Ubumi bwa kwa Yesu no Butumikishi

Yesu Apwisha Fyonse Ifyo Lesa Aipusha

LINTU Imfumu ya Bulwi Yesu Kristu afumyapo Satana ne calo cakwe icishalungama, mwandi kukaba umulandu wa kusekelela! Ukuteka kwa Myaka Ikana Limo ukwa mutende ukwa kwa Yesu kwatendeka mu kupelako!

Pe samba lya butungulushi bwa kwa Yesu ne mfumu sha kubishanya nankwe, bakapusunsuka ba Armagedone bakawamya ifitantala ifikashala ku nkondo yalungama. Mu kupalako, bakapusunsuka ba pe sonde bakafyala na kabili abana pa nshita imo, kabili aba bakakana mu mulimo wa kucankilwamo uwa kulime sonde ukusanguka ibala lyabalabata ukupala parka.

Mu nshita Yesu akaleta amamilioni yashikangalandwa ukufuma mu nshishi ku kuipakisha uyu Paradise wayemba. Akacite ci mu kufikilishiwa kwa cilayo cakwe ciine: “Inshita ileisa, iyo bonse aba mu nshishi [sha cibukisho, NW] . . . [bakafumamo].”

Pa kati ka abo Yesu abuusha pakabapo uwali kale ncitatubi uwafwile mupepi nankwe pa cimuti ca kucushiwilwapo. Ibukisha ukuti Yesu amulaile ukuti: “Icine cine ndekweba lelo nati, Ukaba na ine mu Paradise.” (NW) Iyo, ulya muntu takasendwe ku mulu ku kuteka pamo nge mfumu pamo na Yesu, nangu fye ni Yesu takabe na kabili umuntu no kwikala pe sonde lya Paradise pamo nankwe. Ukucila, Yesu akaba no wali kale ncitatubi mu mano ya kuti Wene akamubuushisha ku bumi muli Paradise no kumona kuli cene ukuti ukukabila kwakwe, konse kubili ukwa ku mubili no kwa ku mupashi, kwasakamanwa, nga fintu calangililwa pali ili bula.

Citontonkanye! Pe samba lya kusakamana kwabamo kutemwa ukwa kwa Yesu, ulupwa lonse fye ulwa buntunse—bakapusunsuka ba Armagedone, ubufyashi bwabo, na makana ya mamilioni abafwa babuushiwa abaumfwila wene—bakakula ukulola ku kupwililika kwa buntunse. Yehova, ukupitila mu Mwana wakwe uwa cifumu, Yesu Kristu, akekala lwa ku mupashi pamo no mutundu wa buntunse. “Kabili,” pamo nga fintu ishiwi Yohane aumfwile ukufuma mu mulu lisosa, “akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka.” Takuli umuntu pe sonde uukacula nelyo ukulwala.

Ukufika ku mpela ya Kuteka kwa Myaka Ikana Limo, imibele ikaba nga filya fine fye fintu Lesa mu kutendekelako afwaile lintu aebele abantunse babili aba kubalilapo, Adamu na Efa, ukusanda no kwisushe sonde. Ee, isonde likesulamo no mushobo walungama uwa bantunse bapwililika. Ici cili pa mulandu wa kuti ukumwenamo kwe lambo lya cilubula ilya kwa Yesu  kukaba nakubomfiwa ku uli onse. Imfwa pa mulandu wa lubembu lwa kwa Adamu tayakabeko na kabili!

Muli ifyo, Yesu akaba napwishishisha conse cintu Yehova aipwishe kuli wene. E ico, ku mpela ya myaka ikana limo, akapeela Ubufumu no lupwa lwa buntunse ulwapwililika kuli Wishi. Lesa lyene akakakula Satana ne fibanda fyakwe ukufuma mu cilindi ca ku mbo ica kushibomba kwapale mfwa. Ku mifwaile nshi?

Cisuma, ukufika ku mpela ya myaka ikana limo, abengi aba muli abo abaleikala muli Paradise bakaba bantu babuushiwa abashatala abakwata icitetekelo cabo ukweshiwa. Pa ntanshi ya kufwa, tababalile abeshiba amalayo ya kwa Lesa kabili e co tabaali na maka ya kulangilila icitetekelo muli yene. Lyene, pa numa ya kubuushiwa no kusambilishiwa icine ca Baibolo, cali icayanguka kuli bene muli Paradise, ukwabula ukukaanya ukuli konse, ukubombela Lesa. Lelo nga ca kuti Satana apeelwe shuko lya mu nshita ku kwesha ukubalesha ukutwalilila ukubombela Lesa, bushe kuti bashininkisha aba cishinka pe samba lya bwesho? Pa kupikulula ici cipusho, Satana akakakulwa.

Ukusokolola ukwapeelwe kuli Yohane kusokolola ukuti pa numa ya Kuteka kwa Myaka Ikana Limo ukwa kwa Yesu, Satana akashininkisha ukutunguluka mu kupilibula impendwa ishapimwa iya bantu ukufuma ku kubombela Lesa. Lelo lyene, lintu ubwesho bwa kupelako bwapwishishiwa, Satana, ifibanda fyakwe, na bonse abo bantu atunguluka mu kulufya bakonaulwa kuli pe na pe. Pa lubali lumbi, bakapusunsuka abaeshiwa mu kukumanina, aba cishinka bakatwalilila ukwikala ku kuipakisha amapaalo ya kwa Shibo wa mu mulu ukupulinkane ciyayaya conse.

Mu kulengama, Yesu alibomba, kabili akatwalilila ukubomba, ulubali lwakatama mu kupwishishisha imifwaile ya bukata iya kwa Lesa. Mwandi ni nshita ya ku ntanshi iya lulumbi pambi twingaipakisha pamo nge ca kufumamo ca fyonse fintu apwishishisha pamo nge Mfumu ikalamba iya kwa Lesa iya mu mulu! Nalyo line, te kuti tulabe fyonse fintu acitile ilintu aali umuntu.

Yesu mu kuitemenwa aishile kwi sonde no kutusambilisha pa lwa kwa Wishi. Ukucila pali ici alangilile imibele yaumo mutengo iya kwa Lesa. Imitima yesu ilaseshiwa lintu twalanguluka ukushipa kwakwe ukwashika ne mibele ya caume, amano yakwe ayashingalinganishiwako, amaka yakwe ayacilapo pamo nga kasambilisha, ubutungulushi bwakwe ubwabulo mwenso, ne cililishi cakwe icabondoka no kumfwilako bulanda. Lintu twaibukisha fintu aculile icishingalondololwa lintu alepayanya icilubula, ukupitila muli ico ceka twinganonkela ubumi, mu kushininkisha imitima yesu ilaseshiwa mu kuba no kutasha kuli wene!

Mu cine cine, mwandi muntu tumwene muli uku kubebeta kwa bumi bwa kwa Yesu! Ubukulu bwakwe bwaba pa bwelu kabili bwa kucimfya. Tulaseshiwa ukubwekeshapo amashiwi ya kwa kateka wa ciRoma Ponti Pilato ukuti: “Moneni umuntu!”

Ku kupokelela kwesu ukupayanya kwe lambo lyakwe ilya cilubula, icisendo ca lubembu ne mfwa icapyanwa ukufuma kuli Adamu kuti cafumishiwapo pali ifwe, kabili Yesu kuti aba ‘Shifwe wa Nshita pe.’ Bonse abenganonka ubumi bwa muyayaya bafwile ukupokelela ukwishiba te kwa kwa Lesa kweka lelo no kwa Mwana wakwe, Yesu Kristu. Cili lisubilo lyesu ukuti ukubelenga kobe no kusambilila kwa kukonkana kwa fipande pa bumi bwa kwa Yesu no butumikishi fikaba nafikwafwilisha ukupokelela ukwishiba kwa musango uyo ukwa kupeelo bumi! 1 Yohane 2:17; 1:7; Yohane 5:28, 29; 3:16; 17:3; 19:5; Luka 23:43; Ukutendeka 1:28; 1 Abena Korinti 15:24-28; Ukusokolola 20:1-3, 6-10; 21:3, 4; Esaya 9:6.

◆ Cinshi cikabe shuko lya nsansa ilya bakapusunsuka ba Armagedone na bana babo?

◆ Ni bani mu kulunda kuli bakapusunsuka ba Armagedone na bana babo bakaipakisha Paradise, kabili ni mu mano nshi Yesu akaba pamo na bo?

◆ Cinshi cikaba e mibele ku mpela ya myaka ikana limo, kabili cinshi Yesu akacita lilya?

◆ Mulandu nshi Satana akakakwilwa ukufuma ku cilindi ca ku mbo, kabili cinshi mu kupelako cikacitika kuli wene na bonse abamukonka?

◆ Ni shani fintu Yesu engaba ‘Shifwe wa Nshita pe’?