ICIPANDWA 22
“Ulepepa Lesa”
IFYO TWALALANDAPO SANA: Ukupituluka mu malyashi ayakalamba ayaba mwi buuku lya kwa Esekiele no kumona ifyo yatukuma muno nshiku e lyo ne fyo yakatukuma ku ntanshi
1, 2. (a) Finshi bonse tufwile ukusalapo? (b) Finshi malaika wa cishinka acitile ilyo balefwaya ukumupepa?
IFWE umo umo tufwile ukwasuka ici cipusho icakosa: Nani mfwile ukulapepa? Abantu abengi nalimo kuti balanda ukuti ici cipusho cintu ca-anguka ukwasuka, pantu uo tufwile fye ukulapepa ni Lesa. Lelo tatulanda fye pa kanwa ukuti tufwile ukulapepa Lesa. Ifyo tucita filalanga nampo nga tupepa Yehova Lesa nelyo Satana Kaseebanya.
2 Satana alafwaisha ukulamupepa. Caishileishibikwa sana ukuti ifi e fyo afwaisha ilyo atunkile Yesu. Nga fintu twalandilepo mu Cipandwa 1 muli cino citabo, Satana alaile Yesu ukuti ali no kumupeela icilambu icisuma sana, e kutila ukumupeela amaka pa mabufumu yonse aya pano isonde. Finshi Satana Kaseebanya alefwaya ukuti Yesu acite? Aebele Yesu ati: ‘Fukama no kumpepa.’ (Mat. 4:9) Lelo malaika uwasokolwelele umutumwa Yohane ifyaba mwi buuku lya Ukusokolola, ena alikeene ukumupepa. (Belengeni Ukusokolola 22:8, 9.) Ilyo Yohane alefwaya ukupepa malaika, uyu malaika umwana wa kwa Lesa uwaicefya amwebele ati: “Wiesha ukucita ifyo!” Uyu malaika taebele Yohane ukuti ‘Mpepa,’ lelo amwebele ukuti, “Ulepepa Lesa.”
3. (a) Cinshi balembela cino citabo? (b) Finshi twalalandapo nomba?
3 Ico balembela cino citabo, kulenga tulefwaisha ukucita ifyo malaika alandile, e kutila ukulapepa fye Yehova Lesa eka. (Amala. 10:20; Mat. 4:10) Natupitulukemo panono mu fyo tusambilile pa kupepa kwasanguluka mu busesemo bwa kwa Esekiele e lyo na mu fimonwa amwene. Lyena twalabomfya amalembo pa kuti twishibe ifikacitika ku ntanshi ilyo umuntu onse pano isonde akeshiwa ubwesho bwa kulekeleshako, e kutila ubwesho ubukalenga abakabako ilyo Yehova akabwesha ukupepa kwasanguluka konse bakeshibikwe.
Amalyashi Yatatu ayo Balandapo Sana mwi Buuku lya kwa Esekiele
4. Malyashi nshi yatatu ayo balandapo sana mwi buuku lya kwa Esekiele?
4 Ibuuku lya kwa Esekiele litusambilisha ukuti, pa kuti tulepepa Yehova mu nshila iyasanguluka, tufwile (1) ukulapepa fye Yehova eka, (2) ukuba abaikatana ilyo tulepepa Yehova mu nshila iyasanguluka, na (3) ukulacita ifilanga ukuti twalitemwa abantu. Moneni ifyo amasesemo ne fimonwa ifyo twasambililapo muli cino citabo filanda sana pali aya amalyashi yatatu.
Ilyashi lya kubalilapo: Ukulapepa fye Yehova eka
5-9. Finshi twasambilila pa kulapepa fye Yehova eka?
5 Icipandwa 3:a Icimonwa ca kupapusha ica kwa Yehova umo umukolamfula wamushinguluka, kabili umo anina pa fibumbwa fya ku mupashi ifya maka, citusambilisha icishinka icacindama ica kuti, Uwa Maka Yonse eka e walinga fye ukumupepa.—Esek. 1:4, 15-28.
6 Icipandwa 5: Esekiele calimupapwishe sana ilyo amwene mu cimonwa abantu balekowesha itempele lya kwa Yehova! Ici icimonwa cilangilila ukuti takuli nangu cimo ico Yehova engafilwa ukumona. Alamona ifyo abantu bakwe bacita ifilanga ukuti nabaleka ukuba aba cishinka kuli ena, pamo nga ukupepa utulubi. Alamona ifya musango uyu na lintu abantu baleficitila mu bumfisolo. Ifi abantu bacita filakalifya sana Yehova umutima, kabili alakanda bonse abaficita.—Esek. 8:1-18.
7 Icipandwa 7: Filya Yehova apingwile inko ishashingulwike abena Israele ‘ishalebatumfya,’ filanga ukuti Yehova akalubulwisha bonse abacusha abantu bakwe. (Esek. 25:6) Lelo tulasambililako isambililo na limbi kuli filya abena Israele baleumfwana ne shi inko. Tusambililako isambililo lya kuti, tufwile ukuba aba cishinka sana kuli Yehova ukucila ifyo twaba aba cishinka ku fintu fimbi. Tatufwile ukuleka ukukonka ifyo Yehova atweba pa kuti fye tuleumfwana na balupwa lwesu abashipepa Yehova; kabili tatufwile ukucetekela sana ifyuma nelyo ukulaitumpa mu fya calo pa kuti tube sana aba cishinka ku buteko ukucila ukuba sana aba cishinka kuli Yehova.
8 Ifipandwa 13 na 14: Icimonwa ce tempele ilyali pa lupili ulutali sana citusambilisha ukuti tufwile ukulakonka amafunde ya kwa Yehova, no kwishiba ukuti alicila tulesa tonse.—Esek. 40:1–48:35.
9 Icipandwa 15: Filya ubusesemo bulondolola Israele na Yuda ukuti bali nga bacilende, fitwibukishako ifyo Yehova apata sana bucilende bwa ku mupashi.—Esek., ifipa. 16, 23.
Ilyashi lyalenga bubili: Ukutwalilila ukuba abaikatana ilyo tulepepa Yehova mu nshila iyasanguluka
10-14. Finshi balandapo sana ifilanga ukuti tufwile ukutwalilila ukuba abaikatana ilyo tulepepa Yehova mu nshila iyasanguluka?
10 Icipandwa 8: Amasesemo ayalaile ukuti Yehova ali no kwimya “kacema umo” uwa kusakamana abantu bakwe, yatukoselesha ukuba abaikatana ilyo tulemubombela no kuba aba mutende ilyo Yesu aletutungulula.—Esek. 34:23, 24; 37:24-28.
11 Icipandwa 9: Muno nshiku abantu abafwaya ukucita ifyo Yehova afwaya, balasambililako ku masesemo ya kwa Esekiele ayalanda pa fyo abantu ba kwa Lesa bali no kubalubula mu Babiloni umo bali bankole no kubabwesesha ku calo cabo. Abapepa Yehova mu nshila iyasanguluka bafwile ukutaluka kuli fyonse ifingakowesha ukupepa kwabo ifyaba mu mipepele ya bufi, kabili bafwile ukutwalilila ukuba abasanguluka. Nangu ca kuti twafuma mu mipepele iingi, nampo tuli bapiina nelyo tuli bakankaala, kabili inkulilo shesu shalipusanapusana, tufwile ukutwalilila ukuba abaikatana pa kuti cileishibikwa ukuti tuli bantu ba kwa Lesa.—Esek. 11:17, 18; 12:24; Yoh. 17:20-23.
12 Icipandwa 10: Ilyashi ililanda pa kwikatana, balililandapo mu cimonwa ca mafupa ayauma ayaishileba no mweo. Ala twalishuka nga nshi ifi twaba pa bantu abo Yehova asangulula, ababombela pamo nga bashilika!—Esek. 37:1-14.
13 Icipandwa 12: Ukwikatana balikulandilepo sana mu busesemo ubulanda pa tumuti tubili utwaishileba akamuti kamo. Icitetekelo cesu cilakoselako nga twamona ifyo abasubwa ne mpaanga shimbi bafikilisha ubu ubusesemo! Nangu ca kuti twikala mu calo umo abantu bashaikatana pa mulandu no ko bapepa e lyo na pa mulandu wa kuti ifikansa fya calo fyalilenga bapatana, ifwe twalikatana pa mulandu wa kuti twalitemwana, kabili tuli ba cishinka.—Esek. 37:15-23.
14 Icipandwa 16: Mu cimonwa icilanda pa mwaume uwakwete ako kalemba abikamo inki e lyo na baume abakwete ifyanso fya kutobawilako, mwaliba ukusoka kwa kuti abakalapepa Yehova mu nshila iyasanguluka ilyo “ubucushi ubukalamba” bukatendeka, e bo bakashila fye akashilwa ka kupusuka.—Mat. 24:21; Esek. 9:1-11.
Ilyashi lyalenga butatu: Ukulacita ifilanga ukuti twalitemwa abantu
15-18. Mulandu nshi tulingile ukutwalilila ukucita ifilanga ukuti twaliba no kutemwa, kabili finshi twingacita pa kulanga ukuti twaliba no kutemwa?
15 Icipandwa 4: Icimonwa ca fya mweo 4 citusambilisha pa mibele Yehova akwata, kabili imibele iyapulamo pali iyi, kutemwa. Nga tulelanda no kucita ifintu mu nshila iilanga ukuti twaliba no kutemwa, tulanga ukuti Yehova e Lesa wesu.—Esek. 1:5-14; 1 Yoh. 4:8.
16 Ifipandwa 6 na 11: Apo Yehova aliba no kutemwa, alibikileko bakalinda pamo nga Esekiele. Pa mulandu wa kuti Lesa kutemwa, tafwaya umuntu nangu umo akonaulwe ilyo akonaula cino calo ico Satana ateka. (2 Pet. 3:9) Twalikwata ishuko lya kulanga ukutemwa kwa kwa Lesa ilyo tuletungilila umulimo kalinda wa muno nshiku abomba.—Esek. 33:1-9.
17 Ifipandwa 17 na 18: Yehova alishiba ukuti abantu abengi bakakaana uluse lwakwe kabili bakalafwaisha ukulofya ababomfi bakwe aba cishinka abamupepa. Ukutemwa Yehova akwata kukalenga akacingilile abantu bakwe ilyo “Goge wa mu calo ca Magoge” akasansa ababa ne cishinka kuli Yehova. Apo twalitemwa abantu, cilenga tulesoka abantu abengi ukuti Yehova akonaula bonse abacusha abantu bakwe.—Esek. 38:1–39:20; 2 Tes. 1:6, 7.
18 Ifipandwa 19, 20, na 21: Icimonwa ca kamana umwaba amenshi ayalenga ifintu fyaba no mweo, e lyo ne cimonwa icilanda pa kwakanya impanga, filalanga sana ukuti Yehova alitemwa abantu. Ifi ifimonwa filalondolola ifyacitika ifi Yehova alangile ukutemwa ukukalamba ilyo apeele ubumi bwa Mwana wakwe pa kuti aletwelela imembu, kabili tukaipakishe ubumi ubwapwililika mu lupwa lwa kwa Lesa. Inshila imo iisuma sana iyo tulangilamo ukuti twalitemwa abantu, kulabebako pa fintu ifisuma ifikacitika ku ntanshi ifyo Yehova apekanishisha abatetekela Umwana wakwe.—Esek. 45:1-7; 47:1–48:35; Ukus. 21:1-4; 22:17.
Pa Numa ya Kuteka Imyaka 1,000 Yesu na ba 144,000 Bakacita Ifikalanga Ukuti Bali-icefya Nga Nshi
19. Finshi Yesu akacita mu Myaka 1,000 Iyo Akalateka? (Moneni akabokoshi akaleti “Ukweshiwa Ubwesho bwa Kulekeleshako.”)
19 Mu Myaka 1,000 iyo Yesu Akalateka, akalenga abantu abengi nga nshi bakabe no mweo na kabili. Kabili akafumyapo ukukalipwa uko ‘imfwa, umulwani’ wesu, yaleta. (1 Kor. 15:26; Marko 5:38-42; Imil. 24:15) Ukutula fye na kale, abantu balaba sana no bulanda kabili balafwilwa. Lelo ilyo Yesu akalabuusha abantu, akabalubula ku fyabipa ifyalelenga baleba no bulanda, kabili akabapeela ishuko lya kwikala bwino no kuba no bumi ubusuma. Yesu akabomfya ilambo lya cilubula pa kufumyapo ifyabipa ificitikila abantu pa mulandu wa kulwala, inkondo, amalwele, ne fipowe. Ne cacilapo ico akatucitila ca kuti, akatwafwa ukufumyapo icilenga tuleba no bulanda, e kutila ulubembu ulo twapyana kuli Adamu. (Rom. 5:18, 19) Yesu ‘akonaula imilimo ya kwa Satana Kaseebanya’ yonse. (1 Yoh. 3:8) Finshi fikacitika pa numa ya ifi?
Abakabuushiwa bakakwata ishuko lya kwikala bwino no kuba no bumi ubusuma
20. Bushe Yesu na ba 144,000 bakalanga shani ukuti bali-icefya icine cine? Londololeni. (Moneni icikope pa ntendekelo.)
20 Belengeni 1 Abena Korinti 15:24-28. Ilyo abantu bonse bakapwililika na lintu isonde lyonse likaba Paradaise nga fintu Yehova alefwaya pa kubala, Yesu na ba 144,000 abo akateka nabo bakacita ifikalanga ukuti bali-icefya icine cine; bakabwesesha Ubufumu kuli Yehova. Bakaitemenwa ukubwesesha Yehova amaka bakwete pa myaka 1,000 kabili bakacita ifi mu mutende. Fyonse ifyo Ubufumu bukacita fikabako umuyayaya.
Ubwesho bwa Kulekeleshako
21, 22. (a) Bushe icalo cikaba shani ilyo imyaka 1,000 ikapwa? (b) Cinshi Yehova akakakwila Satana ne fibanda?
21 Lyena Yehova akacita icintu ica kupapusha icikalanga ukuti akacetekela sana abantu bakwe pano isonde. Akalanda ukuti Satana ne fibanda babafumye mu cilindi icabula impela umo bakabesalila pa myaka 1,000. (Belengeni Ukusokolola 20:1-3.) Abantu abo Satana ne fibanda fyakwe bakamona, e lyo ne sonde ilyo bakamona, fikapusanako ne fyo baishibe. Ilyo kushilaba Armagedone, Satana alilufishe abantu abengi nga nshi, kabili abantu tabaikatene pa mulandu wa lupato na kapaatulula. (Ukus. 12:9) Lelo ilyo imyaka 1,000 ikapwa, abantu bonse bakekatana kabili bakaba ulupwa lumo ulwatemwana ilyo bakalapepela pamo Yehova. Isonde lyonse likaba Paradaise kabili mukaba umutende.
22 Cinshi Yehova akakakwila ifi ifipondo, Satana ne fibanda fyakwe pa nshita mu calo mukaba umutende? Ni co abantu abengi abakabako ilyo imyaka 1,000 ikapwa, tabaeshiwepo pa kuti balange ukuti ba cishinka kuli Yehova. Abengi bafwile ninshi tabaishiba Yehova e lyo baisababuusha mu Paradaise. Yehova tabapeele fye ubumi, lelo alebapeela na fyonse ifyo balekabila mu mikalile na mu fya kwa Lesa. Takwali abantu abalebatunka ukucita ifyabipa, lelo baleba fye na bantu abalelenga balecita ifisuma. Baleba na bantu abatemwa Yehova kabili abalemubombela. Satana kuti abepesha aba abakabuushiwa ubufi bumo bwine nga bulya abepesheko Yobo ubwa kuti, icilenga balebombela Lesa ni co alabacingilila kabili alabapaala. (Yobo 1:9, 10) Kanshi ilyo Yehova ashilalemba amashina yesu mwi buuku lya mweo pa kuti yakabemo umuyayaya, akatupeela ishuko lya kulanga apabuuta tuutu ukuti tuli ba cishinka kuli ena apo ni Shifwe kabili Kateka wesu.—Ukus. 20:12, 15.
23. Bwesho nshi umuntu onse akakwata?
23 Satana bakamupeela inshita iinono iya kubeleleka abantu pa kuti bakaleke ukubombela Lesa. Bushe ubu bukaba bwesho nshi? Ukwabula no kutwishika, cila muntu akeshiwa nga filya Adamu na Efa baeshiwe, e kutila akakwata ubwesho bwa kusalapo nampo nga kulakonka amafunde ya kwa Yehova, ukulatungilila imitekele yakwe no kulamupepa, nelyo nga kupondokela Lesa no kulatungilila Satana.
24. Cinshi Baibo itila abakapondokela Lesa ukuti Goge na Magoge?
24 Belengeni Ukusokolola 20:7-10. Baibo ita abakapondokela Lesa ilyo imyaka 1,000 ikapwa ukuti Goge na Magoge. Bakalanga imibele imo ine iyo bacipondoka bakwata abo Esekiele asesemepo ukuti, bakasansa abantu ba kwa Lesa mu nshita ya bucushi bukalamba. Lilya ibumba lya kubalilapo ilyo beta ukuti “Goge wa mu calo ca Magoge,” lyapangwa ne nko ishingi ishilwisha imitekele ya kwa Yehova. (Esek. 38:2) Na bakapondoka ilyo Imyaka 1,000 iyo Kristu Akateka ikapwa, babeta ukuti “inko.” Ifi babomfya ili ishiwi lya kuti inko filapapusha. Mulandu nshi? Pantu mu Myaka 1,000 iyo Kristu Akalateka, kukaba fye uluko lumo, takwakabe inko ishalekanalekana. Abantu bonse bakalatekwa no buteko bumo, Ubufumu bwa kwa Lesa. Tukaba fye uluko lumo ulwa kwa Lesa. Ifi ubusesemo bwita abakapondoka ukuti Goge na Magoge, no kuti bakaba “inko,” filangilila ukuti Satana akalenga abantu ba kwa Lesa bamo bakapaatukane. Takuli nangu umo uo bakapatikisha ukuba ku lubali lwa kwa Satana. Umuntu onse uukaba uwapwililika akaisalilapo fye umwine nampo nga kuba ku lubali lwa kwa Yehova, nelyo ulwa kwa Satana.
Baibo ita abakapondokela Lesa ukuti Goge na Magoge (Moneni paragrafu 24)
25, 26. Ni banga abakailunda kuli Satana, kabili finshi fikabacitikila?
25 Bantu banga bakasalapo ukuba ku lubali lwa kwa Satana? Abakapondoka ‘bakafula ngo mucanga wa pali bemba.’ Aya amashiwi tayalepilibula ukuti abakapondoka bakafula nga nshi ukucila abashakapondoke. Twaishiba shani? Tontonkanyeni pa fyo Lesa alaile Abrahamu. Yehova aebele Abrahamu ukuti abakatuntuka mu mwana wakwe, bali no kufula “ngo mucanga wa mu lulamba lwa bemba.” (Ukute. 22:17, 18) Nomba abatuntwike mu mwana wakwe baishileba 144,001. (Gal. 3:16, 29) Nangu ca kuti iyi impendwa ikalamba, inono sana nga kuilinganya ku mpendwa ya bantu bonse. Ifi fine e fyo cikaba na ku bakasalapo ukuba ku lubali lwa kwa Satana, nangu ca kuti bakaba abengi, tabakafule nga nshi. Aba abakapondoka tabakatiinye sana ababomfi ba kwa Yehova aba cishinka.
26 Abakasalapo ukuba ku lubali lwa kwa Satana, bakabonaula ukwabula no kupoosa inshita. Aba bonse bakalobela pamo na Satana ne fibanda fyakwe, kabili tabakatale ababako na kabili. Ifyabipa ifyo bakasalapo ukucita ne fyabipa ifikafuma mu fyo bakasalapo ukucita, e fyo tukalaibukisha fye inshita yonse.—Ukus. 20:10.
27-29. Bushe Yehova akalambula shani abakacimfya ubwesho bwa kulekeleshako?
27 Nomba abakacimfya ubwesho bwa kulekeleshako, amashina yabo yakalembwa mwi “buuku lya mweo” umuyayaya. (Ukus. 20:15) Lyena abana ba kwa Yehova aba cishinka, abaume na banakashi, bakaba ulupwa lumo ulwaikatana kabili bakalamupepa pantu e walinga ukumupepa fye eka.
28 Tontonkanyeni pa fyo ifintu fikaba ku ntanshi pali ilya nshita. Mukalabomba imilimo iikalalenga mukalesekelela kabili mukakwata ifibusa ifisuma. Imwe na balupwa lwenu ne fibusa, tamwakabale amuculapo na kabili. Tamwakalekabila icilubula pa kwiminina pa ntanshi ya kwa Yehova pantu tamwakakwate ulubembu. Takuli icikalacilikila umuntu onse ukuba cibusa wa kwa Lesa. Ne cacindamisha ca kuti aba ku muulu na ba pe sonde bonse, bakalapepa bwino Yehova mu nshila iyasanguluka ukulingana ne fyo afwaya. Pali iyi nshita Yehova akapwishishisha ukubwesha ukupepa kwasanguluka!
Ilyo mukapwililika, tamwakalekabila icilubula pa kwiminina pa ntanshi ya kwa Yehova pantu tamwakakwate ulubembu (Moneni paragrafu 28)
29 Bushe mukabako ilyo kukaba ubu ubushiku ubukalamba? Kuti mwabako nga mwatwalilila ukucita ifintu fitatu ifikalamba ifyo twasambilila mwi buuku lya kwa Esekiele, e kutila, ukulapepa fye Yehova eka, ukuba abaikatana ilyo mulepepa Yehova mu nshila iyasanguluka, no kulacita ifilanga ukuti mwalitemwa abantu. Kuli na cimbi icacindama kabili ica kulekeleshako ico tusambilila ku masesemo ya kwa Esekiele. Ni cinshi ico cine?
Elenganyeni ifyo kukaba ukusekelela ilyo ifibumbwa fyonse ifya ku muulu ne fya pano isonde fikekatana ilyo fikalapepela pamo Yehova mu nshila iyasanguluka (Moneni amaparagrafu 27-29)
“Bakeshiba Ukuti Nine Yehova”
30, 31. Bushe amashiwi ya kuti “bakeshiba ukuti nine Yehova” yakapilibula cinshi (a) ku balwani ba kwa Lesa? (b) ku bantu ba kwa Lesa?
30 Mwi buuku lya kwa Esekiele lyonse, amashiwi ya kuti “bakeshiba ukuti nine Yehova” baliyalandapo imiku iingi. (Esek. 6:10; 39:28) Ku balwani ba kwa Lesa, aya amashiwi yakapilibula ukuti kwalaba inkondo ne mfwa. Bakapatikishiwa ukucitapo na fimbi ukucila pa kusumina fye ukuti Yehova e ko aba. Ilyo ifyabipa fikabacitikila, e lyo bakeshiba umwalola ishina lya kwa Lesa ilikalamba ilipilibula ukuti, “Alalenga Ifintu Fyabako.” “Yehova wa mabumba” akaba “umwaume wa maka uwaishiba ukulwa inkondo” kabili akabalwisha. (1 Sam. 17:45; Ukufu. 15:3) Ilyo bakeshiba ici icishinka icacindama ica kuti, takuli nangu cimo icingalesha Yehova ukucita ifyo afwaya, ninshi inshita ya kuti bacitepo cimo naipwa.
31 Ku bantu ba kwa Lesa, amashiwi ya kuti “bakeshiba ukuti nine Yehova,” yakapilibula ukuti kwalaba umutende no mweo. Yehova akalenga tukabe nge fyo alefwaya tube pa kubala, e kutila ukuba abana bakwe abaume na bana bakwe abanakashi abakalalanga bwino bwino imibele yakwe. (Ukute. 1:26) Na kuba, Yehova aliba kale Shifwe uwatutemwa kabili Kacema uutucingilila. Nomba line ali no kuba Imfumu iikacimfya abalwani besu. Ilyo ubu ubushiku bushilafika, natuletontonkanya sana pa fyaba mwi buuku lya kwa Esekiele. Cila bushiku natulelanga mu fyo tulanda na mu fyo tucita ukuti, Yehova twalimwishiba kabili twalishiba ne fyo afwaya. Lyena ilyo bakalekelako umwela wa bonaushi uwa bucushi bukalamba, tatwakatiine. Lelo tukenuna imitwe yesu pantu tukeshiba ukuti ukulubuka kwesu kwapalama. (Luka 21:28) Ilyo ifi fishilacitika, natuleafwa abantu konse fye, pa kuti beshibe no kutemwa Lesa uwalinga ukumupepa, kabili uwakwata ishina ilikalamba ukucila amashina yonse, ilya kuti Yehova.—Esek. 28:26.
a Amanamba ya fipandwa, yalelanga ifipandwa fya muli cino citabo.