Ababelenga ino Magazini Balepusha Ukuti

Cinshi Adamu Abembukiile Nga ca Kuti ali Uwapwililika?

Lesa alisuminishe Adamu ukusala ico alefwaya umwine e ico alikwete insambu ya kuisalila ico alefwaya ukucita, e mulandu wine abembukiile. Ifi Lesa amupeele ubu bupe bwa kuisalila, tacalolele mu kuti Adamu tali uwapwililika. Na kuba, ni Lesa fye eka e wapwililika mu kufikapo. (Amalango 32:3, 4; Amalumbo 18:30; Marko 10:18) Ukupwililika kwa muntu nelyo icintu kwaliba no mwakupelela. Natulangilile, umwele limbi kuti wabomba bwino mu kuputwilako inama, lelo bushe kuti mwabomfya uyu wine mwele na mu kunwenako umuto? Icintu cipwililika fye ku mulimo bacipangila.

Cinshi ninshi Lesa apangiile Adamu? Ukupitila muli Adamu, Lesa alefwaya ukusandulula uluko lwa bantu bacenjela abali no kulaisalila abene ifyo balefwaya. Abalefwaya ukutemwa Lesa ne nshila shakwe bali no kulanga ukuti balimutemwa pa kulaumfwila amafunde yakwe. Kanshi Lesa tapangile abantu kwati ni fimashini ifikonka fye fyonse ukwabula ukutontonkanya, abene e baali no kulaisalila ukufuma pa nshi ya mitima ukuba ne cumfwila. (Amalango 10:12, 13; 30:19, 20) Kanshi Adamu akanakwata ubuntungwa bwa kukanaumfwila Lesa, nga tali muntu wapwililika, pantu ninshi nga takwetepo amaka ya kusala ico alefwaya ukucita umwine. Pa fyo Adamu abomfeshe ubuntungwa bwa kusala ico alefwaya, Baibolo itila akonkelele umukashi wakwe no kusuula ifunde lya kwa Lesa ilyo abikileko pa “muti wa kulenga ukwishiba ubusuma no bubi.”—Ukutendeka 2:17; 3:1-6.

Bushe ninshi Lesa tapangile bwino Adamu pa kuti asalepo ukucita icabipa nelyo ukufilwa ukucimfya ubwesho? Ilyo Adamu talabembuka, Yehova Lesa aliceeceetele ifintu fyonse ifyo apangile pe sonde, ukubikako na Adamu na Efa kabili atile, “nafiwama nga nshi.” (Ukutendeka 1:31) Kanshi filya Adamu abembwike tacalolele mu kuti Kabumba wakwe tamupangile bwino, lelo Lesa atile Adamu e walufyenye. (Ukutendeka 3:17-19) Adamu talekele ukutemwa Lesa ne calungama ukumwafwa ukumfwila Lesa ukucila ukumfwila umuntu uuli onse.

Ibukisheni ukuti na Yesu ilyo ali pe sonde ali uwapwililika nga filya fine Adamu ali. Nomba Yesu tali nga abantu bambi abafumine muli Adamu pantu ena aimitwe mwi fumo ku maka ya mupashi wa mushilo kabili tali na lubembu ulwingamulenga ukufilwa ukucimfya ubwesho. (Luka 1:30, 31; 2:21; 3:23, 38) Yesu ena asalilepo ukutwalilila uwa cishinka kuli Wishi nangu cingati alipitile mu mesho ayacililenapo. Filya Adamu umwine asalilepo ukucita ifyo alefwaya ukucila ukuba ne cumfwila ku mafunde ya kwa Yehova, wali mulandu wakwe.

Nomba cinshi calengele Adamu ukusalapo ukukanaumfwila Lesa? Bushe alemona kwati ali no kuwamyako ifintu fimo mu bumi bwakwe? Awe, pantu umutumwa Paulo alembele ukuti: “Adamu tabamubepele.” (1 Timote 2:14) Adamu asalilepo ukukonkelela ifyo umukashi wakwe uwasalilepo ukulya ku cimuti cabindilwe alefwaya. Alefwaisha ukusekesha umukashi wakwe ukucila ukuba ne cumfwila kuli Kabumba wakwe. Ilyo bamupeeleko icisabo, nga alitekenye no kutontonkanya pa fyo ukukanaumfwila Lesa kwali no kukuma icumfwano cakwe na Lesa. Ukutemwa Adamu atemenwe Lesa takwafikilepo, ne ci calengele akaane ukukosa ku bwesho, na ku kutunka kwa mukashi.

Adamu abembwike ninshi talafyalapo na bana, kanshi bonse abatuntuka muli ena bafyalwa ababembu. Lelo nga filya fine cali kuli Adamu, na ifwe twalipeelwa ubupe bwa kusala ico tulefwaya. Kuti cawama nga tuletontonkanyapo sana pa busuma bwa kwa Yehova no kufwaisha ukumutemwa, pantu e walinga ukumfwila no kupepwa.—Amalumbo 63:6; Mateo 22:36, 37.