Ni Nani Akatungulula Umutundu wa Muntu ku Mutende?
BUSHE icishinka ca kuti abantunse te kuti balete umutende cilepilibulo kuti tatwakatale atumono mutende? Iyo. Pamo fye nga fintu Satana, uwakwatisha amaka ukucila fintu twaba, e cipindami cacishapo ku mutende pe sonde, e fyo kwaliba Umo uwacila na po amaka pali Satana uukatungulula mu kupelako umutundu wa muntu ku mutende. Baibolo, iilanda pa lwa kwa Satana, na kabili ilanda pali uyu Umo. Itila: “Bukateka bukaba pa kubeya kwakwe, ne shina lyakwe akenikwa, Kabilo wa cipesha amano, Mulungu impalume; Wishi wa nshita pe, Cilolo wa mutende.” (Esaya 9:6, 7) Ni nani uyu Cilolo wa Mutende? Te umbi ukucila pali Yesu Kristu, kabili kuti aleto mutende pantu alibo wacilapo kulinga ukucila fintu twaba. Mu nshila nshi?
Ukucila Pa Milingo ya Buntunse
Ku cintu cimo, Yesu tali mwina kufwa, ukunakila ku mfwa. Ca cine, aikele ngo muntu no kufwa imfwa ya bulilambo. Lelo lyene alibuushiwe ku bumi bwa ku mulu ubwa bumunshifwa, kabili ni muli iyi mibele e mo abela Cilolo wa Mutende. Uyo e mulandu wine untu ubusesemo busoselo kuti: “Ku bufumu bwakwe takwakabe impela.” (Luka 1:32, 33) Ukupusanako na kateka wa ku Kabanga Aśoka, Yesu akekala ukwabule mpela ku kushininkisha ukuti umulimo wakwe uusuma taonawilwe ne mpyani shacepako.
Mu kulundapo, Yesu taambukilwako no lubembu. Imitekele yakwe yashimpwa pa mano ya bukapepa ne fishinte fyalungama. Kasesema Esaya asobele ukuti: “Pali wene pakekalo mupashi wa kwa Yehova, umupashi wa mano kabili uwa mucetekanya, umupashi wa kutubulula kabili uwa bumpalume, umupashi wa kwishiba kabili uwa katiina ka kuli Yehova . . . Te ku kumona kwa menso yakwe akapingwila, kabili te ku kuumfwa kwa matwi yakwe akakalulwila, lelo akapingwilo mulanda mu bulungami.” (Esaya 11:2-4) Ukupusanako na bena Europe aba nkulo yabangilileko, Yesu takabakilile umutende ku mwakwe fye kabili ukulwe nkondo mu fyalo fya cilendo. Pe samba lyakwe, umutende ukaba mu kubumbwa konse.
Ukulundako, Yesu alikwata amaka ya kuleto mutende. Ubusesemo busoso kuti: “Umupashi wa kwa Yehova . . . , umupashi wa kutubulula kabili uwa bumpalume,” waba pali wene. Uyu mupashi wali ku numa ya bubumbo bwa kubumbwa konse pamo pene ne milimo ya maka yonse iya bulungami iyacitwa lipoti muli Baibolo. Nelyo fye kakaanya mukalamba, Satana, takwate fyanso ifyo mu kutunguluka fikalwisha ubulamba bwa mupashi wa kwa Lesa.
Intampulo ku Mutende
Ni shani fintu Yesu akatungulula umutundu wa muntu ku mutende? Kuti pambi wapapushiwa ukwishiba ukuti kale kale alitampa. Mwi buku lya busesemo ilya Ukusokolola, Yesu amonwa alepokelela ukufuma kuli Lesa bumfumu mu Bufumu bwa mu mulu. (Ukusokolola 11:15) Nga ca kuti twabebeta mu kupalamisha amasesemo ya Baibolo no kuyalinganya ne fya kuponako mu mwanda wesu uwa myaka, tumona ukuti ukubikwa kwa kwa Yesu pa cipuna ca bufumu nge Mfumu kwacitike mu mulu ku numa mu 1914. (Mateo 24:3-42) Lulya lwali lutampulo lukalamba mu kuleto mutende kwi sonde.
Nga ca kuti ifyo e fintu cili, nangu ni fyo, mulandu nshi Inkondo ya Calo iya I yapuukile mu 1914? Kabili mulandu nshi umwanda wesu uwa myaka wamona inkondo shabipisha ukucila pa shili shonse shimbi mu lyashi lya kale? Pantu umulimo wa kubalilapo uwa Mfumu ya ku mulu wali kutamfya Satana kuli pe na pe ukufuma mu myulu no kumupoosa pa nshi ku bwina mupalamano bwe sonde. Ica kufumamo? Ubusesemo busoso kuti: “Kalanda kuli imwe, mwe calo na bemba! pa kuti [Ciwa, NW] naikila pali imwe, ali ne cipyu cikalamba, pa kwishibo kuti ali ne nshita inono fye.” (Ukusokolola 12:7-12) Inkondo shikalamba isha mu mwanda wa myaka wesu shaampana ku cipyu ca kwa Satana. Lelo mona: Icipyu ca kwa Satana ca pa “nshita inono fye.” Amafya mu kwangufyanya yakapwa!
Ilyo taulabako, nangu ni fyo, Cilolo wa Mutende acita amapekanyo yalundwako ayakatama ku mutende. Ica kutendekelako, umutundu wa muntu uli no kwishiba ulwa mifwaile ya kwa Lesa ku kuleto mutende ukupitila muli Kristu. Mu kulinganako, Yesu asobele ukuti mu nshita yesu “imbila nsuma iyi ya bufumu ikabilwa ku fyalo fyonse.” (Mateo 24:14) Mu kufikilishiwa kwa ici, imbila nsuma ileshimikilwa ilelo ne Nte sha kwa Yehova mu cifutu icili conse ica cibulungwa.
Lyene, aba mitima yatambalala bali no kusambilishiwa mu nshila sha mutende. Baibolo ilayo kuti: “Abana bobe bonse abaume bakaba abasambilishiwa kuli Yehova, kabili umutende wa bana bobe abaume ukafula.” (Esaya 54:13, NW) Amamilioni ya ba mitima yatambalala balepokelela uku kusambilishiwa nelyo fye ni nomba.
Ulutampulo Lwakonkapo
Cili nomba mupepi ne nshita ya lutampulo lumbi ulwa kupingulapo mu nshila ya kupango mutende. Ni cinshi co? Lumo luntu abengi baishiba kwi shina lelo ulo abanono baishiba ulwa mifwaile ine ine. Baibolo ilwita “ukulwa kwa bushiku bukalamba bwa kwa Lesa wa maka yonse,” nelyo Armagedone. (Ukusokolola 16:14, 16) Abengi batontonkanya ulwa Armagedone nge nkondo ya manyukiliya iikonaula ukutumpuluka. Mu kucilanako, uli mulimo wa kulungatika uwa kwa Yesu, Cilolo wa Mutende, ku kupwishishisha ifintu ifili ifyakatama ku mutende.
Ica kubalilapo, Armagedone ikafumyapo ifipindami fyonse ifya buntunse ku mutende. Ubusesemo bwa pa Ilumbo 37:10 busoso kuti: “Pashala panono, e lyo umubifi takabepo; awe ukalolekesha apo ali, no kusanga tabapo.” Ee, Yesu akafumyapo “umubifi”—abapange nkondo, intalamisoka, abalulunkanya, pamo pene na abo bonse abakaana ukupokelela Cilolo mukalamba uwa Mutende—ukufuma pa cisebele ce sonde. Tabakakwate insambu yalundwako ku kutwalilila ukwikala pali iyi planeti.—Ukusokolola 19:19-21.
Ica cibili, pa Armagedone ubu busesemo bwa kwa Daniele bukafikilishiwa: “Mu nshiku sha shamfumu ishi Lesa wa mu mulu akemyo bufumu ubushakonaulwe umuyayaya, no bufumu bwa buko tabwakashilwe ku bantu bambi; bukashonaula no kupesha aya mabufumu yonse, kabili bukeminina umuyayaya.” (Daniele 2:44) Ukwakanikana kwa mu nko ukwatungulula ilingi line nga nshi ku nkondo kukapwishishiwa. Mu kupelako, kukaba kamfulumende ya calo pe samba lya kwa kateka untu twingacetekela!
Ni lilali Armagedone ikesa? Baibolo taisosa. Lelo ifya kuponako fya calo mu kufikilishiwa kwa busesemo filangilila ukuti cikaba ni mu kwangufyanya nga nshi. Baibolo mu kulengama ilasobela ica kuponako icikaba ca kutangilila ca mu kwangufyanya ica kusontelela. Umutumwa Paulo atila: “Ilyo balesosa, abati, Mutende, kabili, Takuli ca kusakamana, e lyo uboni ubwa kupumikisha bwabemina.” (1 Abena Tesalonika 5:3) Lyene, bwangu bwangu fye pa numa ya bonaushi bwa kupumikisha ubufika pa kalume mu kuba na Armagedone, icipindami cacilishapo bukulu ku mutende cikafumishiwapo. “Inshita inono fye” iya kwa Satana ikapwa, kabili akabikwa mu mibele uko te kuti alenge na kabili amafya pano pe sonde. (Ukusokolola 20:1-3) We kwilulukwa we!
Icalo mu Mutende
Cite cikope imibele pali ilya nshita. Kemba wa malumbo aseseme ukuti: “Abalanda bakapyaninine calo, no kuilemeno bwingi bwa mutende.” (Ilumbo 37:11) Aba balanda bakatwalilila ukufikilisha ubusesemo bwayemba ubwa kwa Esaya: “Bakasuke abafule mpanga shabo shibe ifya kuliminako umushili, na mafumo yabo yabe ifya kutungwilako imiti; lukasuke uluko alubulo kusumbwilo lupanga ku luko, nangu kusambilila kabili ubulwi.”—Esaya 2:4.
Mu kupelako, pa muku wa kubalilapo ukutula pa Edene, abantunse bonse aba mweo bakaipakisha ipaalo lya kwa Yehova Lesa, kabili akafikilisha icilayo cakwe ica kuti: “Moneni, ubwikalo bwa kwa Lesa buli pamo na bantu, kabili akekalilila pamo na bo; na bo bakaba abantu bakwe, na Lesa umwine akaba pamo na bo; kabili akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.”—Ukusokolola 21:3, 4.
Isubilo Lyakosa
Ni nani, lyene, akatungulula umutundu wa muntu ku mutende? Yesu Kristu, Cilolo wa Mutende uwasontwa. Bushe ici cili lisubilo libomba kuli ifwe ilelo? Cisuma, nga ca kuti amalayo ya Baibolo tayali ayashintililwapo, te kuti kubeko isubilo line line ku mutende. Abantu kuti batwalilila ukulwa no kwipayana ukwabule mpela ukumoneka. Lelo Baibolo yalibe yashintililwapo, kabili Ubufumu bwa kwa Lesa pe samba lya kwa Kristu bukaleta umutende. Tulekukoselesha ukukutika ku mbila nsuma iya Bufumu intu Inte sha kwa Yehova baleta pa mobe no kuimwene ci we mwine. Lyene, lintu inshita yaisa, shi kuti waba pa kati ka balanda abakapyane sonde no kuilemena abene mu kufula kwa mutende.
Isubilo lya mutende ililanshiwepo muli ici cipande lyafuma muli Baibolo. Ilelo, lintu abengi tabasumina na kabili muli Baibolo, kuti pambi waipusha nampo nga ili subilo kuti lyabomba. Inte sha kwa Yehova basumina mu kushangila ifyo kuti lyabomba. Balapokelela Baibolo nge Cebo capuutwamo ica kwa Lesa, muli ifyo pamo nge ca cishinka umupwilapo. Mu 1989 basabankenye icitabo ca mutwe wa kuti The Bible—God’s Word or Man’s? icilepeela ubushininkisho ubwingi ubwa ici cishinka. Fimo ifya fyebo muli cilya citabo nafilanshiwapo mu fipande fibili ifikonkelepo, ifyo tulekulaalika ukubelenga.
Ifyebo na fimbi pa lwa cilayo ca Baibolo ica mutende fikamoneka mu cipande “Umutende wa Calo—Cinshi Mu Cituntulu Ukapilibula?” icikasabankanishiwa mu lukafuma ulwa April 15, 1990, ulwa Ulupungu lwa kwa Kalinda.
[Amashiwi pe bula 8]
Ni Yesu fye eka e wakwata imilingo ku kutungulula umutundu wa muntu ku mutende
[Amashiwi pe bula 9]
Ilelo, imbila nsuma iya Bufumu ileshimikilwa mu cifutu icili conse ica cibulungwa