Lesa Apangile Umwaume wa Kubalilapo no Mwanakashi

Yehova alimine ibala no kulinika ati Edeni. Muli ili ibala mwali amaluba, ifimuti ne nama. Lyena Lesa apangile umwaume wa kubalilapo Adamu, pa kumupanga abomfeshe ulukungu, kabili alipuutile mu myona yakwe. Bushe nawishiba ifyakonkelepo? Uyu mwaume aishileba uwa mweo! Yehova aebele Adamu ukulasunga ibala kabili amwebele ukwinika inama shonse amashina.

Yehova alipeele Adamu ifunde ilyacindama. Amwebele ati: ‘Ku fimuti fyonse ifya mwi bala kuti walyako lelo taufwile ukulya ku cimuti cimo fye. Pantu nga walyako ukafwa.’

Pa numa Yehova alandile ati: ‘Nalapanga uwa kuti aleafwa Adamu.’ E ico alilengele Adamu alaala utulo utukalamba, lyena Lesa abuulile ulubafu ulwa kwa Adamu no kupangamo umukashi wa kwa Adamu. Ishina lya uyu mwanakashi ni Efa. Adamu na Efa e bali ulupwa lwa kubalilapo. Bushe Adamu aumfwile shani ilyo bamupangiile umukashi? Ala Adamu alitemenwe sana ica kuti alandile ati: ‘Moneni uo Yehova apanga mu lubafu lwandi! Ala cawama! Uyu nomba e munandi.’

Yehova aebele Adamu na Efa ukulakwata abana pa kuti mu calo conse mukabe abantu. Alefwaya ukuti balebombela pamo pa kuti icalo conse cikabe paradaise, cikalemoneka bwino sana nga filya fine ibala lya Edeni lyalemoneka. Lelo ifi tafyacitike. Cinshi calengele? Tukasambilila icalengele mu cipandwa cikonkelepo.