Ukusabankanya kwa mu Cibulungwa Conse Ukwa Mbila Nsuma
UBUFUMU bwa kwa Lesa buleteka! Iyi ni mbila iyawamisha ukucila pali shonse. Uyo e mulandu untu mu 1989 ukucila pali 3,700,000 aba Nte sha kwa Yehova ukushinguluke calo mu kukaba babilishe “imbila nsuma” iyasesemwe na Yesu ne “lyashi lya kusekelela” ilyabilishiwe na malaika mu cimonwa ca kwa Yohane. (Mateo 24:14; Ukusokolola 14:6, NW) Nga fintu umutumwa Paulo asosele ukuti: “Icebo cabo cafumine caya pano nse ponse, ne fyebo fyabo fyaya ku mpela sha calo.” (Abena Roma 10:18) Kabili abantu umo umo aba mupepi no luko lonse no mukowa no lulimi na bantu bayankwileko mu kusekelela ku bwite bwabo ku “[kutiina] Lesa, no kumupeelo mucinshi.”—Ukusokolola 14:7.
Takuli Na Kabili Inshuwalansi ya Bumi
Umo uwa musango yo aali mwaume mu England uwasangile imikalile yakwe ukufuma ku kukanashininkishiwa kwa bumi. Ken aali kashitisha wa inshuwalansi, kabili lintu atandalile iŋanda ya Nte sha kwa Yehova, bamwipwishe ukuti: “Bushe kuti watemwa ukwikala mu calo uko inshuwalansi ya bumi ishingaba iyakabilwa?” Cinshi bapilibwile? Ukuti ukulingana na Baibolo, pe samba lya Bufumu bwa kwa Lesa ifintu ifingi ifilenga ubumi ukukanaba ubwashininkishiwa nga nshi nomba, ukusanshako ukulwala ne mfwa, tafyakabeko na kabili.
Bushe icintu ca musango yo kuti cacitika? Ee, Lesa umwine wine alilaya cene. Ku ca kumwenako, Baibolo itila: “Lesa umwine akaba pamo na bo [umutundu wa muntu]: kabili akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.” (Ukusokolola 21:3, 4) Cinshi cikaletako ukwaluka kwa musango yo? Ubufumu bwa kwa Lesa. Ukulingana ne Cebo ca kwa Lesa, mu kwangufyanya ubu “bukashonaula no kupesha aya mabufumu yonse [aya bupolitiki aya kasuba ka muno nshiku], kabili bukeminina umuyayaya.”—Daniele 2:44.
Amalembo ukupala aya yaletelwe ku kusakamana kwa myanda ya mamilioni ya bantu ne Nte sha kwa Yehova mu kati ka kampeini wabo uwa kushimikila uwa mu cibulungwa conse. Abengi, ukupala Ken, baishile ku kumwensekesha ukuti ici tacali fye kutontonkanya kwa kuikopeka. Ubushininkisho buli ubwakosa. Aya malayo ya bulesa ya cishinka kabili yakafikilishiwa mu kwangufyanya.
Imitantikile Yaaluka iya Fyakatamikwa
Abo abakutika ku Nte sha kwa Yehova ilyo balebwekeshapo ukubilisha kwa buseko ukwa kwa malaika besa ku kumwensekesha ukuti ukutiina Lesa no kumupeelo mucinshi kubimbamo ifingi ukucila pa kusumina fye mu malayo ya Baibolo. Cilalula imimwene yabo yonse no kufumyapo ukufulunganishiwa ukwingi ukwa bumi.
Rafael no mukashi wakwe basangile ici ukube ca cine. Bekala mu Argentina, kabili lintu baupene ukucila pa myaka 40 iyapitapo, bacipangile ukuba e buyo bwabo bukalamba mu bumi ukubombesha no kusunge ndalama sha nshita ya ku ntanshi iya mutelelwe. Nangu cibe fyo, imyaka 21 pa numa, ico bali fye no kulangisha pa kubombesha kwabo cali kayanda kanono akakabile ukuwamishiwa kwa libili libili. Tabayumfwile abacilapo kukwato mutelelwe ukucila lintu baupene ntanshi.
Lyene baumfwile mbila nsuma ukufuma ku Nte sha kwa Yehova kabili basambilile umusango wacilapo kuwama uwa cuma no musango wacilapo kuwama uwa mutelelwe. Yesu, mu Lyashi lyakwe ilya pa Lupili, alandile ulwa ici lintu atile: “Mwiilonganikila fyuma pano isonde, apo icipelebesha ca bushiku ne ndalawa filonaula, apo abapupu batulamo no kwiba: lelo ilonganikileni ifyuma mu mulu, umo icipelebesha nangu ni ndalawa tafyonaula, umo abapupu tabatulamo nangu kwiba.”—Mateo 6:19, 20.
Ilintu Baibolo taitusambilisha ukuba abashibomba ukulingana na fintu icuma ca ku mubili cikuminweko, ilatucincisha ukukanabika isubilo lyesu mu fintu fya musango yo. (Lukala Milandu 7:12) Ukucila, tulingile ukubomba ku kunonka ubucindami bwa ku mupashi pa kusambilila Baibolo, ukwishiba ukufwaya kwa kwa Lesa, no kulenga ukucita kwa uko kufwaya icintu ca kubalilapo mu bumi bwesu. (Mateo 6:33) Rafael no mukashi wakwe batampile ukutulaika ici cuma ca ku mupashi, kabili nomba bayumfwa mu cine cine abakankaala, te pa mulandu wa mibele yabo iya mu fya ndalama, lelo pa mulandu wa kwampana kwabo na Lesa. (Ukusokolola 3:17, 18) Ubukombe bwa Bufumu bwa kwa Lesa bwali ni mbila nsuma nga nshi kuli bene.
Icupo Cawamishiwa
Imbila nsuma yalikwata amaka ayatuntulu ku kupwishishisha ubusuma. Ku ca kumwenako, John, uwikala mu England, tali uwasekelela muli Baibolo, lelo umukashi wakwe na bana bali abasekelela. E co batendeke ukusangwa ku kulongana kwa Nte sha kwa Yehova ilintu John aile alenwa ne fibusa fyakwe. Pamo nge ca kufumamo, abele uwabimbwamo mu kunwensha, ukupeepa fwaka, kabili, mu kulekelesha, muli bucisenene. Mu kupelako, ashile umukashi wakwe ukuya mu kwikala no mwanakashi umbi.
Amapange ya kulekana yalitampile. Lelo John alipapushiwe ukumona ukuti umukashi wakwe—uwali nasambilila imyendele ya Bwina Kristu ukufuma ku kusambilila kwakwe ukwa mbila nsuma—nalyo line atwalilile ukumusunga mu kulangulukilako. John tali na maka ya kuumfwikisha umulandu. Imilungu itatu ilyo ukulekana takulafika pa kalume, imyendele ya Bwina Kristu iya kwa muka John yakwete ukusonga kwa iko. Umulume alumbulwile ubulanda bwa cine cine pa myendele yakwe, kabili amapange ya kulekana yalifumishiwepo. John nomba aloleshe mu mbila nsuma umwine wine no kusambilila Baibolo ne Nte sha kwa Yehova. Nomba na o wine ali Mwina Kristu, kabili mu kuba no mukashi wakwe, aleebako bambi ulwa mbila nsuma iya Bufumu.
Muli ishi nshiku sha fyakatamikwa fya lupwa ifiletobaika, abengi balekabila ukwaafwa kuntu imbila nsuma iyashimpwa pali Baibolo ili no kutambika. Umo uwa Nte sha kwa Yehova mu Peru aikele mupepi na mushika wa fita mu kati ka lwendo lwa mu ndeke. Baibimbile mu kulanshanya kabili mushika atampile ukufumfumuna amafya ya lupwa lwakwe, ukusanshako ne cishinka ca kuti umukashi wakwe aali uwakunkuma ku miti ikola kabili aali apepi no kumusha ukuya ku mulumendo. Nte mu kucenjela amulangile ukuti Baibolo ilapeela ukupanda amano kusuma, ukutuntulu pa milandu ya ndupwa no kuti yalimwafwile pa lwakwe ukupikulula impika sha lupwa lwakwe lwine.—Abena Efese 5:21–6:4.
Mushika atashishe Nte pa mashiwi yakwe aya kusansamusha kabili alilembeshe bamagazini ba Ulupungu lwa kwa Kalinda na Loleni! pa kuti engaba na maka ya kulundulula ukwishiba kwakwe ukwa mbila nsuma. Lyene, lintu Nte alefuma mu ndeke, abaupana babili abacaice balyendeshe pa kuti bamusange kabili baipwishe ukulanda nankwe. “Twacikala pa ntanshi fye yenu,” e fyo basosele, “kabili twacumfwa ukulanshanya kwenu nakanabesa. Kuti twatemwa ukulembesha balya bamagazini na ifwe bene.” Na bo bene bafwaile ukusambilila imbila nsuma iingawamya ubumi.
Ubumi Bwaaluka
Mu kulundako, imbila nsuma iyashimpwa pali Baibolo ilalula abantu. Nga fintu umutumwa Paulo asosele ukuti: “Icebo ca kwa Lesa ca mweo, kabili caliluma.” (AbaHebere 4:12) Ici cali ca cine mu mulandu wa mulumendo mu Macedonia, Greece. Alipelenganishiwe pa kwishibo kuti, ukulingana na Baibolo, ishina lya kwa Lesa ni Yehova. E co aipwishe cibusa ukumuletelako Inte sha kwa Yehova mu kwangufyanya nga nshi. Ukulanshanya kubili kwalitantikwe ne Nte, kumo kumo ukwa kwene kwapwile mupepi na maawala yane. Umulumendo lyene atampile isambililo lya lyonse ilya Baibolo, ilya kubalilapo lyapwile ukufikila 2 koloko iya lucelo!
Ukufuma pali lilye sambililo lya kubalilapo, umulumendo mu kwangufyanya alingenye ubumi bwakwe ku fipimo fya Baibolo. Asangilwe ku kulongana ku kupepa ne Nte sha kwa Yehova kabili aishile ku kutemwa Kabumba apakalamba nga nshi. Kabili Yehova mu kukonkapo alimupaalile. Umulungu wa kubalilapo uwe sambililo lyakwe ilya Baibolo, abeyele umushishi wakwe uutali. Umulungu walenga bubili, alekele ukuya ku mayanda ya kuliilamo ifya kulya na ku madisiko ku kufwaya abanankwe ba kucincimusha. Umulungu walenga butatu, apoosele umushanga wakwe uwakulekeleshako. Pa numa ya kusambilila pa myeshi ibili, atendeke ukuilunda ne Nte mu kwebako bambi imbila nsuma iya Bufumu. Ee, aali uwa buseko pa kuti Inte sha kwa Yehova baletele mbila nsuma ku lubali lwakwe ulwe sonde.
Imbila Nsuma mu Cifungo
Nelyo fye fya kucilikila fya cifungo tafili cipindami ku mbila nsuma. Mu Spain umulumendo we shina lya José alebombela ubupingushi bwa mu cifungo ubwa nshita ntali pa mulandu wa bupupu bwa ku mfuti ne milimo imbi iya ntalamisoka. Nangu cibe fyo, Inte sha kwa Yehova bali na maka ya kumweba imbila nsuma, kabili ubukombe bwa Baibolo bwaalwile umupwilapo imimwene yakwe. Yehova ‘akoseleshe’ wene.—Abena Filipi 4:13.
José asosa ukuti kwena kuti pambi apoosa ubumi bwakwe bonse muli iyi micitile ya fintu mu cifungo pa mulandu wa myendele yakwe iya kale. Lelo alibatishiwa kabili nomba ali Mwina Kristu. Umukashi wakwe alibo wa kwafwilisha mu kushangila kuli wene, kabili aleesha ukukusha umwana wabo mwaume umunono mu nshila ya Bwina Kristu. Pali ino nshita, José alakana imbila nsuma na bafungwa banankwe, abantu baafya ukufikako kuli abo abekala ku nse ya fibumba fya cifungo. Nomba umunankwe wa mu kalyati na o wine ali Mwina Kristu wabatishiwa.
Ifi fili fya kumwenako fye finono ku kulanga ifya kufumamo fya kampeini wa kushimikila uwa mu cibulungwa conse uwa Nte sha kwa Yehova. Mu cine cine, imbila nsuma iyabilishiwe na malaika ushimoneka yalibwekeshiwapo ne Nte sha kwa Yehova “[nge lyashi lya kusekelela] . . . ku baikala pe sonde, na ku luko lonse no mukowa no lulimi na bantu.”
Ni mbila iyawamisha pali shonse, kabili e subilo fye lyeka ilya mutundu wa muntu. Tulekucincisha ukuyumfwila. Ukupala Ken na John mu England, ukupala Rafael no mukashi wakwe mu Argentina, ukupala José mu Spain, no kupala imyanda mishila, tuilunda kuli malaika mu kucincisha bonse “[ukutiina] Lesa, no kumupeelo mucinshi, pa kuti naiise nshita ya bupingushi bwakwe; [kabili e co] pepeni uwacitile umuulu ne calo na bemba no tumfukumfuku twa menshi.”—Ukusokolola 14:7.