Ubufumu Ubwali Kwati Cimuti Icikalamba

Bushiku bumo mu nshita ya bushiku, Nebukadnesari alilotele iciloto icamutiinishe. Aitile aba mano pa kuti bamwebe umo iciloto calolele. Lelo takwali nangu umo uwalondolwele umo iciloto calolele. Na mu kulekelesha imfumu yalandile na Daniele.

Nebukadnesari aebele Daniele ati: ‘Nalotele icimuti. Ici icimuti calikulile ukufika na mu muulu. Abantu mu calo conse balecimona. Calikwete amabula ayasuma ne fisabo ifingi. Inama shaletuusha mwi samba lya ciko, kabili ifyuni fyalipangile ifinsa ku misambo ya ciko. Lyena malaika afumine ku muulu kabili atile: “Temeni icimuti, putuleniko ne misambo. Lelo icishiki ca cimuti lekeni cishale mu mushili. Kabili mukakeko icipaafya ca cela ne ca mukuba. Umutima wa ciko wala-aluka ukufuma mu buntunse kabili calakwata umutima wa nama, ne nshita 7 shikapitapo. Abantu bonse bakeshiba ukuti Lesa e Uteka mu bufumu bwa bantu, kabili abupeela ku o atemenwe.”’

Yehova alyebele Daniele umo iciloto calolele. Ilyo Daniele aishibe umo iciloto calolele alitiinine. Aebele imfumu ati: ‘Mwe mfumu, nga caliweme ifili muli ici ciloto aficitikila abalwani benu, lelo fikacitikila imwe. Icimuti ico batemene, nimwe. Mukafuma pa bufumu, kabili mukalalya icani mu mpanga nga filya inama sha mu mpanga shilya icani. Lelo apo malaika alandile ati mwifumya icishiki ca cimuti mu mushili, mukaba imfumu na kabili.’

Pa numa ya mwaka umo, Nebukadnesari ale-enda pa mutenge we sano lyakwe, aletamba umusumba wa Babiloni. Lyena alandile ati: ‘Moneni umusumba ubusuma uo nakuula. Moneni ifyo naba na maka ayakalamba!’ Ilyo alelanda ifi, aumfwile ishiwi ukufuma ku muulu aliti: ‘Nebukadnesari! Nomba tauli imfumu.’

Pali ilya ine nshita, Nebukadnesari alifulungene kabili aishileba nge nama ya mu mpanga. Balimutamfishe mwi sano lyakwe, kabili atendeke ukwikala ne nama mu mpanga. Umushishi wakwe walikulile kwati masako ya kwa kapumpe, kabili amaala yakwe yalikulile kwati ya cuni.

Pa numa ya myaka 7, amano yalibwelele kuli Nebukadnesari, kabili Yehova amulengele aba imfumu na kabili. Lyena Nebukadnesari atile: ‘Ndelumbanya Yehova, Imfumu ya ku muulu. Nomba naishiba ukuti Yehova e Kateka. Alacefya aba cilumba, kabili apeela ubufumu ku o alefwaya.’