi ya kuti “takacite ifikansa, nangu kubilikisha, no muntu takomfwe ishiwi lyakwe mu misebo iikalamba” yalola mwi? Yesu nga aundapa abantu, talefwaya abo aleundapa nelyo ifibanda ‘ukumusokolola.’ (Marko 3:12) Talefwaya abantu ukumwishiba pa mulandu fye wa fyo abalepita mu musebo balelanda pali ena ninshi balepanga ne congo na pa fyo abantu baleshimika mu malyashi umwaleba no bufi.

Yesu alebila imbila nsuma iyalesansamusha abantu abali nga matete ayafwantwa. Aba bantu bali nge ciku icalefuuka icushi icali mupepi no kushima pantu balecula sana. Yesu talefuna itete ilyafwantwa nelyo ukushimya iciku. Lelo alelanga abafuuka icikuuku no kuti alibatemwa ilyo alebakoselesha. Cine cine Yesu eo inko shalingile ukusubiila!