Bakabilisha ba Bufumu Bacita Lipoti

◻ UMUTUMWA Yohane asosele ukuti: “Twitemwa ku cebo nangu ku lulimi, lelo ku milimo na ku cine.” (1 Yohane 3:18) Yesu asosele ukuti ‘tulingile ukutemwa umwina mupalamano nga fwe bene.’ (Mateo 22:39) Ukulanga ukutemwa mu milimo kutasha icine, nga fintu icakukumanya cakonkapo ukufuma ku Britain cilangilila.

Lintu Pauline atandalile nyina, uwalwele ukufimba kwa mfumfyu, takwali uuli onse umbi kulya. Lelo pali aka kashita, lintu aingile fye mu ŋanda, aali no kuumfwa mashini ya kucapilamo ilebomba na umo pa ntunti ya pa mulu alebomfya icibombelo ca kuwamisha mu ŋanda. “Cinshi cilecitika, ni ani ali muno?” e fyo aipwishe nyina. Nyina alondolwele ukuti Inte sha kwa Yehova bacisa ku mwinshi wakwe, ukumona ukupelelwa kwakwe, kabili baciminina no kwaafwa. Pa numa babe nababomba umulimo wa mu ŋanda no kupekanya ica kulya, balikeleko no kusosa ukuti: “Bushe namuipekanya?” “Ukuipekanya ku cinshi?” e fyaipwishe Pauline. Nyina alondolwele ukuti asumine ukuti akwate isambililo lya Baibolo. Pauline aali uwatwishika pa lwa kwikala, lelo apo afumine ukutali, aipwishe nga ca kuti kuti calungama kuli wene ukuilunda kwi sambililo. Aliipakishe lyene apakalamba ica kuti atantike ukulaisa ubushiku bwine ubo cila mulungu pa kuti engalasangwapo lyonse. Mu kupelako, cibusa wakwe aliilundile kuli wene, kabili nomba bonse balibatishiwa. Pamo nge ca kufumamo ca ili sambililo lya kubalilapo, ifilundwa ikumi ifya lupwa lumo lwine nomba baba ni Nte sha kwa Yehova! Ee, ukwaafwa “mu milimo”!

Pasita mu New Guinea Aankula ku Cine

◻ Mu kasuba ka kwa Yesu bashimapepo bamo balipokelele ukusambilisha kwa kwa Yesu. Bashibutotelo aba mitima ya cishinka ilelo na bo balacita ifyo, nga fintu cilangililwe mu cakukumanya ukufuma ku milundu ya New Guinea, icacitwa lipoti na kangalila wa muputule. Ashimiko kuti: “Umulumendo wasambilila bwino, pasita wa ba Pentekoste, alekuula icalici linono mupepi na ku Ŋanda ya Bufumu. Munyina ukufuma muli ico cilonganino acitile ubunte kuli wene, kabili amoneke uwa bucibusa. Mu kwipipa pa numa ya ici, natandalile icilonganino no kwikala na munyina ukulungatana fye mu musebo ukufuma ku ŋanda ya kwa pasita. Icungulo bushiku ca kubalilapo pa numa nafikile, uyu mulumendo aishile pa mwinshi wesu na Baibolo wakwe, capamo ne bumba ilikalamba ukufuma ku cilonganino cakwe. Bonse bafwaile ukumfwa ubukombe bwa Bufumu. Aipwishe ifipusho ifyafulilako, kabili ukulanshanya kwafikile na mu nshita ya bushiku. Icungulo bushiku icili conse ica kutandala kwandi, wene na bambi abasekelela baishile ku kumfwa ifipusho fyabo ifingi ukwasukwa. Namulaalike ku kulongana kwa muputule umulungu wakonkelepo, kabili alisangilweko na munyina wacitileko ubunte kuli wene mu kubalilapo. Uyu mulumendo alitwalilile isambililo lyakwe ilya Baibolo, alisha Pentecostal Church, kabili nomba ni kasabankanya wa lyonse uwa mbila nsuma.”

Mu cine cine, caba kufwaya kwa kwa Lesa “uufwaya abantu bonse ukupusuka no kufika ku kwishibe Cine.”—1 Timote 2:4.