Abapwisha Isukulu lya Gileadi Batendeka Inshila ya Bumi Iya Kulambula

“MWANDI kashita ka nsansa aka kali, ukupwisha ikalasi lyalenga 90 ilya Gileadi!” Mu kuba na ayo mashiwi, ceyamani, Karl F. Klein uwe Bumba Litungulula, atendeke programu wa kupwisha isukulu. Ukwibukisha lintu Watchtower Bible School of Gilead lyatendeke, alundilepo ukuti: “Nga ni ani atontonkenye, ku numa mu 1943, lintu ikalasi lya kubalilapo ilya Gilead lyapwishishe isukulu ukuti imyaka 48 pa numa twali no kwisa capamo na kabili ku kupwishe sukulu ukwe kalasi na limbi—ilyalenga 90?”

Nalyo line, pa March 3, 1991, akasuba ka miceele isuma mu New Jersey, ukucila pa beni balaalikwe 4,000 ne filundwa fya lupwa lwa Bethel balilongene pa Ŋanda ya Kulonganinamo iya mu Jersey City, ukucilinganya fye umumana ukufuma mu New York City, ku kupwisha isukulu ukwa aba bamishonari bapya. Pa ntanshi ya kutendeka ubumi bwa bumishonari, abapwisha isukulu bali no kupokelela ukufunda kwa kushalikapo pali ubu bushiku bwabo ubwa kupwisha isukulu.

Programu yaiswilwe mu kuba no lwimbo. Pa numa ya ico, bonse abasangilweko baliseshiwe mu kushika lintu Frederick W. Franz, presidenti wa Watchtower Bible School of Gilead uwa myaka ya bukulu 97, apeele ipepo lya kwiswila. Lyene, pa numa ya kulandapo kwa kwiswila kuli ceyamani, abapwishe sukulu—na bonse abasangilweko—balikutike mu kuba no buseko ku kukonkana kwa malyashi ayepi, aya kwaafwa.

Max H. Larson uwa Komiti ya Fakitare alandile mu kubalilapo, pa mutwe wa kuti “Bakabomba Banabo na Yehova.” Pa numa ya kuleta ukusakamana ku cibwato ca kupusukilamo ico Noa no lupwa lwakwe bakuulile, asosele ukuti: ‘Ilelo Yehova alelonganya ulupwa lwa mamilioni ulwa mu kusaalala kwa calo, kabili afwaya ukusenda ulu lupwa lukalamba ukupula mu bucushi bukalamba.’ Shani? Kwena, ukupitila mu cibwato ca muno nshiku—paradise wa ku mupashi! ‘Imwe,’ e fyo acinkwileko abapwishe sukulu, ‘mukaya mu mbali shalekanalekana ishe sonde, uko mukaba bakabomba banankwe na Yehova mu kukuula icibwato ca muno nshiku.’ Ukubapekanishisha ku cabalalile ku ntanshi, asosele ukuti: ‘Cili no kusendako umulimo pa lubali lwenu. Cili no kusendako ukutekanya. Muli no kulolenkana ne fipindami. Pano epo mukakabila ukulamuka uko ukukanshiwa kwenu kwamupeela.’

Daniel Sydlik, icilundwa ce Bumba Litungulula, mu nshita ya nomba line alitandalile bamishonari bakokole mu Japan na Costa Rica. Ukulundulula umutwe “Iyenu ni Nshila ya Bumi iya Kulambula,” ayakene imitubululo imo iya kwaafwa iyo anonkele ukufuma kuli aba bamishonari batunguluka. Nkashi umo, e fyo alondolwele, apeele ukupanda amano kumo uko nyina amupeele: ‘Temwa umulimo wa mwi bala. Panga ifibusa na bantu. Akana ubumi bobe na bambi, kabili cikapilibula insansa kuli iwe.’ Nkashi na umbi asosele ukuti: ‘Mu kupita kwa myaka, twalisa mu kutesekesha ukuti nga ca kuti tatuleenekela ifingi ukufuma kuli bambi, tatwakalengwe insoni mu kwanguka. Incitilo yonse iya cikuuku ne ya kulangukilako iyo yaisa kuli ifwe ipilibula ifyafulilako kuli ifwe.’ Ukubomfya ukupanda amano kubomba ukwabula ukutwishika kukafwa abapwishe sukulu ukuba ba mishonari batunguluka abene.

“Beni abashishimisha kuli bonse,” e fisosa 1 Abena Tesalonika 5:14 (NW). Leon Weaver uwa Komiti wa Dipartimenti wa Mulimo alandilepo pali ili lembo ilyo alandile pa mutwe “Beni Abatekanya mu Mibombele Yenu Yonse.” Ni bani basanshiwa muli ‘bonse’ ukulola kuli abo tufwile ukubelesha ukutekanya? Kalanda ayaswike ukuti: ‘Abo mukakumanya mu mulimo wa mwi bala. Bamunyina ne nkashi mu cilonganino cenu icipya. Bamishonari banenu. Abo abali mu musambo. Umwina mobe. We mwine.’ Mulandu nshi uwa kubela abatekanya mu mibombele yesu yonse? ‘Bamunyina ne nkashi,’ e fyo kalanda alondolwele, ‘ukutekanya kulacefyako ukukanshika ne sakamika. Ukutekanya kulaletako umutende. Ukutekanya kulasungilila isubilo ilyumi. Ukutekanya kulatwaafwa ukusungilila ubuseko bwesu mu kubomba.’

Albert D. Schroeder, icilundwa ce Bumba Litungulula kabili kalemba wa kutendekelako uwe Sukulu lya Gileadi, alandile mu kukonkapo. Ukulanda pa mutwe “Twalilileni Ukukonka ica Kupashanya Cenu—Yesu Kristu,” ashimpile ukulandapo kwakwe pa Abena Filipi icipandwa 2. “Sungeni imibele ya muntontonkanya [“Ici cibe ca kumwibukisha,” utulembo twa pe samba] muli imwe iyo yali na muli Kristu Yesu,” e fisosa Abena Filipi 2icikomo 5. (NW) ‘Ici cilangilila,’ e fyalondolwele kalanda, ‘ukuti tulekabila ukukwata ukutontonkanya kwashikatala, nga fintu fye Yesu umwine akwete ukutontonkanya kwashikatala.’ Ukutampa ne Abena Filipi 2cikomo 6, mu kukonkapo acitile ukubebeta kwa kucincimusha, ukulangilila ukuti Paulo apeela ubushinino bwa kuti Yesu alikwete ukutontonkanya kwashikatala (Abena Filipi 2icikomo 6-8) kabili lyene alondolola inshila muli isho Yehova amulambwile ku nshila yakwe iya cumfwila (Abena Filipi 2ifikomo 9-11). ‘Ulu lubali lwe shuko lyenu,’ e fyo asondwelele, ‘ku kushimikila Shikulu Yesu Kristu, ukwaafwa bambi ukukwata imibele ya muntontonkanya imo ine iyo akwete.’

Mashiwi nshi aya kushalikapo ayo bakafundisha be sukulu bakwatile abasambi babo? Jack D. Redford alandile pa mutwe “Amaka ya Kutontonkanya Yakamubakilila.” (Amapinda 2:10, 11) ‘Ilyo muleya nomba,’ e fyo alondolwele, ‘insansa shenu tashakashintilile pa cintu mwaba nelyo pa cintu mwakwata nelyo fye pa cishinka ca kuti muli abapwishe sukulu lya Gileadi. Ukutontonkanya kwenu kukashintilila pa fintu mutontonkanya. Nga ca kuti mwabelesha amaka yenu aya kutontonkanya no kubomfya ukwishiba kwenu, mukaba aba nsansa.’ Ukulangilila ubucindami bwa maka ya kutontonkanya, alondolwele ukuti: ‘Ubupusano bwaba pa kati ka ncitilo yalungama ne yalubana bwaba litontonkanyo. Cintu mutontonkanya cipima cintu mucita.’ J. D. Redford asondwelele mu kuba na aya mashiwi ya kukoselesha ku basambi: ‘Kwalibako abantu abengi abalamukisha mu calo abo bashitontonkanya bwino, kabili kwabako abantu abengi abamucetekanya pa cipimo ca pa kati ababa abatontonkanya abalamuka. E co nonkeni uko kulamuka. Beni aba mupampamina ku kubomfya umuntontonkanya wenu. Bomfyeni ukwishiba kwenu. Bombeni ne mpika. Bombeni bwino na bantu. Pokeleleni ubulashi. Beni abasandulula mu mulimo wenu. Shipikisheni mu kupeelwa kwenu ukwa mulimo.’

Ulysses V. Glass, kalemba we sukulu, asobwele umutwe “Yehova Aleyafwilisha Ukuboko Kwesu,” ukushimpwa pe Ilumbo 37:23, 24. ‘Mfwile ukutasha ili kalasi,’ e fyo alandilepo, ‘pa buseko bwabo ubwa kusambilila.’ Abebukishe ulwa kwaafwa kumo uko Yehova apayenye mu kwafwilishiwa kwabo—Icebo ca kwa Lesa, umusha wa cishinka kabili uwashilimuka pe samba lya butungulushi bwa kwa Yesu ku kupeela ubupilibulo no kumfwikisha ku Malembo, impapulo shalekanalekana, ukulongana, na mabungano. ‘Ukwaafwa uko mwabomfya mu masambililo yenu,’ e fyo atwalilile, ‘kwapala inkonto no mutambu ifya ku mupashi. Tulafikabila ku kwafwilishiwa kwesu ukwa ku mupashi, kabili filatulenga ukulanda mu kuba no bulashi mu kutwala Icebo ca kwa Lesa muli bambi.’ Mu kusondwelela akwete aya mashiwi ya kupanda amano ku basambi: ‘Nga ca kuti umutima wenu waisulamo no kutemwa ku bantu, imitima yafumaluka ikankulako. Mukatunguluka mu butumikishi bwenu, kabili mukeshiba ukuti Yehova aleyafwilisha ukuboko kwenu.’

Kalanda wa kulekeleshako pali programu ya lucelo aali ni Carey W. Barber uwe Bumba Litungulula, uwasobwele umutwe “Ingileni pa Mwinshi wa Kamfyemfye.” Ukulandapo pali Luka 13:23, 24, amwene ukuti: ‘Abengi balefwaya amapaalo ya bumi, lelo banono nga nshi bali abaitemenwa ukupilikita abene mu kukumanina ku kuyanonka.’ Ni shani pa lwa ifwe? ‘Cili icisuma kuli ifwe ukuipusha fwe bene ukuti, “Cinshi cintu ici cikope ca mwinshi wa kamfyemfye cipilibula kuli ine pa lwandi?”’ Abo abafilwa ukwingila pa mwinshi wa kamfyemfye balafilwa, te pa mulandu wa kuti cili icishingacitika, lelo pa mulandu wa kuti tabali abaitemenwa ukupilikita abene. ‘Yehova taleipusha ifyafulisha kuli ifwe,’ e fyalondolwele kalanda. ‘Mu kuba no kwaafwa kwa kwa Yehova,’ e fyo asondwelele, ‘shi ifwe bonse mu buseko natupilikite mu kuba no lupikwe lwakumanina ukupeka ukupita pa mwinshi wa kamfyemfye ukwingila mu calo cipya ica bumi bwa muyayaya, ica mutende, ubuseko, ne nsansa, ku bukata bwa ciyayaya ubwa kwa Yehova!’

Ukukonka pali uku kulandapo, ceyamani apeele ukuposha ukwapokelelwe ukufuma ku mbali shalekanalekna isha calo. Inshita nomba yalifikile ku bapwisha isukulu ukupokelela amadiploma yabo. Abasambi bafumine ku fyalo mutanda—Canada, Finland, Germany, Great Britain, Switzerland, na United States. Ukupeelwa kwabo ukwa mulimo, nangula ni fyo, kuli no kubatwala ku fyalo pamo nga Argentina, Benin, Bolivia, Dominican Republic, Papua New Guinea, Peru, St. Lucia, na Taiwan. Kabili ni shani fintu abasambi bayumfwile pa bushiku bwabo ubwa kupwisha isukulu? Muli kalata wa kubimbula uwalungatikwe kwi Bumba Litungulula no lupwa lwa Bethel, basosele mu lubali ukuti: “Tuli abacetekela ku kutungililwa kwe Bumba Litungulula, ulupwa lwa Bethel, no kuteyanya konse ukwa kwa Yehova. Ilyo twalolenkana ne fya kwesha ku ntanshi, uko kutungililwa kuli cintu cimo ico tukakatamika. Pali ici mu cine cine tuli aba kutasha.”

Pa numa ya kutusha, programu ya cungulo yatendeke ne Sambililo lyaipifiwa ilya Ulupungu lwa kwa Kalinda, ukutungululwa na Karl A. Adams. Pa numa ya ico, abasambi balangilile ifyakukumanya fya cine ifya bumi ukutonta pa buyo bwa kusambilisha Icebo ca kwa Lesa. Mu kupelako, bonse abasangilweko, ukusanshako ikalasi lyalenga 90, baipakishe icilangililo calingana ne nshita icali no mutwe wa kuti Sengauka Amasakamika ya Bumi, ukupeelwa na bakasabankanya ba cikaya.

Ceyamani, Karl Klein, alandile kuli bonse lintu asosele mu kulandapo kwakwe ukwa kusondwelela ukuti: “Mu cine cine caciba icisuma kuli ifwe ku kuba pano pali buno bushiku bwalenga shitatu ubwa March 1991!” Programu ya kucincimusha lyene apwile mu kuba no lwimbo, ukukonkwapo ne pepo kuli Harold J. Dies.

[Akabokoshi pe bula 27]

Ukutantika kwe Kalasi

Impendwa ya fyalo fimininweko: 6

Impendwa ya fyalo fyapeelwa ukuyako: 10

Ubwingi bonse ubwa mpendwa ya basambi: 24

Avareji wa myaka ya bukulu: 31.2

Avareji wa myaka mu cine: 15

Avareji mu butumikishi bwa nshita yonse: 11

[Icikope pe bula 26]

Ikalasi Lyalenga 90 Ilya Bapwishishe Sukulu lya Watchtower Bible School of Gilead

Mu mutande pe samba, imitande ipeelwe amanambala ukufuma pa ntanshi ukuya ku numa kabili amashina yatantikwe ukufuma ku kuso ukuya ku kulyo mu mutande umo umo. (1) Miller, M.; Helenius, S.; Marsh, L.; Kleeman, A.; Loosli, Y.; Nizan, H. (2) Skogen, R.; Nutter, D.; Noack, E.; Diehl, L.; Hair, J. (3) Marsh, C.; Helenius, H.; Loosli, M.; Danio, A.; Danio, A.; Nizan, D. (4) Miller, L.; Noack, J.; Hair, L.; Kleeman, W.; Skogen, D.; Diehl, S.; Nutter, W.