Kalata Ukufuma Kwi Bumba Litungulula
Kuli mwe Batemwa Yehova:
Mu 1971, bonse abasangilwe ku kulongana kwa citungu ukwaleti “Ishina lya BuLesa,” balitemenwe sana ilyo bapokelele impapulo ishipya. Icitabo ca Ilyashi lya Nte sha kwa Yehova ica mu 1972 calandile pali ishi impapulo ukuti, “takwali nangu umo uwale-enekela ukupokelela impapulo shawama ifi.” Munyinefwe umo alandile pa lupapulo lumo pali ishi impapulo ishipya ukuti: “Cintu icawamisha ico tushatala atukwatapo icilenga twaishiba ifikacitika ku ntanshi!” Lupapulo nshi alelandapo? Citabo icaleti “The Nations Shall Know That I Am Jehovah”—How? Nomba cinshi abantu batemenwe sana ici icitabo? Pantu mwali ifipya ifyo balondolwele pa masesemo yaba mwi buuku lya kwa Esekiele—amasesemo ayalanda pa fikacitikila abantu bonse ku ntanshi.
Mu myaka yakonkelepo ukutula apo icitabo ca ‘Know Jehovah’ cafumiine, abantu ba kwa Lesa balifulilako sana. Abaali fye nalimo 1.5 milioni, balicila pali 8 milioni. (Esa. 60:22) Aba ababomfi ba kwa Yehova abengi nga nshi, balanda indimi ishalekanalekana ukucila pali 1,000. (Seka. 8:23) Abengi tabatala abasambililapo mu citabo icalondolola sana amasesemo ayo kasesema Esekiele alembele.
Na kabili, ukutula mu mwaka wa 1971, twalyalulako ifingi pa fyo twaishibe pa cine icaba mu Baibo, pantu ulubuuto lulaya lulebuutilako fye. (Amapi. 4:18) Mu mwaka wa 1985, twalitendeke ukumona bwino bwino ifyo Lesa amona aba mu “mpaanga na shimbi” ukuti balilungama kabili fibusa fyakwe. (Yoh. 10:16; Rom. 5:18; Yako. 2:23) Lyena mu mwaka wa 1995, twalishibe pa muku wa kubalilapo ukuti abantu bakabapingula ukuti ni “mpaanga” nelyo ni “mbushi” mu nshita ya “bucushi ubukalamba” ubuleisa. (Mat. 24:21; 25:31, 32) Ifi fyonse twaishileishiba fyalengele twaumfwikisha bwino ifyaba mwi buuku lya kwa Esekiele.
“We mwana wa muntu, ulolekeshe, umfwikishe, kabili ubikeko sana amano kuli fyonse ifyo nalakulanga, pantu e co bakuleteele kuno.”—ESEKIELE 40:4
Muli ino myaka, ulubuuto lwalitwalilila ukubuutilako. Tontonkanyeni pa masambililo tusambilila ku filangililo Yesu alandile. Ino nshita twalyumfwikisha bwino bwino umwalola ifilangililo Yesu alandile. Ifilangililo ifingi filanda pa fili no kucitika nomba line mu bucushi bukalamba ubuleisa bwangu bwangu. Ifi fine e fyo caba na ku masesemo yamo ayaba mwi buuku lya kwa Esekiele, nomba twalyumfwikisha umo yalola. Amasesemo yamo pali aya ni aya: Ubusesemo bulanda pali Goge wa ku Magoge (ifipandwa 38 na 39), ubusesemo ubulanda pa mulimo uo umwaume uwakwata ako kalemba abikamo inki abomba (icipandwa 9), ubusesemo ubulanda pa mpanga iyabatama umwaba amafupa ayauma e lyo no busesemo ubulanda pa kusuntinkanya utumuti tubili (icipandwa 37). Ifi fyonse nomba twaishiba, fyalenga twa-alulako ifyali mu citabo ca ‘Know Jehovah’ icalembelwe kale sana.
E mulandu wine abantu ba kwa Yehova abengi muno nshiku bepushisha ukuti, “Ni lilali tukakwata icitabo umo bakalondolola ifyebo ifipya pa masesemo yaba mwi buuku lya kwa Esekiele?” Mukwai nomba natukwata ici citabo, e kuti icitabo citila Yehova Asuka Abwesha—Ukupepa Kwasanguluka! Ilyo mwakulabelenga ifipandwa 22 ifyaba muli ici citabo no kutontonkanyapo sana pa filangililo ifisuma ne fikope ifyabamo, mukapapa sana pa fyo bafwailishe bwino bwino pa kuti balembe ici citabo. Balipepeelepo no kutontonkanyapo sana pa kuti beshibe icalengele Yehova abike mu Baibo ibuuku lya kwa Esekiele ilisuma sana. Balitontonkenye pa mepusho pamo nga: Finshi aba mu nshiku sha kwa Esekiele balesambililako kwi buuku lya kwa Esekiele, kabili na ifwe muno nshiku finshi tusambililako? Masesemo nshi ayalanda pa fikacitika ku ntanshi? Bushe tufwile ukulamona ifyaba mu masesemo ya kwa Esekiele ukuti fyalikwata ifyo fimininako? Amasuko ya aya mepusho yalenga twaishiba bwino bwino ifyaba muli ili ibuuku ilyo twatemwa ukubelenga.
Nga mwabelenga ibuuku lya kwa Esekiele lyonse, nangu cibe shani kuti mwapapa pa fyo ulubali lwa ku muulu ulwa cilonganino ca kwa Yehova lwaba. Ukwabula no kutwishika mulapapa na pa mafunde ayacila amafunde yonse, ayo Yehova apeela aba ku muulu na ba pano isonde pa kuti balemupepa ukulingana ne fyo afwaya. Icitabo ca Ukupepa Kwasanguluka cili no kulenga mukaletasha sana pa fyo Yehova acitila abantu bakwe e lyo na pa fyo ali no kubacitila ku nshita ya ku ntanshi iili mupepi. Muli no kumona ukuti cino citabo cilakomaila sana pa malyashi yabili. Ilyashi lya kubalilapo, nga tulefwaya ukulacita ifyo Yehova atemwa, tufwile ukwishiba no kusumina ukuti e walinga ukuteka ku muulu na pano isonde. Ilyashi lyalenga bubili, tufwile ukulapepa Yehova ukulingana ne fyo afwaya, no kulacita ifintu ukulingana na mafunde yakwe.
Tulefwaisha ukuti cino citabo cikalenge mukalefwaisha ukupepa Yehova mu nshila iingalenga ishina lyakwe ilikalamba kabili ilya mushilo lyacindikwa. Na kabili, nacilelenga mulefwaisha inshita ikafike ilyo inko shonse shikamwishiba ukuti ni Yehova.—Esek. 36:23; 38:23.
Shifwe uwatutemwa Yehova, nalemupaala nga nshi ilyo muleibikilishako ukumfwikisha ifyaba mwi buuku ilyo alengele kasesema Esekiele ukulemba.
Nifwe bamunyinenwe,
Ibumba Litungulula Ilya Nte sha kwa Yehova