“Natampile Ukumona Ifimonwa Ifyafumine Kuli Lesa”

1-3. (a) Londololeni ifyo Esekiele amwene ne fyo aumfwile. (Moneni icikope pa ntendekelo.) (b) Cinshi calengele Esekiele amone cilya cimonwa, kabili acitile shani ilyo acimwene?

ESEKIELE alelolekesha apatali bushilya bwe lungu ilikalamba, ilya mucanga. Aleti acefya amenso, kabili ayatulumuna. Nacimukosela sana ukusumina ifyo alemona. Nga alolekesha ku mpela ya muulu, alemona ukuti kuleisa umwela uukalamba nga nshi. Lelo uyu umwela tauli nge ifyo umwela onse uba. Uyu umwela uulefumina ku kapinda ka ku kuso ukalamba sana ica kuti umushishi wakwe ne fya kufwala fileululuka. Amona ikumbi ilikalamba kabili ilitali. Muli ili ikumbi mwafuma umulilo uukalamba, kabili ifyo uyu mulilo ulebilima, fyalenga atontonkanya pa cela icisuma nga nshi icaengwa.a Ilyo ili ikumbi lilebutukisha ukulola kuli Esekiele, aumfwa iciunda cileya cilekulilako kabili cileumfwika nge bumba lya bashilika ilikalamba.—Esek. 1:4, 24.

² Esekiele ali fye ne myaka nalimo 30, kabili amona icimonwa ca kubalilapo pa fimonwa ifingi ifya kupapusha ifyo ali no kumona. Aumfwa “ukuboko kwa kwa Yehova” kwaisa pali ena, e kutila umupashi wa mushilo uwa maka uwa kwa Yehova uo tushingacilikila. Ifyo umupashi walalenga amone fyalaba ifisuma sana kabili ifya kupapusha, ukucila pa fyo abapanga amafilimu muno nshiku babika mu mafilimu bapanga pa kuti yawame. Icimonwa Esekiele alamona calamupapusha sana ica kuti alafukama fye afishe ne mpumi panshi.—Esek. 1:3, 28.

³ Na lyo line, ico Yehova alangiile Esekiele ici icimonwa talefwaya ukumupapusha iyo. Icimonwa ca kubalilapo ico Esekiele amwene calikwete sana ubupilibulo kuli ena, kabili calikwata sana ubupilibulo na ku babomfi ba kwa Yehova aba cishinka muno nshiku nga filya fine caba na ku fimonwa fimbi ifyaba muli ili ibuuku lya busesemo. E ico natusambilile pa fyo Esekiele amwene ne fyo aumfwile.

Ifyo Cali

4, 5. Cali shani ilyo Esekiele amwene icimonwa?

⁴ Belengeni Esekiele 1:1-3. Lekeni tubalilepo ukulanda pa fyo cali. Cali ni mu mwaka wa 613 ninshi Yesu talaisa pano isonde. Nga fintu twasambilile mu cipandwa cafumineko, Esekiele ali mu Babiloni, aleikala pamo na bankole banankwe mu mushi uwali mupepi no mumana wa Kebari. Uyu umumana bafwile baupatwile fye mu mumana wa Yufrate e lyo na kabili ku ntanshi walilewila mu mumana wa Yufrate.

⁵ Ku Yerusalemu uko aba bankole bafumine kwalepele nalimo amakilomita 800.b Pe tempele apo wishi wa kwa Esekiele alebombela bushimapepo, palecitika sana ifyabipa kabili abantu balepepa utulubi. Icipuna ca bufumu icacindama icali mu Yerusalemu apo Davidi na Solomone baletekela, pali iyi nshita caliseebene. Imfumu Yehoyakini iishali ne cishinka yali mu Babiloni pamo na bankole. Sidekia uwamupyene pa bufumu, balemutungulula fye ku mfumu ya mu Babiloni kabili alecita sana ifyabipa.—2 Isha. 24:8-12, 17, 19.

6, 7. Cinshi nalimo calengele Esekiele alemona ukuti ilya yali ni nshita iya-afya nga nshi?

⁶ Iyi yali ni nshita iya-afya nga nshi kuli uyu mwaume Esekiele uwali sana ne citetekelo. Nalimo bamo pali bankole banankwe baleyipusha ukuti: ‘Bushe Yehova natulabililako fye? Bushe iyi imitekele yabipa iya bena Babiloni iyakwata balesa ba bufi abengi, ikalofya ukupepa kwasanguluka ukwa kwa Yehova ne mitekele yakwe pano isonde?’

⁷ Apo mwaishiba ifyalecitika, ilyo muleisambilisha pali ili lyashi, bushe te kuti ciwame mubalilepo ukubelenga ifyo balondolola icimonwa ca kubalilapo ico Esekiele amwene? (Esek. 1:4-28) Ilyo mulebelenga, mule-elenganya ukuti nimwe mulemona ifyo Esekiele amwene kabili muleumfwa ifyo aleumfwa.

Iceleta Ilikalamba Sana Ilyapusanako na Maceleta Yonse

8. Finshi Esekiele amwene mu cimonwa, kabili fyaleimininako finshi?

⁸ Cinshi Esekiele amwene mu cimonwa? Amwene ica kwendelapo icikalamba nga nshi kabili ica kutiinya, ico beta ukuti iceleta. Cakwete imipeto 4 iikalamba, kabili mupepi ne iyi imipeto pali ifibumbwa 4 ifya mupashi ifyaishileishibikwa pa numa ukuti, fyali ni bakerubi. (Esek. 10:1) Pa muulu wa mipeto pali icisebele icikalamba nelyo icali nge cintamba, icapaapaatala icalemoneka nge glasi. Pa muulu wa ciko pali cipuna ca bufumu ica bukata ica kwa Lesa kabili Yehova e waikelepo! Finshi ili iceleta lyaleimininako? Icimonwa Esekiele amwene cimininako fye icintu cimo, e kutila, ulubali lwa ku muulu ulwa cilonganino ca kwa Yehova. Cinshi twalandila ifi? Natulande pa fintu fitatu ifyalenga tulande ifi.

9. Bushe ifyo Yehova omfwana ne fibumbwa fyakwe ifya ku muulu fyaikatana shani ne fyo balondolola iceleta?

⁹ Ifyo Yehova omfwana ne fibumbwa fyakwe ifya ku muulu. Muli ici icimonwa, icipuna ca kwa Yehova ica bufumu caba pa muulu wa bakerubi. Amalembo yambi nayo yalanda ukuti, Yehova aikala pa cipuna ca bufumu pa muulu wa bakerubi nelyo pa kati ka bakerubi. (Belengeni 2 Ishamfumu 19:15; Ukufu. 25:22; Amalu. 80:1) Ifi amalembo yalanda tafipilibula ukuti Yehova aikala pali bakerubi, kwati alakabila ifi ifibumbwa fya mupashi ifya maka filemusenda, kabili takabila ukulaendela mwi celeta nge lyo abantu bendelamo. Lelo bakerubi balatungilila imitekele yakwe, kabili kuti abatuma konse fye mu kucita ifyo afwaya ifyakuma imitekele yakwe. Aba bakerubi ukubikako fye na bamalaika bonse aba kwa Lesa aba mushilo, Yehova alabatuma ku kucita ifyo afwaya. (Amalu. 104:4) Kanshi caba kwati Yehova “endela” pali bena, alabatungulula pantu e ubateka, kabili baba kwati bapanga iceleta limo ilikalamba.

10. Finshi filanga ukuti iceleta lya ku muulu talyakwata fye bakerubi 4?

¹⁰ Iceleta talyakwete fye bakerubi 4. Bakerubi abo Esekiele amwene bali 4. Ilingi line Baibo nga yabomfya inamba 4, ninshi ilelanda pa cintu icakumanina nelyo icapwililika pa kulondolola icintu umwaba fyonse ukwabula ukushako nangu umo. Kanshi balya bakerubi 4 ababa kwi celeta, bemininako abana ba kwa Yehova aba ku mupashi bonse aba cishinka. Na kabili, ku mipeto na kuli bakerubi bene kwaiswile fye amenso yeka yeka, icilelangilila ifyo bamalaika bonse baba abalola, te bakerubi fye 4 beka. Ifyo Esekiele alondolwele iceleta filanga ukuti lyali ilikalamba sana ica kuti na bakerubi abali abakalamba balemoneka fye utunono. (Esek. 1:18, 22; 10:12) Kanshi no lubali lwa ku muulu ulwa cilonganino ca kwa Yehova lukalamba sana, tamwaba fye bakerubi 4 beka.

11. Cimonwa nshi Daniele amwene icapalana ne co Esekiele amwene, kabili bushe ici cilenga twaishiba finshi?

¹¹ Daniele alimwene icimonwa ca ku muulu icaba nge co Esekiele amwene. Kasesema Daniele ali muli bunkole mu Babiloni pa myaka iingi, kabili na o Lesa alimulangile icimonwa ca ku muulu. Na muli ici cine cimonwa, icipuna ca bufumu ica kwa Yehova calikwete imipeto. Icimonwa Daniele amwene cilanga ifyo ulupwa lwa kwa Yehova ulwa ku mupashi ulwa ku muulu lwakula. Daniele amwene abana ba kwa Lesa aba ku mupashi “abali amakana na makana, kabili . . . abali 10,000 ukufushiwa imiku 10,000” nabeminina pa ntanshi ya kwa Yehova. Balitekele Icilye, kabili umo na umo aikele pa cifulo cakwe. (Dan. 7:9, 10, 13-18) Kanshi cili fye bwino ukulanda ukuti icimonwa ico Esekiele amwene cimininako ibumba lya ku muulu ilya bukata ilyalongene pamo.

12. Bushe ukusambilila pa malyashi pamo nga pe lyashi ililanda pa cimonwa ico Esekiele amwene kuti kwatucingilila shani?

¹² Yehova alishiba ukuti fwe bantunse kuti twacingililwa nga twabika sana amano ku fya ku mupashi, e kutila “ifishimoneka,” nga fintu umutumwa Paulo alandile. Cinshi twalandile fi? Apo tuli bantunse abakwata umubili wa munofu no mulopa, tulabika sana amano ku fintu “ifimoneka,” ifitusakamika ifya pa kashita fye akanono. (Belengeni 2 Abena Korinti 4:18.) Ilingi line Satana alatubeleleka pantu alishiba ukuti tulabika sana amano ku fintu ifimoneka kabili afwaya tulekonkelela ififwaya imitima yesu. Pa kuti Satana e tucimfya Yehova alitupeela amalyashi ayasuma pamo nga aya, ayaba mu busesemo bwa kwa Esekiele, ayatwibukishako ifyo Yehova acindamika ulupwa lwakwe ulwa ku muulu.

“Mwe Mipeto Akwendeni!”

13, 14. (a) Bushe Esekiele alondolwele shani imipeto amwene? (b) Cinshi cawamina ifi iceleta lya kwa Yehova lyakwata imipeto?

¹³ Pa kubala, Esekiele abikile sana amano kuli bakerubi 4, kabili mu cipandwa 4 ica cino citabo tukamona ifyo ifi ifibumbwa fitusambilisha pali Yehova e lyo ne fyo, ifyo fimoneka fitusambilisha pali Yehova. Na lyo line Esekiele alimwene imipeto 4 mupepi na aba bakerubi, iyi mipeto ifwile yali pa makona 4 ica kuti yapangile icintu icikalamba icalingene mu mbali shonse 4. (Belengeni Esekiele 1:16-18.) Imipeto yalemoneka kwati baipangiile ne libwe lya krusoliti, ilibwe ilya mutengo sana ilyalemoneka nge glasi kabili lyalemoneka ilya yelo. Ili ilibwe ilisuma nga nshi lyalemoneka ilyabeeka.

¹⁴ Icimonwa Esekiele amwene cilanda sana pa mipeto ye celeta. Icipuna ca bufumu ukukwata imipeto? Ca kupapa! Ifipuna fya bufumu ifyo tumona tafikwata imipeto fiba fye pa cifulo cimo cine apo bafiteka, pantu imfumu sha pano isonde shalikwata umo shipeleela ukuteka. Lelo amaka Yehova akwata aya kuteka yalipusana sana nayo abantu bakwata. Nga fintu Esekiele ali no kusambilila, amaka Yehova akwata aya kuteka tayakwata apo yapeleela. (Nehe. 9:6) Kanshi Yehova alikwata amaka ya kuteka konse fye.

15. Finshi Esekiele amwene pa fyo imipeto yapangwa e lyo ne fyo yakula?

¹⁵ Esekiele alipapile sana ilyo amwene ifyo imipeto yakulile. Alembele ati: “Iyi imipeto yalisanseme ica kuti yaletiinya.” Nalimo kuti twaelenganya ifyo Esekiele alepunamina mu muulu pa kuti amone imipeto iikalamba, iyalebeeka kabili iitali. Kabili Esekiele alandile no kuti: “Kunse ya iyi imipeto kwaiswile amenso ayaishingulwike.” Nalimo icapapwishe sana pali fyonse, fintu imipeto yalemoneka. Alondolwele ukuti: “Ifyo yapangilwe fyalemoneka kwati umupeto umo uli mu mupeto ubiye.” Bushe ifi fyalolele mwi?

16, 17. (a) Bushe iceleta lyakwete shani imipeto mu kati ka mipeto ibiye? (b) Finshi imipeto ilangilila pa fyo iceleta lya kwa Yehova lyenda?

¹⁶ Umupeto umo na umo uo Esekiele amwene ufwile wakwete imipeto ibili, umupeto umo walicilingenye mu mupeto unankwe. Kanshi twamona ifyo imipeto yale-endela ukulingana ne fyo Esekiele alondolwele atile: “Ilyo yale-enda yaleya ku mbali shonse 4 ukwabula ukuti yaluke.” Bushe iyi mipeto ilenga twaishiba finshi pe celeta lya ku muulu ilyo Esekiele amwene?

¹⁷ Iyi imipeto iyali iitali sana, yale-enda intamfu iitali nangu yashinguluka fye umuku umo. Na kuba icimonwa cilanga ukuti ili iceleta lyalebutuka ngo kubyasha kwa nkuba. (Esek. 1:14) Na kabili ifi mu mipeto yonse 4 mwaba umupeto uwacilinganya umupeto unankwe filangilila ifyo iceleta lyaluka nga lile-enda. Takuli umuntunse nangu umo uupanga ifya kupangapanga uwingapanga imipeto iyaluka muli uyu musango. Ili iceleta kuti lyaya ukuli konse ukwabula ukubweshako umusenselo nelyo ukwabula ukupinduluka! Na lyo line talyenda fye ukwabula ukwishiba uko lileya. Ifi ku mipeto ya ili iceleta kwaba amenso ayengi, filangilila fye ukuti ili iceleta lileshiba bwino fyonse ifili mupepi konse uko lileya.

18. Finshi tulesambilila kuli filya imipeto yaba iikalamba nga nshi na kuli filya yakwata amenso ayengi?

¹⁸ Finshi Yehova alesambilisha Esekiele na bantu bonse aba cishinka pa lubali lwa ku muulu ulwa cilonganino cakwe? Moneni ifyo twasambilila ukufika pano. Filya iceleta lyakwata imipeto iyabeka kabili iikalamba, fyalenga lyaba ilya bukata kabili ilya kutiinya. Filya imipeto ye celeta yakwata amenso ayengi filanga ukuti lilamona fyonse. Yehova alamona ifintu fyonse. (Amapi. 15:3; Yer. 23:24) Na kabili alikwata bamalaika abengi nga nshi abamubombela, abo engatuma konse fye uko alefwaya, kabili aba bamalaika kuti bayamona bwino bwino ifyo ifintu fili no kuyaeba kateka wabo.—Belengeni AbaHebere 1:13, 14.

19. Bushe ifyo iceleta lyenda bwino ne fyo libutuka fitusambilisha finshi pali Yehova na pa lubali lwa ku muulu ulwa cilonganino cakwe?

¹⁹ Na kabili, natumona ukuti iceleta lilabutukisha sana kabili kuti lyaya konse fye. Baleni tontonkanyeni pa bupusano bwaba pa cilonganino ca kwa Yehova ica ku muulu na pa mabuteko ya bantu no tubungwe. Aya amabuteko ya bantu no tubungwe yalafilwa ukupwisha amafya kabili yalafilwa ukwaluka ifintu nga fya-aluka, kanshi tayakatwalilile ukubako, bakayonaula. Lelo iceleta lya kwa Yehova lilatulanga bwino bwino ukuti Lesa uwensha ili iceleta tapampamina fye pa cintu cimo kabili alaaluka ifintu nga fya-aluka, nga filya ishina lyakwe lipilibula. Kuti aba conse ico alefwaya pa kuti afikilishe ifyo afwaya. (Ukufu. 3:13, 14) Ku ca kumwenako mu kukapakapa kwe linso kuti aba umushilika uwa maka uulelwilako abantu bakwe, lelo apo pene fye kuti ayaluka aba uwa luse kabili uwelela ababembu no kubasansamusha ukubikako fye na babembu abalapile abali no bulanda sana.—Amalu. 30:5; Esa. 66:13.

20. Cinshi tulingile ukucindikila iceleta lya kwa Yehova?

²⁰ Ifyo twasambilila ku cimonwa Esekiele amwene ukufika pano kuti fyalenga twaipusha atuti, ‘Bushe nalicindika iceleta lya kwa Yehova?’ Tatufwile ukulaba ukuti ili iceleta lya kwa Yehova pali ino nshita lilenda. Tatufwile ukulamona ukuti nalimo Yehova, Umwana wakwe, na bamalaika bonse tabamona amafya yamo ayo tukwata ayatufuupula. Nelyo tatufwile ukulamona ukuti Lesa wesu akakokola ukutwafwa ilyo tukalakabila ubwafwilisho, nelyo ukuti icilonganino cakwe cikafilwa ukwaluka nga kwaba fimo ifya-aluka muli cino calo icaluka-aluka. Tufwile ukulaibukisha ukuti icilonganino ca kwa Yehova tacaba fye pamo pene iyo, cilasela. Na kuba, Esekiele aumfwile ishiwi mu muulu lilebilikisha ati: “Mwe mipeto, akwendeni!”(Esek. 10:13) Bushe tatutemwa nga twatontonkanya pa fyo Yehova atungulula icilonganino cakwe? Kanshi Yehova e o tufwile ukupeela sana umucinshi.

Uwensha Iceleta

21, 22. Kuti twalondolola shani icasuntinkanya ifiputulwa fye celeta?

²¹ Esekiele nomba alilekele ukubika amano ku mipeto, atampile ukubika amano ku fyali pa muulu wa mipeto apo amwene “icapala icintamba icalebeeka nge glasi.” (Esek. 1:22) Pa muulu sana uwa bakerubi, pali icapala icintamba icali no bukata kabili icalebeeka icali nge glasi. Nomba umuntu uwaishiba bwino ifyo ama mashini yabomba kuti akwata sana ifipusho pali ili iceleta. Ku ca kumwenako, bamo kuti baipusha abati: ‘Cinshi caikata cilya icapala icintamba icaba pa muulu wa mipeto? Kabili imipeto kuti yabomba shani ukwabula ifyo baingishamo ifya kuisuntinkanya pamo?’ Lyonse muleibukisha ukuti ifilenga ili iceleta lile-enda fyalipusanako ne filenga amaceleta ayo abantu bapanga yale-enda pantu ili iceleta lya mampalanya, lilangilila ificitika mu muulu umwikala ifibumbwa fya mupashi. Moneni ifyo aya amashiwi ayacindama yalanda, yatila: “Umupashi uwalebombela mu fya mweo, na mu mipeto namo mwine e mo wali.” (Esek. 1:20, 21) Mupashi nshi uwalebombela muli bakerubi na mu mipeto?

²² Ukwabula no kutwishika uyu wali mupashi wa mushilo uwa kwa Yehova. Umupashi uwa maka sana mu muulu na pano isonde. Uyu umupashi e wasuntinkanya iceleta, e ulipeela amaka kabili e ulenga imipeto ile-endela pamo kabili ile-enda bwino bwino. Apo nomba twaishiba ifi, natubike amano ku fyo Esekiele amwene ilyo abikile amano ku wale-ensha iceleta.

23. Mashiwi nshi Esekiele alebomfya pa kwesha ukulondolola Yehova, kabili mulandu nshi?

²³ Belengeni Esekiele 1:26-28. Ilyo Esekiele alelondolola icimonwa amwene, ilingi line alebomfya amashiwi pamo nga, “uwalemoneka ngo,” “icalemoneka ngo,” “icalemoneka nge.” Lelo muli ifi fikomo e mo abomfya sana aya mashiwi. Ifyo Esekiele amwene fyalimupeseshe amano ica kuti calimukosele ukusanga amashiwi ya kubomfya pa kufilondolola. Amwene “icapala icipuna ca Bufumu icalemoneka nge libwe lya safiri.” Elenganyeni icipuna ca bufumu ico bapangila ne libwe lya safiri ilikalamba ilya bluu sana. Kabili pali ici cipuna ca bufumu pali uwaikelepo “uwalemoneka ngo muntu.”

24, 25. (a) Bushe umukolamfula uwashinguluka icipuna ca bufumu ica kwa Yehova utwibukishako finshi? (b) Bushe ifimonwa fya musango yu ifyo abaume abali ne citetekelo balemona fyalelenga bacita finshi?

²⁴ Yehova e waikele pa cipuna ca bufumu, ali no bukata kabili talemoneka bwino bwino, pantu alefumya ulubingu lwa bukata ulwalefuma mu musana ukuya mwi samba no lwalefuma mu musana ukuya mu muulu. Nalimo kuti twaelenganya ifyo kasesema alecefya amenso no kubika iminwe yakwe pa mpumi pa kuti amone uwa bukata uwaikele pa cipuna ca bufumu. Esekiele asukile amona icintu icisuma nga nshi: “Kwali ulubuuto ulwalebengeshima ukumushinguluka kwati mukolamfula mu makumbi uubako pa bushiku bwa mfula.” Bushe kwaliko inshita ilyo mwamwene umukolamfula e lyo mwatemwa sana? Umukolamfula utwibukishako ifyo Kabumba wesu aba no bukata! Na kabili umukolamfula ulatwibukishako icipangano ca mutende ico Yehova apangene na bantu pa numa ye lyeshi. (Ukute. 9:11-16) Nangu ca kuti uwa Maka Yonse alikwatisha amaka, ni Lesa wa mutende. (Heb. 13:20) Na kabili alalenga abamupepa ne cishinka baleba no mutende pantu e ntulo ya mutende.

²⁵ Finshi Esekiele acitile ilyo amwene ifyalelangilila ubukata bwa kwa Yehova Lesa? Esekiele alilembele ifyo acitile, atile: “Ilyo namwene ifi nalifukeme nafisha ne mpumi panshi.” Icalengele Esekiele afukame afishe ne mpumi panshi ni co ifyo amwene fyalimupapwishe kabili fyalimutiinishe. Ifi fine e fyo na bakasesema bambi bacitile ilyo bamwene ifimonwa ifyafumine kuli Yehova. Ifimonwa bamwene fyalibapeseshe sana amano kabili fyalibatiinishe. (Esa. 6:1-5; Dan. 10:8, 9; Ukus. 1:12-17) Na lyo line ilyo papitile inshita, ifyo Yehova abalangile fyalibakoseshe sana. Na Esekiele wine fyalimukoseshe. Na ifwe bene amalyashi ya musango uyu yafwile ukulatukosha ilyo tuleyabelenga mu Baibo.

26. Bushe icimonwa ico Esekiele amwene camukoseshe shani?

²⁶ Nga ca kuti Esekiele alesakamana nelyo aletwishika nampo nga ifintu fyali no kuwamina abantu ba kwa Lesa mu Babiloni, ninshi icimonwa amwene calimukoseshe. Cali-ilangile fye apabuta tuutu ukuti te mulandu no ko abantu ba kwa Lesa aba cishinka baali, nampo nga ni mu Yerusalemu, nelyo ni mu Babiloni, nangu fye ukuli konse, iceleta lya kwa Yehova ilya bukata lyali no kufikako. Satana takwata amaka ya kulwisha Lesa uutungulula ici icilonganino ca bukata. (Belengeni Amalumbo 118:6.) Na kabili Esekiele alimwene ukuti ili iceleta lya ku muulu talyali ukutali na bantu. Cinshi twalandila ifi? Ni co imipeto ya iko yalifikile pe sonde! (Esek. 1:19) Kanshi Yehova alibikile sana amano ku bantu bakwe aba cishinka abali bankole mu Babiloni. Lyonse Shibo Yehova ali no kulabasakamana no kulabatemwa te mulandu no ko bali.

Ifyo Iceleta Lyamukuma

27. Bushe icimonwa Esekiele amwene catukuma shani muno nshiku?

²⁷ Bushe iceleta Esekiele amwene lyalikwata ubupilibulo kuli ifwe muno nshiku? Tatufwile no kulatwishika iyo! Ibukisheni, ino nshita e lyo Satana alesansa sana ukupepa kwasanguluka ukwa kwa Yehova. Afwaya tulemona ukuti twaba fye fweka no kuti ubwafwilisho ubufuma kuli Shifwe wa ku muulu na ku cilonganino cakwe te kuti bufike uko twaba. Mwilaleka ubufi bwa musango uyu bulealula ifyo mumfwa ne fyo mutontonkanya. (Amalu. 139:7-12) Na ifwe ifyaba mu cimonwa amwene kuti fyatutiinya. Nalimo te kuti tufukame twafisha ne mpumi panshi nga fintu Esekiele acitile, nomba bushe te kuti tupape pa fyo ili iceleta lyakwata amaka, ifyo libutukisha, ifyo lyenda bwino ne fyo lyaluka e lyo ne fyo ulu ulubali lwa ku muulu ulwa cilonganino ca kwa Yehova lwaba no bukata nga nshi?

28, 29. Finshi fyacitika mu myaka 100 iyapitapo ifilanga ukuti iceleta lya kwa Yehova lyalitwalilila ukwenda?

²⁸ Muleibukisha no kuti icilonganino ca kwa Lesa calikwata no lubali ulwaba pano isonde. Lelo muli ulu lubali lwa pano isonde, mwaba abantu abashapwililika. Na lyo line tontonkanyeni pa milimo iyo Yehova abomba pano isonde! Mwi sonde fye lyonse Yehova alilenga abantunse ukubomba imilimo iyo bashingabomba ku maka yabo abene. (Yoh. 14:12) Nga mwabelenga mu citabo citila Ubufumu bwa kwa Lesa Bwalitendeka Ukuteka! kuti mwamona ifyo abantu babomba sana umulimo wa kubila imbila nsuma mu myaka fye 100 iyapitapo. Na kabili kuti mwamona ifyo icilonganino ca kwa Lesa cibombesha pa kuti cilesambilisha Abena Kristu ba cine, cilelenga balewina imilandu mu filye, e lyo ne fyo cibomfya bwino ifyakupangapanga ifyo balepanga muno nshiku pa kucita ukufwaya kwa kwa Lesa!

²⁹ Nga twatontonkanya pali fyonse ifyo icilonganino ca kwa Lesa cacita, pa kuti ukupepa kwasanguluka kubeko na kabili muli shino inshiku sha kulekelesha muli cino calo cabipa, tulashininkisha ukuti iceleta lya kwa Yehova lyalitwalilila ukwenda. Ala twalipaalwa ifi twaba muli ici cilonganino na pali ifi tubombela Mulopwe Yehova!—Amalu. 84:10.

30. Finshi tukasambilila mu cipandwa cikonkelepo?

³⁰ Kwaliba na fimbi ifyo twingasambililako ku fimonwa Esekiele amwene. Mu cipandwa cikonkelepo tukalanda sana pa “fya mweo 4” nelyo bakerubi. Finshi ifi ifya mweo 4 fingatusambilisha pali Mulopwe, Yehova Lesa wesu?