Yesu Aleta Paradaise Kabili Abomba Umulimo Onse Uo Lesa Amupeele

Ilyo fye Yesu abatishiwe, kwali umulwani uwalefwaya ukumulenga afilwe ukuba uwa cishinka kuli Lesa ninshi fye talatendeka no kubomba umulimo uo aishiile pano calo. Satana Kaseebanya alimweseshe imiku iingi. Pa nshita imbi, Yesu alandile pali uyu umulwani ati: “Kateka wa ici calo aleisa, kabili takwete amaka pali ine.”—Yohane 14:30.

Umutumwa Yohane alimwene mu cimonwa ifyali no kucitikila ‘icing’wena cikalamba, icisoka ca pa kutendeka, iciitwa Kaseebanya kabili Satana.’ Umulwani wabipisha uwa bantunse, Satana, baali no kumupoosela pe sonde, kabili “ali ne cipyu icikalamba, pa kwishiba ukuti ali fye ne nshita inono.” (Ukusokolola 12:9, 12) Fwe Bena Kristu tulingile ukwishiba ukuti kushele “inshita inono” no kuti “icing’wena cikalamba, icisoka ca pa kutendeka,” cikakakwa kabili tacakakwate amaka pa myaka 1,000 ilyo Yesu akulateka mu Bufumu bwa kwa Lesa.—Ukusokolola 20:1, 2.

Pali iyi nshita, cinshi cikacitika ku calo ico twikalamo kabili bushe ifintu fikaba shani pa calo? Yesu alilandile ifikacitika. Mu cilangililo ashimiike ica mpaanga ne mbushi, alilandile pa fyo cikaba ku bantu abalungama, abo bapashanya ku mpaanga, kabili ababomba imilimo iisuma ku kwafwa bamunyina ba kwa Yesu. Alilandile na pa fikacitikila abashalungama, abo bapashanya ku mbushi. Yesu atile: “Aba [imbushi] bakonaulwa umuyayaya, lelo abalungama [impaanga] bakaba no mweo wa muyayaya.”—Mateo 25:46.

Ici cilenga twaumfwikisha umo Yesu aloseshe ilyo alandile na ncitatubi uo bamupoopele pamo nankwe pa cimuti. Ifyo Yesu alaile iyi ncitatubi fyalipusana ne fyo alaile abatumwa bakwe abacitetekelo abo alaile ukuti bakateka nankwe mu Bufumu bwa mu muulu. Yesu alaile ncitatubi uwalapiile ukuti: “Cine cine ndekweba lelo nati, uli no kuba na ine mu Paradaise.” (Luka 23:43) Iyi incitatubi yalikwata isubilo lya kwikala mu Paradaise, icalo icisuma sana. Kanshi kuti twatila na bantu bonse ababa kwati ni mpaanga kabili “abakaba no mweo wa muyayaya,” bakekala muli iyi Paradaise.

Ifi fyalingana ne fyo umutumwa Yohane alandile pa fyo ifintu fikaba pa calo. Atile: “Itenti lya kwa Lesa lili pamo na bantunse, kabili akekala pamo na bo, kabili bakaba abantu bakwe. Na Lesa umwine akaba pamo na bo. Kabili akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”—Ukusokolola 21:3, 4.

Pa kuti ulya ncitatubi akekale mu Paradaise, alingile ukubuushiwa, kabili kukaba na bambi abakabuushiwa. Yesu atile: “Inshita ileisa ilyo bonse ababa mu nshiishi bakebukishiwa kabili bakomfwa ishiwi lyakwe no kufumamo, abalecita ifisuma bakabuukila ku mweo, abalecita ifibi bakabuukila ku bupingushi.”—Yohane 5:28, 29.

Finshi abatumwa ba kwa Yesu aba citetekelo e lyo na basambi bambi abakaba na Yesu ku muulu bakalacita? Baibolo itila: “Bakaba bashimapepo ba kwa Lesa kabili aba kwa Kristu, kabili bakateka pamo nankwe imyaka 1,000.” (Ukusokolola 20:6) Aba abakateka na Kristu, baume na banakashi abaikalapo pano calo. Kanshi bakaba no luse kabili bakulatulangulukilako.—Ukusokolola 5:10.

Yesu akabomfya icilubula ce lambo lyakwe ku kufumyapo ulubembu ulo abantu bapyana. Yesu nabo akateka nabo bakaafwa abantu aba citetekelo pa kuti bakapwililike. Pali iyi inshita, abantunse bakalaikala bwino nga filya fine Lesa alefwaya Adamu na Efa ukulaikala ilyo abebele ukuti bafule no kwisusha isonde. Imfwa iyabako pa mulandu wa lubembu lwa kwa Adamu tayakabeko.

Pali iyi nshita, Yesu ninshi napwisha fyonse ifyo Yehova amwebele. Pa mpela ya Myaka Ikana Limo, Yesu akabwesesha Ubufumu na bantunse abapwililika kuli Wishi. Umutumwa Paulo alandile ifyo Yesu akaicefya na pa fyo akacita ku ntanshi. Atile: “Ilyo fyonse fikalengwa ukunakila ena, e lyo no Mwana wine akainashisha ku Walengele fyonse ukunakila ena, pa kuti Lesa akabe fyonse kuli bonse.”—1 Abena Korinti 15:28.

Kanshi Yesu alikwata umulimo uukalamba uwa kufikilisha amalayo ya kwa Lesa. Ilyo amalayo ya kwa Lesa yakalafikilishiwa, Yesu akaba nga fintu ailondolwele umwine ukuti: “Nine nshila ne cine no mweo.”—Yohane 14:6.