Ifyo Tusambilila Ku Cimonwa Ce Tempele Ico Esekiele Amwene

Ukupepa Kwasanguluka Kwaba pa Muulu Kabili Kwacingililwa

Itempele lya mu cimonwa lili pa muulu wa “lupili ulutali sana” (1). Bushe twalibika ukupepa kwasanguluka pa muulu ica kuti e kwacindamisha mu mikalile yesu?

Ilinga (2), ilyashingulwike incende iikalamba iye tempele (3), e lyo pa kati ka iko pali itempele, litwibukishako ukuti tatufwile ukuleka icintu nangu cimo cakowesha ukupepa kwesu. Nga ca kuti ifintu ifyo tucita cila bushiku ifishakuma ukupepa kwesu tufwile ukufitalusha ku kupepa kwasanguluka, ninshi no muntu uupepa Yehova muno nshiku afwile ukucilapo ukutaluka ku mibele yakowela.—Esek. 42:20.

Amapaalo ya Muyayaya

Umulonga uufumine mu ncende ya mushilo iye tempele, wakula wakwata no mukuku uukalamba, kabili walenga ifintu fyaba no mweo ne mpanga yaba no mufundo (4). Aya mapaalo tukayalandapo mu cipandwa 19 muli cino cine citabo.

Amafunde Yamo Yene ku Bantu Bonse

Impongolo ishitali isha kunse (5) ne mpongolo sha mu kati (9) shitwibukishako ukuti Yehova alibikako amafunde ayacila amafunde yonse, ayalanda pa kuba ne mibele iisuma ayo bonse ababa mu kupepa kwasanguluka balingile ukulakonka. Ishibeni ukuti impongolo sha kunse ne mpongolo sha mu kati shalilingene ubutali. Ifi impongolo shalingene cali fye bwino pantu ababomfi ba kwa Lesa, te mulandu ne cifulo bakwata nelyo imilimo babomba, bakonka amafunde yakwe ayalungama yamo yene.

Ukuliila pe Tebulo lya kwa Yehova

Imiputule ya kuliilamo (8) itwibukishako ukuti kale abantu baleliila pamo amalambo yamo ayo baleleta pe tempele. Ifi balecita cali kwati baleliila pamo na Yehova. Nomba ifi te fyo caba mwi tempele lya ku mupashi umo Abena Kristu bapepela muno nshiku pantu “ilambo limo” lyalituulwa kale pali ili itempele. (Heb. 10:12) Na lyo line tulatuula ilambo lya kulumbanya Lesa.—Heb. 13:15.

Ubushininkisho Ubo Lesa Atupeela

Ifyo malaika apimine mu cimonwa fyalifulishe, nalimo kuti fyamutendusha. Lelo filatusambilisha icishinka icacindama: Filalenga twashininkisha ukuti filya Yehova afwaya ukubwesha ukupepa kwasanguluka fikacitika, tafyakaaluke kabili fya cine, nga filya fine ifyo malaika alepima fyali ifya cine. Nangu ca kuti Esekiele talandapo ukuti alimwenemo umuntu mu cimonwa amwene, alilanda pa fyo Yehova afundile bashimapepo, intungulushi, e lyo na bantu. Ababomfi ba kwa Lesa bonse bafwile ukulakonka amafunde yakwe ayalungama.