Ubufumu Ubushakonaulwe

Bushiku bumo mu nshita ya bushiku, Imfumu Nebukadnesari yalilotele iciloto ico ishaishibe umo calolele. Ici ciloto calilengele yasakamana sana ica kuti yalifililwe no kulaala. Nebukadnesari aitile abamajiki kabili abebele ati: ‘Njebeni umo iciloto ndotele cilolele.’ Bamwebele abati: ‘Twebeni iciloto mwacilota, mwe mfumu.’ Lelo Nebukadnesari abebele ati: ‘Awe! Njebeni imwe bene ifyo nacilota, nga tamwanjebe nalamwipaya.’ Lelo na kabili baebele imfumu ati: ‘Twebeni iciloto mwacilota, e lyo twalamweba umo cilolele.’ Lelo abebele ati: ‘Imwe bonse mulenyangasha fye. Njebeni iciloto nacilota!’ Lyena baebele imfumu ati: ‘Tapali umuntu uwingacita ico mulefwaya. Ico mulefwaya te kuti cicitike.’

Nebukadnesari alifulilwe sana ica kuti alandile ukuti bonse aba mano abali mu Babiloni babepaye. Pali aba aba mano pali na Daniele, Shadraki, Meshaki, na Abednego. Daniele aebele imfumu ukuti ibepaya bwangu, lelo ibapeleko inshita. Lyena Daniele na banankwe balipepele kuli Yehova ukuti abafwe. Cinshi Yehova acitile?

Yehova alilangile Daniele iciloto ico Nebukadnesari alotele kabili alimwebele na umo calolele. Ubushiku bwakonkelepo, Daniele aile ku mubomfi wa mfumu no kumweba ati: ‘Wi-ipaya uwa mano nangu umo. Nalalondolola iciloto imfumu yalotele.’ E ico uyu mubomfi atwele Daniele kuli Nebukadnesari. Daniele aebele imfumu ati: ‘Yehova namulanga ifikacitika ku ntanshi. Ici e ciloto ico mwalotele: Mwamwene icimpashanya icikalamba icakwete umutwe wa golde, icifuba na maboko fyali ifya silfere, ulufumo na matanta fyali ifya mukuba, amolu yali aya cela e lyo amakasa yali aya cela ne bumba. Lyena ilibwe lyaliputwilwe pa lupili kabili lyatobele pa makasa ya ici icimpashanya. Ici cimpashanya calitobaike caba fye kwati buunga no mwela waliculwile. Ilibwe ilyatobele icimpashanya lyaishileba ulupili ulukalamba, kabili lwaiswile pa calo ponse.’

Lyena Daniele aebele imfumu ati: ‘Umulolele iciloto mwalotele ni umu: Ubufumu bwenu e mutwe wa golde. Silfere bufumu ubukakonka pa bufumu bwenu. Lyena kukaba ubufumu ubwaba ngo mukuba, ubukateka icalo conse. Ubufumu ubukakonkapo bukaba ubwakosa nge cela. Na mu kulekelesha, kukaba ubufumu ubwa-akanikana, imbali shimo isha bufumu shikaba ishakosa nge cela e lyo shimbi shikaba ishanaka nge bumba. Ilibwe ilyaishileba ulupili, Bufumu bwa kwa Lesa. Bukashonaula aya amabufumu yonse kabili bukateka icalo umuyayaya.’

Lyena Nebukadnesari akonteme pa ntanshi ya kwa Daniele e lyo alanda ati: ‘Lesa obe e walenga ukuti wishibe ici ciloto. Takwaba Lesa uwaba nga ena.’ E ico Nebukadnesari taipeye Daniele lelo amusontele ukuba umukalamba pa ba mano bonse no kuba kateka mu citungu ca Babiloni. Bushe wamona ifyo Yehova ayaswike ipepo lya kwa Daniele?