Umwaume No Mwanakashi Abo Lesa Abalilepo Ukupanga

CINSHI capusanako pali ici cikope? Pali ici cikope pali abantu. E mwaume no mwanakashi aba kubalilapo pa calo. Nani abapangile? Ni Lesa. Bushe walishiba ishina lya kwa Lesa? Ni Yehova. Lesa ainike uyu mwaume no mwanakashi ati, Adamu na Efa.

Bushe Yehova Lesa apangile shani Adamu? Abuulile iloba no kupangamo umubili uwapwililika, umubili wa mwaume. Kabili apuutile umwela mu myona ya ulya muntu, na Adamu atendeke ukupeema.

Yehova Lesa apeele Adamu umulimo wa kwinika inama shonse amashina. Adamu afwile alimwene inama pa nshita iitali ne fyo shalecita, kanshi ashipeele amashina ayalinga. Ilyo Adamu aleinika inama amashina, atampile ukutontonkanya pa cintu cimo. Bushe nawishiba ico aletontonkanyapo?

Inama shonse shali ishilume ne shikota. Kwali insofu ishilume ne shikota, kwali ne nkalamo ishilume ne shikota. Lelo Adamu ena aali fye eka. E ico Yehova alengele Adamu ukulaala utulo utukalamba, kabili ilyo aali mu tulo, abuulileko ulubafu lumo kuli ena. Muli ulu lubafu, Yehova apangilemo umwanakashi no kumupeela kuli Adamu, pa kuti abe umukashi wakwe.

Adamu ali ne nsansa icine cine! Elenganya ifyo Efa atemenwe ukulaikala muli ilya incende iyalemoneka bwino sana! Apo nomba baali babili, baali no kukwata abana no kwikala aba nsansa.

Yehova alefwaya ukuti Adamu na Efa bakekale umuyayaya. Alefwaya ukuti bakalenge isonde lyonse ukuwama nga filya mu Edeni mwali. Adamu na Efa bafwile bali ne nsansa sana ilyo batontonkenye pali uyu mulimo! Bushe aubako na iwe, nga walitemenwe ukubombako uyu mulimo wa kulenga isonde ukuwama nga filya mu Edeni mwali? Lelo insansa Adamu na Efa bakwete tashatwalilile. Natumone icalengele.