Bushe Baibolo Kuti Yangafwa Shani?

BUSHE KUTI WACITA SHANI?

Tontonkanya pali ici: David aleensha motoka ku ncende uko ashatala aya. Ifishibilo fya mu musebo e lyo ne fishibilo fimbi filelanga ukuti ku ncende ali te ko alingile ukuba. David aishiba ukuti naluba. Nalimo acalukila mu musebo uo ashacilinga ukwalukilamo.

Bushe nga cali niwe kuti wacita shani?

TALA TONTONKANYA!

Kuti wasalapo cimo pali ifi:

1. Ukwipusha ifya kwenda.

2. Ukubomfya mapu.

3. Ukutwalilila fye ukwensha, pantu nalimo kuti wasuka wasanga uko uleya.

Ukwabula no kutwishika, te kuti ciwame nga wasala icalenga butatu.

Icalenga bubili cawamapo ukucila ica kubalilapo. Na kuba nga uli na mapu, kuti watwalilila ukulamonapo ilyo uli pa lwendo kabili kuti yakwafwa konse uko uleya.

Ifi fine e fyo na Baibolo ingakwafwa.

Ili ibuuku ilyo abantu bashita sana

• kuti lyakwafwa nga ca kuti uli na mafya

• kuti lyalenga waishiba ifyo waba kabili kuti lyalenga waba ne mibele iisuma

• kuti lyakwafwa ukwishiba ifyo wingacita pa kuti uleba ne nsansa

UKUSANGA AMASUKO KU MEPUSHO AYACINDAMA SANA

Nga twatendeka fye ukulanda, tulepusha amepusho.

• Bushe akasuba kaya kwisa nga bwaila?

• Cinshi kufitila ubushiku?

Nga twakula, tulatendeka ukwipusha pa ficitika muno calo.

• Cinshi ifyabipa ficitikila?

• Cinshi abantu bafwila?

Inga nga ca kuti amasuko kuli aya amepusho e mo yaba mu Baibolo?

Abantu abengi batila muli Baibolo mwafula fye imilumbe ne nshimi, ifyabamo te kuti fitwafwe kabili yalyafya sana ukumfwa. Lelo bushe ifyaba mu Baibolo e fyayafya ukumfwa nelyo bantu fye e bafilwa ukumfwa ifyo ilanda? Abantu balibeba ifya bufi pali Baibolo.

Ku ca kumwenako, abantu bamo batontonkanya ukuti Baibolo ilanda ukuti Lesa e uteka icalo. Lelo bushe ifyo balanda fya cine? Icalo cilebipilako fye! Mwalifula amafya no kucula, amalwele ne mfwa, ubupiina na masanso. Bushe Lesa uwatutemwa e wingalenga fyonse ifi ifyabipa ukulacitika?

Bushe kuti watemwa ukwishiba icasuko? Ifyo Baibolo ilanda pa uteka cino calo nalimo kuti fyakupapusha.

Nalimo naumona ukuti amashiwi yali muli ino broshuwa yafumine muli Baibolo. Inte sha kwa Yehova balishininkisha ukuti Baibolo citabo icacindama nga nshi icingabatungulula mu mikalile yabo, pantu “yafuma kuli Lesa kabili ya mulimo ku kusambilisha, ku kukalipila, ku kulungika ifintu.” (2 Timote 3:16, 17) Kanshi ulingile ukuimwena we mwine ifilanda ici icitabo ca kale, lelo umwaba ifyebo ifitwafwa sana muno nshiku.