Ibukisheni Muka Lote

Lote aleikala mu Kanaani na Abrahamu munyina wa kwa wishi. Mu kupita kwa nshita, inama isho Abrahamu na Lote bakwete shalifulile sana ica kuti impanga yalicepele. E ico Abrahamu aebele Lote ati: ‘Te kuti twikale bonse pa ncende imo. Sala uko wingatemwa ukuya, na ine nalaya kumbi.’ Ifi Abrahamu acitile fyalangile ukuti taali kaitemwe.

Lote alimwene impanga iisuma iyabelele mupepi no musumba wa Sodomu. Mwali amenshi ayengi e lyo ne fyani ifisuma. Iyi ine impanga e yo asalile kabili e mo atendeke ukwikala no lupwa lwakwe.

Abantu abaleikala mu Sodomu na mu musumba uwali mupepi uwa Gomora balecita sana ifyabipa. Na kuba, balecita ifyabipa ica kuti Yehova asalilepo ukonaula iyi misumba. Nomba Lesa alefwaya ukupususha Lote no lupwa lwakwe, e ico atumine bamalaika babili ukuyabeba ati: ‘Endesheni! Fumeni mu musumba! Yehova alaonaula uyu umusumba.’

Nomba Lote tafumine mu musumba ilyo line fye bamwebele. Alewayawaya. E ico bamalaika baikete Lote, muka Lote, na bana bakwe abanakashi babili ku maboko no kubabutushisha kunse ya musumba, e lyo babeba abati: ‘Butukeni! Mwalafwa nga mwaikala muno, kabili mwilolesha ku numa. Nga mwalolesha ku numa mwalafwa!’

Ilyo bafikile mu musumba wa Soari, Yehova aliloseshe imfula ya mulilo na mabwe ya mingu. Kabili imisumba ya Sodomu na Gomora yalyonaike, takwashele nangu kamo. Ilyo muka Lote aloleshe ku numa, asangwike ilibwe lya mucele pantu tacitile ifyo Yehova abebele! Lelo Lote na bana bakwe abanakashi babili balicitile ifyo Yehova abebele, e ico balipuswike. Bafwile balyumfwile sana ububi pali filya muka Lote ashakonkele ifyo Lesa abebele. Nomba balitemenwe pantu bena balicitile ifyo Yehova abebele.