Yehova Asala Yoshua

Mose ali mupepi no kufwa pa numa ya kutungulula abena Israele pa myaka iingi. E ico Yehova amwebele ati: ‘Te iwe ukengisha abena Israele mu Calo ca Bulayo. Lelo nalakulanga Icalo ca Bulayo.’ Nomba Mose aebele Yehova ukusala umuntu uwali no kulatungulula abantu. Yehova aebele Mose ati: ‘Kabiye kuli Yoshua kabili umwebe ati e wakulatungulula abena Israele.’

Mose aebele abena Israele ukuti ali no kufwa no kuti Yehova nasala Yoshua ukuti e ukabengisha mu Calo ca Bulayo. Lyena Mose aebele Yoshua ati: ‘Witiina. Yehova akulakwafwa.’ Ilyo Mose apwishishe ukulanda aya mashiwi, aile pa muulu wa Lupili lwa Nebo apo Yehova amulangile icalo ico alaile Abrahamu, Isaki na Yakobo. Mose ali ne myaka 120 ilyo afwile.

Yehova aebele Yoshua ati: ‘Abuka umumana wa Yordani no kwingila mu Kanaani. Nkakwafwa nga filya fine na-afwile Mose. Ulebelenga Amafunde yandi cila bushiku. Witiina. Shipa. Kabiye kacite ifyo nakweba.’

Yoshua atumine abaume babili ukuyamona umusumba wa Yeriko. Mu cipande cikonkelepo tukasambilila ifyacitike ilyo baile muli uyu musumba. Ilyo aba baume babwelele, baebele Yoshua ati, cili fye bwino kuti baingila mu Kanaani. Ubushiku bwakonkelepo, Yoshua aebele abena Israele ukwima no kuya ku Kanaani. Lyena aebele bashimapepo abasendele icipao ca cipangano ukubalilapo ukuya ku Mumana wa Yordani. Umumana waliswile sana. Nomba ilyo bashimapepo banyantile mu menshi, amenshi mu mumana yalilekele ukupita kabili yalikamine! Bashimapepo baile pa kati ka mumana, kabili e po baiminine ilyo abena Israele baleabuka apauma. Bushe ulemona ukuti ici icacitike calengele baibukisha ifyo Yehova acitile pali Bemba ya Kashika?

Abena Israele basukile bafika mu Calo ca Bulayo. Balikuulile amayanda ne misumba. Balilimine amabala no kubyala ifisabo. Muli ici calo mwali umukaka uwingi no buci.