Abapwishishe Sukulu lya Gileadi Bacincishiwa Ukukusha Ukulamuka kwa Kumfwana Kusuma

PA MULUNGU, March 4, 1990, ukucila pa bantu 4,100 baiswishe Ŋanda ya Kulonganinamo iya ku Jersey City iya Nte sha kwa Yehova ku mifwaile ya kupwishe sukulu iye kalasi lyalenga 88 ilya Watchtower Bible School of Gilead. Abapwishishe sukulu 24 bafumine ku fyalo 6 kabili nomba baletumwa ku bwingi bwa fyalo 13.

Programu yatendeke pa 10:00 a.m. Pa numa ya lwimbo, George Gangas, nomba ukucila pa myaka 90 iya bukulu kabili icilundwa ce Bumba Litungulula, aiswile mu kuba ne pepo lya kucincimusha kuli Yehova. Ukukonka pali ici, ceyamani, C. W. Barber, na kabili icilundwa ce Bumba Litungulula kabili umwine wine uwapwishishe sukulu lya Gileadi ilye kalasi lyalenga 26, mu kwipifya alanshenye ukwaluka kumo ukwa mu kwangufyanya pa cisebele ca calo. Asondwelele pa kusoso kuti: “Takwatala akubako ishuko lya mu nshita ilyawamisha nga shi ku kuba inte sha kupulamo kwa kwa Yehova no bulungami bwakwe.” Lyene atwalilile ukwita bakalanda bapusanapusana aba programu ya lucelo.

Vernon Wisegarver, icilundwa ca Komiti ya Fakitari mu Brooklyn, asobwele umutwe wa lyashi uwa kuti “Beni Abalamuka mu Mulimo Wenu.” Ukuletako icilangililo ca kwa kafula wa mu mushi uwafulile umunyololo wakosa uyo, uwakakilwe ku nanga, uwapuswishe ubumi bwa bonse abali mu ngalaba mu kati ka nkuuka, apashenye abapwishishe sukulu lya Gileadi kuli kafula. Pa kusambilisha abantu Baibolo, kuti babafwa ukukuula umunyololo wa kupususha ubumi uwa mibele ya bukapepa, ukubomfya ukulamuka kuntu balundulwile mu kukanshiwa kwabo ukwa ku Gileadi. Akoseleshe abapwishishe sukulu ku kutwalilila ukunonka ukulamuka kwabo ukwa kusambilisha no kwiminina pa ntanshi ya wakulisha pa Mfumu shonse nga “bakabomba balamuka.”

Mu kukonkapo, John Barr, icilundwa ce Bumba Litungulula, alandile pa mutwe wa lyashi “Sondeni no Kumono Kuti Aliwama Yehova.” Ukulandapo kwakwe kwashimpilwe pe Lumbo 34:8, apatila: “Sondeni no kumono kuti aliwama Yehova; alishuko muntu uuba muli wene.” Abakonkomeshe ukuti: “Sondeni icili conse mu kupeelwa kwenu ukwa mulimo wa bumishionari. Esheni conse. Mwicitiina. Lyene mukaba na maka ya kukumanya ubusuma bwa kwa Yehova mu nshila iyo mushabala amukumanya ku numa. Te kwesha ukuba abayafya. Te kwesha ukusoso kuti, ‘nshatemwa ici.’ Cisondeni.”

Charles Woody, icilundwa ca Komiti ya Dipartimenti ya Mulimo mu Brooklyn, alandile pa mutwe wakwe uwa lyashi uwasobolwa, “Ukusungilila Imimwene Yashikatala iya Ifwe Bene.” Asosele ukuti: “Tulaipakisha ukuba na abo abakwata imimwene yashikatala iyabo bene, abashifwaya lyonse ukukwata inshila yabo abene, abayangufyanya ku kutasha no kukuulilila bambi, kabili abo, nangu cingati bakwata ukwishiba, tabalenga bambi ukuyumfwa ukuti tabakwata kwene.” Mu kulundapo asosele ukuti: “Pamo nga bamishionari mukafwaya ukucebusha abantu ku cine, te kubapumfyanya. Imibele yenu iya kuicefya ikaba iya mutengo mu kwafwilisha ukupwishishisha ici.”

Lyman Swingle, icilundwa ce Bumba Litungulula, mu kukonkapo alandile pa mutwe wa lyashi “Ifipandwa Fikakonkapo, Cinshi Fikatweba?” Atendeke pa kusoso kuti: “Ilelo mwatendeka icipandwa cipya mu bumi bwenu. Cinshi mukalemba muli ifi fipandwa ukufuma nomba ukuya na ku nshita ya ku ntanshi?” Abacinkwile ukuti: “Icili conse ico mwacita cilingile ukuleta umucinshi no bukata kuli Yehova,” kabili alundilepo kuti: “Beni abashininkisha ukuti ukupingulapo kwenu kushimpilwe pa Cebo ca kwa Lesa. Ibukisheni Amapinda 3:7, ayasoso kuti: “Wiba uwa mano mu menso yobe we mwine.” Beni aba cishinka mu kubomba ukupeelwa kwenu ukwa mulimo.” Asondwelele pa kusoso kuti: “Tulecetekelo kuti tamwakabale amupwisha ukulemba ilyashi lya bumi bwenu, ukuti mukekala kuli pe na pe.”

Mu kukonkapo, Jack Redford, umo uwa ba kafundisha be sukulu, akonkomeshe abapwishishe sukulu ukuti: “Beni Amalambo Ya Mweo.” Atendeke pa kusoso kuti: “Umulimo wa bumishionari waba bumi bwa kuipeela ilambo. . . . Twalimutemwa pa mulandu wa mupashi wenu uwa kuipeela bulilambo.” Ukwambula ukufuma pa Bena Filipi 2:17, apo umutumwa Paulo asosele ukuti aleitilwa pe lambo, ukupilibula ukuti aali uwaitemenwa ukuibomfya umwine nge lambo lya mweo, aipwisho kuti: “Lelo ni shani fintu bamishionari ilingi line bapalila ukwitilwa pe lambo?” Lyene ashimike ifyakukumanya fibili ukukuma kuli bamishionari abaibomfeshe abene mu kucilapo. Umo apangile injelwa 16,000 ku minwe yakwe umwine no kukuula Iŋanda iya kubalilapo ya Bufumu mu calo apeelwe ulubali. Icakukumanya cimbi cakumine nkashi uwakonkele umulume wakwe mu mutengo, umo imibele ya mikalile yaali iya bututu. Ba nkashi ba cikaya bonse balimutashishe pa mulandu baishibe ukuti aleibomfya umwine nge ‘lambo lya mweo.’ Lelo kalanda aibukishe abasambi ukuti ilambo lili ilishaba na mutengo nga ca kuti talyendele pamo ne cumfwila. Ukubomfya ilyashi lya Mfumu Shauli na bena Amaleke, akonkomeshe ukuti: “Lyonse muleibukisha ukuti icumfwila caliwama ukucila ilambo. Te kwesha ukushishanya na Yehova. Lyonse citeni ico amweba ukucita.”

Ceyamani lyene aitile kafundisha umbi mwi sukulu, Ulysses Glass. Munyina Glass atendeke pa kusoso kuti: “Ikalasi lyalenga 88 lyaali kabili lili likalasi lya nsansa. Amakalasi yambi yaali aya nsansa nayo yene. Mulandu nshi, lyene, insansa shenu shipulilemo?” Alangilile ukuti insansa “tashaba buyo lelo ica kufumamo ca milimo isuma. Caba mibombele ya kufikapo iyo iileta icilambu.” Ayambwile kalemba uo ubumi bwakwe bwayalwilwe pa kumona ubulondoloshi: “Ukutunguluka kwaba lwendo, te pa cifulo apo uleya.” Kalemba alapile ukuti akaleka ukupimununa insansa pa cishinte ca kufika pa fifulo apo aleya mu cifulo ca kumona ubumi bwakwe bonse ngo lwendo lwatwalilila. “Takwabako inshila ku nsansa,” e fyo asosele. “Insansa shaba e nshila.” Munyina Glass lyene alandilepo ukuti ili kalasi lyalinonkele icishinka cikalamba ica ayo mashiwi. Asondwelele mu kuba na mashiwi mwi Lumbo lyalenga 84 no kusoso kuti: “Twalilileni ukwenda mu fifulo fyayemba. Impika ishili shonse shintu mwakumanya, shi kuti insansa isho isha abo abatemwa no kutiina Yehova shitwalilile ukuba ishenu.”

Lyene kwaishile ilyashi likalamba ilya lucelo, ilyapeelwe ne cilundwa cimbi ice Bumba Litungulula, Karl Klein, uwasobwele umutwe wa lyashi “Ukukusha Ukumfwana kwa Bwina Kristu.” Atendeke pa kucinkulako bonse ukuti Yehova aba e wakulisha pa ba kumfwana nabo bonse. Umwana wakwe uwafyalwa eka, Logos, abomfiwe nga uwa Kulandilamo Mukalamba uwa kwa Yehova, kabili alondolwele ukufwaya kwa kwa Lesa no kufunda ku bubumbo bwa pe sonde. Lintu Yesu aali pe sonde, amabumba yalipapushiwe ku nshila yakwe iya kusambilisha. Tabatalile abomfwa umuntu ukulanda ukupala wene. Pali Mateo 28:19, 20, Yesu akoseleshe abasambi bakwe ukuba bakomfwana basuma pa kuya mu calo, ukusambilisha amakambisho kuli bambi no kubapanga abasambi na bo.

Lyene, ukulanda mu kulungatika kuli bamishionari ba nshita ya ku ntanshi, Munyina Klein asosele ukuti kwabako inshila shine kuli bamishionari ukuba abakakililwako mu kukuula ukulamuka kwa kumfwana ukusuma: pa kati ka balume na bakashi, na bambi mu ŋanda ya bamishionari, na bo mwi ofesi lya musambo uko bapeelwa ulubali, kabili na abo bakumanya mu mulimo wa mwi bala. “Mutendeka ukumfwana pa ntanshi tamulaisula kanwa,” e fyasosele Munyina Klein. “Imyendele yenu ne misakwile fikalondolola amatontonkanyo ku mwine ŋanda.” Lyene apeele ifilangililo fyafulilako ku kushininkisha icishinka cakwe no kusondwelela mu kuba no ku kukonkomesha ukwa kuti: “Beni abaicefya mu muntontonkanya. Sungilileni inshila sha kumfwana ishaisuka. Tukusheni ukuba aba kumfwana na bo bawaminako.”

Pa numa ukuposha kwabelengelwe, amadiploma ya kutasha yalipeelwe kuli umo umo uwa bapwishishe sukulu kuli ceyamani. Lyene ikalasi lyapeele ukusuminishanya ukwalungatikwe kwi Bumba Litungulula na ku lupwa lwa Bethel, ukubelengwa na Paul Angerville uwa ku Guadeloupe.

Ukulongana kwa cungulo kwatendeke ne Sambililo lya Ulupungu lwa kwa Kalinda. Pa numa, abasambi balangishe pa cisebele ico icapeele ibumba ishuko lya mu nshita ukumona icintu cimo ica mibele ye kalasi lyabo, ukumona ukumfwana kwa kulanshanya capamo mu miputule yabo, kabili no kumfwa ubwingi bwa fyakukumanya fyabo ifya mu mulimo wa mwi bala apo baishile ku Gileadi imyeshi isano iyapitapo. Mu kupelako, kwali icilangililo icawamisha mu kuba no mutwe wa kuti Doing What Is Right in Jehovah’s Eyes (Ukucita Icalungama mu Menso ya kwa Yehova). Icilangililo capangilwe na bakasabankanya ukufuma ku Cilonganino, ca ku Lyndhurst, New Jersey. Ubushiku bwapwile mu kuba no lwimbo lwa kwisalila, ukukonkwapo ne pepo na Fred Franz, presidenti wa Sosaite uwa myaka ya bukulu 96.

[Akabokoshi pe bula 27]

UKUTANTIKA KWE KALASI

Impendwa ya fyalo fimininweko: 6

Impendwa ya fyalo fyapeelwa ukuyako: 13

Impendwa ya bamunyina abashimbe: 2

Impendwa ya baupana: 11

Impendwa ya basambi: 24

Avareji wa myaka ya bukulu: 32.7

Avareji wa myaka mu cine: 14

Avareji wa myaka mu butumikishi bwa nshita yonse: 9

[Icikope pe bula 26]

Ikalasi Lyalenga 88 ilya Bapwishishe Sukulu lya Watchtower Bible School of Gilead

Mu mutande pe samba, imitande ipeelwe amanambala ukufuma pa ntanshi ukuya ku numa kabili amashina yatantikwe ukufuma ku kuso ukuya ku kulyo mu mutande umo umo. (1) Magney, D.; Rogers, L.; Foster, S.; Foley, R.; Untch, L.; Jonasson, G. (2) Buri, H.; Buri, B.; Krammer, M.; Hudson, D.; Underkoffler, J. (3) Angerville, P.; Olsson, M.; Jones, A.; Untch, R.; Krammer, A.; Hudson, C. (4) Foley, L.; Magney, J.; Jones, A.; Jonasson, H.; Foster, M.; Rogers, M.; Underkoffler, R.