Ubumi bwa kwa Yesu no Butumikishi

Abakashana ba Mano na Bapelwa Amano

YESU acilayasuka ukulomba kwa batumwa bakwe ukwa cishibilo ca kubapo kwakwe mu maka ya Bufumu. Nomba apayanya imbali shalundwako isha cishibilo mu milumbe itatu, nelyo ifilangililo.

Ukwisushiwa kwa cilangililo cimo na cimo kwali no kumonwa kuli abo abaleikala mu kati ka kubapo kwakwe. Atendeka ica kubalilapo mu kuba na mashiwi ya kuti: “E lyo ubufumu bwa mu mulu bukapashaniwa ku bakashana ikumi, ababuulile inyali shabo, no kufumina ku kuyakumanya shibwinga. Lelo basano pali abo bali abapelwa amano, na basano abashilimuka.”

Ku numbwilo “ubufumu bwa mu mulu bukapashaniwa ku bakashana ikumi,” Yesu talepilibula ukuti citika wa abo abapyana Ubufumu bwa mu mulu bantu bapelwa amano na citika bali abashilimuka! Iyo, lelo alepilibula ukuti mu kulundana no Bufumu bwa mu mulu, kwalibako ulubali ulwapala ulu nelyo ulwapala lulya, nelyo ukuti imilandu iyalundana no Bufumu ikaba nga cilya cintu na cilya.

Abakashana ikumi bapashanya Abena Kristu bonse ababa mu mutande nelyo abaitunga ukuba pa mutande wa Bufumu bwa mu mulu. Cali ni pa Pentekoste wa 33 C.E. e lintu icilonganino ca Bwina Kristu calaiwe mu cupo kuli Shibwinga wabuushiwa, uwakatamikwa, Yesu Kristu. Lelo icupo cali no kucitikila mu mulu pa nshita imo iishaishibikwe ku nshita ya ku ntanshi.

Mu cilangililo, abakashana ikumi balaya mu kuba ne mifwaile ya kusengela shibwinga no kuilunda mu mulongo wa kusefya uwa bwinga. Lintu afika, bali no kusanika inshila ya mulongo wa kusefya mu kuba ne nyali shabo, muli ifyo ukumucindika ilyo aleleta nabwinga wakwe ku ŋanda yapekanishiwilwa wene. Nangu cibe fyo, Yesu alondolola ukuti: “Abapelwa amano ilyo babuulile inyali shabo, tabasendele na mafuta; lelo abashilimuka basendele amafuta mu misashi yabo pamo ne nyali shabo. Awe shibwinga pa kukokola, balashipula bonse no kulaalo tulo.”

Ukukokola kwatantalila ukwa kwa shibwinga kulangilila ukuti ukubapo kwa kwa Kristu nge Mfumu ileteka kulingile ukuba ku nshita ya ku ntanshi iyalepako. Mu kupelako esa pa cipuna cakwe ica bufumu mu mwaka wa 1914. Mu kati ka bushiku bwalepa pa ntanshi ya ico, abakashana bonse balaala. Lelo tabalesekwa pali ici. Ukusekwa kwa bakashana bapelwa amano kwaba pa mulandu wa kukanakwata kwabo amafuta ya misashi yabo. Yesu alondolola ifyo abakashana bashibuka pa ntanshi shibwinga talafika:

“Lelo ubushiku pa kati kwali imbila, iya kuti, Moneni, shibwinga! Fumineni ku kumukumanya. E lyo abakashana balya bonse babuukile, no kuteyanye nyali shabo. Awe abapelwa amano batile ku bashilimuka, Tupeniko amafuta yenu; pantu inyali shesu shileshibantukila. Lelo abashilimuka balyaswike, abati, Epali tayakumene kuli ifwe na imwe: kanshi kabiyeni ku bashisha, no kuishitila mwe bene.”

Amafuta yapashanya ico icisungilila Abena Kristu ba cine ukulabeeka nge fyengelo, ukucilumbula, Icebo capuutwamo ica kwa Lesa, apo bekatilila, capamo no mupashi wa mushilo, uwafwilisha mu kumfwikisha ico Cebo. Amafuta ya ku mupashi yalenga abakashana bashilimuka ukusanika ulubuuto pa kusengela shibwinga mu kati ka mulongo wa kusefya ku mutebeto wa bwinga. Lelo ibumba lya bakashana abapelwa amano tabakwata mu bene bene, mu misashi yabo, amafuta yakabilwa aya ku mupashi. E ico Yesu alondolola icacitika:

“Lelo ilyo [abakashana abapelwa amano] baleya ku kushita [amafuta], shibwinga aliishile; abapekaniwe baingile nankwe mu mutebeto wa bwinga, kabili kwaliiselweko ku ciibi. Pa numa abakashana banabo baliishile, abati, Mwe shikulu, mwe shikulu, twiswileniko. Lelo alyaswike, ati, Ndemwebe cine cine, nati nshimwishibe.”

Pa numa Kristu afikile mu Bufumu bwakwe ubwa mu mulu, ibumba lya bakashana abashilimuka ilya Bena Kristu basubwa aba cine lyalishibwike kwi shuko lyabo ilya kusanikila ulubuuto muli ici calo ca mfifi mu kulumbanya Shibwinga uwabwelele. Lelo abo abacitilwako icikope ku bakashana bapelwa amano tabali abaipekanya ku kupayanya uku kulumbanya kwa kusengela. E co lintu inshita yaisa, Kristu tabeswila iciibi ku mutebeto wa bwinga mu mulu. Alabasha ku nse mu kufiita kwa bushiku bwafiitisha ubwa calo, ku kulofiwa capamo na bakacita bambi bonse aba mampuulu. “E ico loleni,” e fintu Yesu asondwelela, “pantu tamwaishiba bushiku nangu kashita.” Mateo 25:1-13.

◆ Ni bani bapashanishiwa ku bakashana ikumi?

◆ Ni lilali ubulayo bwa mu cupo bucitwa kuli shibwinga, lelo ni lilali esa ku kusenda nabwinga ku mutebeto wa bwinga?

◆ Cinshi amafuta yemininako, kabili cinshi ukuyakwata kulenga abakashana bashilimuka ukucita?

◆ Ni kwi uko umutebeto wa bwinga ucitikila?

◆ Cilambu nshi cakulisha ico abakashana bapelwa amano balufya, kabili cinshi cili ishamo lyabo?