Kalata Ukufuma kwi Bumba Litungulula

Kuli Bakasabankanya Banensu Aba Mbila Nsuma:

Ala lishuko nga nshi ifi twaikatana mu kupepa Lesa wa cine eka, Yehova! “Tubombela pamo na Lesa” umulimo wa mushilo uo atupeela uwa kubila no kusambilisha abantu imbila nsuma ya Bufumu ubuleteka, kabili uukalenga abantu bakapusuke. (1 Kor. 3:9; Mat. 28:19, 20) Pa kuti tulebomba bwino uyu mulimo mwi sonde lyonse, mu mutende kabili mu kwikatana, tulingile ukuteyanishiwa bwino.—1 Kor. 14:40.

Muli cino citabo mwalasambilila ifyo icilonganino ca Bena Kristu cibomba muno nshiku. Mwalaishiba imilimo mwakwata, kabili mwalamona ukuti lishuko ukuba Inte ya kwa Yehova. Nga ca kuti muletasha pe shuko mwakwata, mulebomba ne milimo mufwile ukubomba mu cilonganino, “icitetekelo” cenu cikakosa.—Imil. 16:4, 5; Gal. 6:5.

Kanshi tulemukoselesha ukubelenga sana cino citabo, no kulatontonkanya pa fyo mwingabomfya ifyebo filimo. Ku ca kumwenako, nga ca kuti e lyo mwafikilepo ukuba kasabankanya uushabatishiwa, finshi mufwile ukucita pa kuti mukabatishiwe no kuba Inte ya kwa Yehova? Nga ca kuti mwalibatishiwa kale, finshi mufwile ukucita pa kuti mube abakalamba mu fya kwa Lesa kabili mulebombesha mu mulimo wa kwa Yehova? (1 Tim. 4:15) Kuti mwacita shani pa kuti mu cilonganino mutwalilile ukuba umutende? (2 Kor. 13:11) Moneni amasuko kuli aya mepusho muli cino citabo.

Nga muli baume ababatishiwa, finshi mufwile ukucita pa kuti mukafikepo ukuba umubomfi atumikila no kuba eluda ku ntanshi? Abantu abengi nga nshi baleisa mu cilonganino ca kwa Lesa, kanshi bamunyinefwe abafikapo abakubomba imilimo mu filonganino balefwaikwa nga nshi. Nga mulebelenga cino citabo mukeshiba ifyo mwingacita pa kuti mukafikepo ukuba umubomfi utumikila nelyo ukuba eluda.—1 Tim. 3:1.

Tulemupepelako ukuti cino citabo cikamwafwe ukulafwaisha ukubombako imilimo mu cilonganino ca kwa Yehova no kulamona iyo milimo ukuti yalicindama nga nshi. Twalimutemwa icine cine kabili lyonse tulamupepelako ukuti mukabe pa bantu abakatwalilila ukuba ne nsansa mu kupepa Shifwe wa ku muulu Yehova.—Amalu. 37:10, 11; Esa. 65:21-25.