Ukwishiba Umo Amasesemo Ya Kwa Esekiele Yalola

UBUPILIBULO—BUSHE UBUSESEMO NI CINSHI?

Mu Baibo ishiwi lya ciHebere ilya kuti na·vaʼʹ, ilyo bapilibula ukuti “ukusesema,” lilanda maka maka pa kubila imbila iyafuma kuli Lesa, pa kubila ubupingushi, pa kusambilisha abantu ukuba ne mibele iisuma, nelyo pa kubilisha ifunde lya kwa Lesa. Ili ishiwi kuti lyapilibula no kubila imbila ya kwa Lesa iya fintu ifili no kucitika. Ubusesemo bwa kwa Esekiele bwalilanda pali fyonse ifi twalandapo.—Esek. 3:10, 11; 11:4-8; 14:6, 7; 37:9, 10; 38:1-4.

INSHILA LESA ALE-EBELAMO ESEKIELE IFYEBO

• 

  IFIMONWA

• 

  IFILANGILILO

• 

  UKULANGILILA IFYALI NO KUCITIKA

Mwi buuku lya kwa Esekiele mwaliba ifimonwa fya busesemo, ifilangililo, imilumbe, no kulangilila ifyacitike.

UKUFIKILISHIWA

Inshita shimo ubusesemo bwa kwa Esekiele bulafikilishiwa ukucila pa muku umo. Ku ca kumwenako, ubusesemo bwalanda pa kulenga ifintu fyaba nge fyo fyali pa kubala ku bantu ba kwa Lesa, bwalifikilishiwe pa muku wa kubalilapo ilyo abantu ba kwa Lesa babweleele ku Calo ca Bulayo. Nomba nga fintu icipandwa 9 ica cino citabo calandapo, amasesemo ayengi ayalanda pa kulenga ifintu fyaba nge fyo fyali pa kubala yalefikilishiwa muno nshiku kabili yakafikilishiwa na kabili ku ntanshi.

Kale twalemona ukuti ifingi ifyaba mu busesemo bwa kwa Esekiele fyalikwata ifyo fimininako ifikacitika ku ntanshi. Nomba cino citabo tacilondolola ukuti umuntu umo, icintu, icifulo, nelyo icacitika cilemininako ubusesemo ubufwile ukufikilishiwa muno nshiku, kano nga ca kuti e fyo Amalembo yalanda.a Lelo cilanda sana pa fyo amasesemo ayengi aya kwa Esekiele yakafikilishiwa umupwilapo. Nacilanda na pa fyo twingasambilila ku mbila Esekiele alebila, ku bantu abo alandapo, ku ncende na ku fyalecitika ifyo alandapo.