“Iminineni Ndi”—Mwiipununa
IFIKANSA fyacilishapo bukulu ifilolenkene no mutundu wa muntu ilelo ni fyo ifya bumulopwe bwa mu kubumbwa konse. Yehova alatulaalika ukulanga uko twaiminina muli uyu mulandu pa kuinashisha ku Mfumu yakwe yasontwa, Kristu Yesu. Kwalibako ukukabila kwe pamfya ku kwankulako ku bwite bwakwe, kabili mu myaka fye isano iyapitapo, ukucila pali milioni abantu umo umo balicite co. Lelo aba balisanga ukuti ifyafulilako fyalibimbwamo mu kubuula ukwiminina ukucila fye pa kupingulapo kwa muku umo fye ku kubombela Yehova. Kufwile ukubako ukuipeela kwa butali bwa nshita ya bumi. Bushe tukasungilila ukwiminina kwesu lintu kwabako amafya? Nelyo bushe tukanenuka panono panono, pa numa ya ‘kwiminina ndi’ mu kutendekelako?—1 Abena Korinti 16:13; AbaHebere 2:1.
Nga ca kuti tawasanga inshila ya Bwina Kristu ukube yayanguka, sansamushiwa ukufuma ku kwishiba ukuti cali cimo cine na kuli Yesu Kristu. Ee, nelyo fye Mwana wa kwa Lesa uwafyalwa eka aali no kupepela ubukose pa kusungilila ukwiminina kwakwe, ukucilisha lintu ubwesho bwakwe ubwacilishapo bwalepalama. Cite cikope pa lwa wene mwi bala lya Getsemane, alepepa mu mukoosha ukuti: “Abba, Tata, fyonse fingacitwa kuli imwe; fumyeni kuli ine ulukombo ulu. Lelo, te ico ntemenwe ine, kano ico mutemenwe imwe.” (Marko 14:36) Alishibe ukuti inshila yali ku ntanshi yali iyaafya. Aali ukucilisha uwaibukila ukuti ishina lya kwa Wishi lyali no kwambukilwa. E co, umuntu wapwililika eka fye pe sonde taali na nsoni ku kwipusha ukwaafwa.
Lintu imibombele yamoneka iyaafya kuli ifwe, twalikwata intulo imo ine iya bukose iyo Yesu akwete. Kuti twapepa kuli Yehova ku kwaafwa pa kuti tatuipunwine nelyo ukuwa. Lelo musango nshi uwa masanso yengaitambika ku kutulenga ukuipununa? Ukwishiba ici no kupekanya mu kubangilila kuti pambi nakalimo kwatwaafwa ukusengauka ukuipununa.
Ukupakasa Kuti Kwatupununa
Baibolo isoka ukuti: “Awe na bonse abalefwayo kwikala umwabela bukapepa muli Kristu Yesu bakapakaswa.” (2 Timote 3:12) Ukupakasa kuti kwatulenga ukuipununa, kabili kwisa mu misango iingi. (Marko 4:17) Kuti pambi kwaba fibindo fya mwi funde—ukuletako ubusanso bwa kubikwa mu cifungo kabili nelyo fye imfwa—ulukakala lwe bungwe, ukukaanya kwa kunashe citetekelo ukwa bushiku no bushiku ku munobe wa mu cupo uwa mupampamina, uukaanya, nelyo ukupumya kwa lyonse ukwa banobe ba pa sukulu.
Ukupakasa kwaliba ukwaafya ukushipikisha, lelo twalisokwa ukuti kukacitika mu musango umo nelyo uunankwe. E co, kuti twakuula icitetekelo cesu nomba no kusambilila ukushintilila pa bukose bwa kwa Yehova pa kuti lintu inshita yaisa, tukashipikisha muli ubo bukose. (1 Petro 4:13, 14; 5:6-11) Nangu cibe fyo, ifimabwe fya kuipununako ilingi line filaba ifya mu bumfisolo ukucila ukusansa kwabipisha ukwa kupakasa.
Ukulengwe Nsoni Kuti Kwanasha Icitetekelo
Ni ani ashibukisha ukuyumfwa kwa kubongolola uko ukwaishile lintu twali abana no kuyumfwa abalengwe nsoni? Bushe uleibukisha inshita lintu Tata alaile icintu cimo icaibela ku lupwa kabili lyene pa mulandu umo ayalwile umuntontonkanya wakwe? Nelyo inshita aali no kukusenda ku zoo (cifulo ca kutambilako inama) kabili mu kulekelesha ukufuuta? Fintu walengelwe insoni!
Abena Kristu abakalamba na bo kuti balengwe nsoni, kabili ici mu milandu imo calitungulula ku kayofi ka ku mupashi. Bamo baimike isubilo lyabo pa bushiku ubo bashininkishe ukuti Armagedone yali no kwisa. Lintu takwali icacitike pali ubo bushiku, bayumfwile abalengwe nsoni. Bambi balengelwe insoni lintu ishuko lyasubilwe lishamoneke. Mu kulundapo, abantu kuti baba abakulenge nsoni. Umukashana umo uwa myaka ya bukulu 18 aebele abafyashi bakwe ukuti alilengelwe insoni apakalamba nga nshi ku myendele ya bamo abalumendo mu cilonganino—no kufilwa kwa bafyashi babo ukubasalapula—no kuti talefwaya icili conse cimbi ica kucita ne cine.
Ilintu ukulengwe nsoni kuti kwaumfwika pe samba lya iyi yonse imibele, bushe abalengwe nsoni balingile ukupunushiwa ukufuma mu kwampana kwabo na Yehova? Elenganya ukulengwe nsoni kwa kwa Yesu lintu abasambi bakwe batwalilile mu kupaashanya pa wali no kuba umukalamba pali bonse mu kati kabo, muli ifyo ukulangisha imibele ya kuibililika. (Luka 9:46; 22:24) Elenganya, na kabili, ukulengwe nsoni kwa kwa Yobo lintu abanankwe batatu abalingile ukuba kulya ku kumwaafwa bamwalukile no kutendeka ukutwishika ubusumino bwakwe! (Yobo 22:5-10) Nalyo line, Yesu na Yobo tabaipunwine.
Abantunse bonse baliba abanaka, e co kuti caba ica kukanapelulula ukuleka ukufilwa kwa bambi ukwambukila ukwampana kwesu na Yehova. (Ilumbo 51:5) Ukukanapwililika kwa bamo takulingile ukutupofwisha ku mulimo wa kupapusha uo Yehova alecita ilintu alelonganika “ifintu fyonse capamo na kabili muli Kristu.” (Abena Efese 1:9, 10, NW) Sunga mu muntontonkanya ukuti bantunse bashapwililika, abawa ukupala ifwe e bo Yehova alelonganika, abantunse abakabila ukusalapula no kulopololwa pa kukula abakosa. (Ilumbo 130:3) Umulwani wesu te munyinefwe wa Bwina Kristu uushapwililika lelo ni Satana, uufwaya ukutupwisha nga engacite co. Takatunguluke nga ca kuti ‘twaiminina abakosa ndi mu citetekelo.’ (1 Petro 5:8, 9) Nga ca kuti twakwata icitetekelo ica musango yo, ukwabulo kutwishika ‘tatwakalengwe insoni.’—Abena Roma 9:33.
Ukuisenuka Kuti Kwaonaula
Bamo balilufya ukwampana kwabo na Yehova Lesa pa mulandu wa kuyumfwa aba fye. Abaibukila ulwa mabunake yabo no kupelebela, bafika ku nsondwelelo ya kuti Yehova te kuti abale apokelele umulimo wabo. Bayumfwa ukuti pa kuti umo uwapala bene atunge ukuba umo uwa Nte sha kwa Yehova bumbimunda fye. Bushe walibala auyumfwa ububi muli iyo nshila? Nga ni fyo, ulingile ukulwisha ukuyumfwa kwa musango yo.
Bushe ulayumfwa uushawamina ukubombela Yehova? Lyene ipushe we mwine ukuti, ‘Ni ani awaminwa ili shuko likalamba?’ Abena Kristu bonse balikwata ubulwi bwa lyonse ukulwisha ukukanapwililika kwabo. Nelyo fye mutumwa Paulo aliilishenye ukuti: “Ilyo nafwayo kucite cisuma, icabipa e cabapo kuli ine.” (Abena Roma 7:21) Bushe Paulo aali uwa bumbimunda pa mulandu wa kuti inshita shimo acitile ifintu ifyo ifyali ifyalubana? Iyo. Uwa bumbimunda ni umo uubepekesha ukuba cintu ashaba. Nga ca kuti twabombesha ukucita icalungama lelo twatena mu tushita mu tushita te mulandu ne fyo twaba, bushe ico cili kucita akabepekesho pa lwa cintu cimo? Kwena iyo.
Baibolo itukonkomesho “kufwalo buntu bupya.” (Abena Efese 4:24) Bushe ico cipilibula, nangu ni fyo, ukuti tulalufya imisango yonse iya buntu bwa kale? Iyo. Muli kalata yakwe ku Bena Kolose, Paulo asosele ukuti ubuntu bupya “bulelengwa cipya cipya” ukupitila mu kwishiba kwalungikwa. (Abena Kolose 3:9, 10) Inumbwilo “bulelengwa cipya cipya” ilosha ku ncitilo yatwalilila. E co ukwalula ubuntu bwesu mibombele yatwalilila. Te ca kupapa, lyene, ukuti mu tushita tumo tulasanga impuso muli fwe bene.
Ici, kwena, tacili kucefyako ukukakala kwa lubembu, kabili tacipilibula ukuti kuti twanakila ku matunko ukwabulo kulwisha, ukutunga ukuti Yehova mu kuicitikilako akatweleela. Lelo cilatwaafwa ukukanaba aba kuilengulula mu kukanapelulula. Kabili citulenga ukutemwa Yehova mu kucilapo pa mulandu wa kuti alipayenye ilambo lya cilubula ilya kwa Kristu pa kuti twingabombela Wene te mulandu no musango wa lubembu uwa cifumanda.
Umutumwa Yohane apeele imimwene yashikatala iya mulandu lintu asosele ukuti: “Ndelembe fi fintu kuli imwe ukuti mwibembuka.” Lelo mu kushininkisha alundilepo ukuti: “Lelo ngo muntu abembuka [pa mulandu wa kukanapwililika kwa muntu], natukwato Bukota kuli Shifwe, Yesu Kristu.” (1 Yohane 2:1) Ukucila ukuba uwa kuisenuka mu kucishapo, uku kushilimuka mu mibele yesu no kwaafwa Yehova apayanya kututungulula ku kubwekeshapo amashiwi ya kwa Paulo aya kuti: “Kube ukutootela kuli Lesa muli Yesu Kristu Shikulwifwe!”—Abena Roma 7:25.
Witwalilila Uwapunwishiwa
Yesu apeele ukusoka kwakosa ku uuli onse uwingaba ca kupunwisha ukuti: “Lelo uwalenga kamo pali uto tunono utwantetekela ukuipununa, camwikalwa ukuti icimpelo cikalamba cikobekwe mu mukoshi wakwe, no kwibishiwa mwi tenga lya muli bemba.” (Mateo 18:6) Lelo ni shani pa wapunwishiwa? Nga ca kuti twapunwishiwa ku muntu umo nelyo imibele imo, bushe tulingile twakwata umwa kulesesha fwe bene no kusoso kuti, “Cisuma, te mulandu wandi, nshakabale mombela Yehova na kabili”?
Languluka icilangililo. Bushe walitala autelela pa menshi makasa nelyo ukushetuka pa matabo? Nakalimo ubusanso bwalikupumikishe. Cili icaumfwika ukuti waisangile nauwe ntangalele. Lelo cinshi wacitile mu kukonkapo? Bushe watile: “Te mulandu wandi ukulambalala pano. Menshi makasa [nelyo amatabo] e fya kupeelo mulandu. E co nshaime na kabili”? Mu kupalishako, walimine no kufumapo pa cifulo ca kulenge nsoni mu kwangufyanya nga nshi.
Bushe te kuti cibe cimo cine na mu milandu ya ku mupashi? Nga ca kuti twakalifiwa ku mibele imo nelyo ku Mwina Kristu munensu umo, iyo ni mpika yabipisha iilingile ukubombwapo. Nangu cibe fyo, nga twatwalilila abapunwishiwa, ukupampamina pa kupeela umuntu umbi umulandu ku mpika yesu, bushe tacili ica cine ukuti imibele yesu iba iyacililapo ukuba mulandu wesu wine?
Mu nsansa, nga ca kuti twapunwishiwa, baeluda na bambi abakosoka mu cilonganino baliba abacilapo ukuitemenwa ukwaafwa. (Abena Galatia 6:1) Kabili Yehova umwine apeela ubukose kuli abo abafwaya ukumubombela te mulandu na maafya. (Abena Filipi 4:13) E co tulingile lyonse ukuba abaipekanya ukwipusha ukwaafwa nga camoneka ukuti icintu cimo cili no kupumfyanya ukwiminina kwesu kwashangila na Yehova no Bufumu bwakwe. Lyene tatwakapeele Satana ukucimfya pa kupunwishiwa no kuleka.
Ni Kwi Waiminina?
Cila kasuba, ababomfi baipeela aba kwa Lesa balolenkana ne fikansa ifyo fyesha ukuipeelesha kwabo kuli Yehova. Te mulandu ne co bali no kulwishanya na co, bafwile ukwiminina no kulanga uko baiminina pa lubali lwa Mfumu ya buMesia iya kwa Yehova. Bakateka ba maka aba ili sonde balibuula ukwiminina kwabo ku ‘kutekela akabungwe pali Yehova na pa wasubwa wakwe.’ We shuko twakwata ukumwimininako!—Ilumbo 2:2.
Nangu cibe fyo, te kuti twiminine ku kulwisha ukusonga kwa iyi micitile ya calo conse pa lwesu, e co tulasansamushiwa no bulayo bwa kwa Yesu ubwa kuba ne cilonganino cakwe “ukufikila ukusondwelela kwa micitile ya fintu.” (Mateo 28:20, NW) Akatwafwilisha. Mu kulundapo, ukwaafwa kukalamba kwisa lintu twalambatila mu kupalamisha kuli Yehova no kufwaya ukwafwilisha ukufuma kuli wene. Ukwalukila ku Cebo cakwe kuti kwatupeela ubukose. Lintu twayumfwa ababulwa amaka ya kucishipikisha, Ilumbo 55:22 lilatulaalika ‘ukupoosa pali Yehova icisendo cesu icafina, wene akatulama; pe fye takasuminishe uwalungama ukutelententa.’ Ee, Baibolo ikoselesha bonse abantu ba kwa Lesa ‘ukwiminina ndi mu kutetekela’—kabili te kuipununa.—1 Abena Korinti 16:13.