Yohane Bamwipaya Pa Mutebeto Wa Kusefya Ubushiku Bwa Kufyalwa

Ilyo abatumwa ba kwa Yesu baleshimikila mu Galili, Yohane Kabatisha ena takwete ubuntungwa bwa kushimikila pantu ninshi acili mu cifungo pa myaka nalimo ibili.

Yohane alyebeelepo Imfumu Herode Antipa ukuti yalilufyenye pa kuupa Herodia, uwali umukashi wa kwa Filipi, munyina. Herode alilekele umukashi wakwe uwa pa kutendeka pa kuti ope Herodia. Ukulingana na Mafunde ya kwa Mose, ayo Herode aleti alayakonka, ici cupo cali ca bucende kabili tacasuminishiwe mwi funde. Ilyo Yohane alandile ifyo, Herode alimupoosele mu cifungo. Nalimo uwamwebele ukucita ifi ni Herodia.

Herode taishibe ifya kucita kuli Yohane pantu abantu baleti “ni kasesema.” (Mateo 14:5) Lelo Herodia ena alefwaya fye icintu cimo. ‘Alifulilwe,’ kabili alefwaya ukumwipaya. (Marko 6:19) Awe ishuko lya kumwipaya lyasukile lyamoneka.

Ilyo kwashele fye inshita iinono ukuti kube Ica Kucilila ca mu 32 C.E., Herode apekeenye umutebeto uukalamba pa kuti asefye ubushiku afyalilwepo. Bonse abalashi ba mu buteko bwa kwa Herode na bakalamba ba bashilika e lyo na bashimucindikwa ba mu Galili balishile ku mutebeto. Pali uyu mutebeto, Salome, umwana mwanakashi wa kwa Herodia, uo afyele kuli Filipi uwali umwina mwakwe pa kutendeka, acindiile abali pa mutebeto. Abantu balitemenwe sana pa fyo acindile.

Herode alyumfwile bwino sana pa fyo umwana wakwe acindile ica kuti amwebele ati: “Lomba conse ico ulefwaya, nalakupeela.” Alapile no kutila: “Conse ico ulenomba, nalakupeela, nangu fye ukukwakanyako ubufumu bwandi pa kati.” Ilyo ashilalanda ico alefwaya, Salome aileipusha nyina, ati: “Bushe cinshi ningalomba?”—Marko 6:22-24.

Inshita yalifikile iya kuti Herodia acite ico alefwaya. Ayaswike bwangu bwangu ati: “Lomba umutwe wa kwa Yohane Kabatisha.” Ilyo line fye Salome aile kuli Herode no kumweba ukuti: “Ndefwaya mumpeele umutwe wa kwa Yohane Kabatisha nomba line pa mbale.”—Marko 6:24, 25.

Aya mashiwi yalileteele Herode ubulanda, lelo abo aitile balyumfwile ifyo alapile kuli Salome. Nangu ca kuti Salome alombele ukuti Yohane epaiwe, Herode alisumiine pantu alemona kwati alaseebana nga tacitile ico alapile. E ico Herode atumine umulinshi wakwe ku cifungo mu kuputula umutwe wa kwa Yohane. Tapakokwele, umulinshi alibwelele no mutwe wa kwa Yohane pa mbale no kupeela Salome uwailepeela nyina.

Ilyo abasambi ba kwa Yohane baumfwile icacitike, bailesenda umubili wakwe no kuushika. Lyena baile-eba Yesu icacitike.

Pa numa, ilyo Herode aumfwile ukuti Yesu aleundapa abantu no kufumfya ifibanda, alitiinine sana. Alemona kwati nalimo uwalecita ifi ifipesha amano ni Yohane Kabatisha ninshi “nabuuka ku bafwa.” (Luka 9:7) E ico Herode Antipa alefwaya sana ukumona Yesu. Ico alemufwaila, te kumfwa imbila nsuma alebila. Lelo alefwaya fye ukwishiba nga ca cine ni Yesu walecita ifipesha amano nelyo nga ni Yohane.