Bakabilisha ba Bufumu Bacita Lipoti

Imbila Nsuma Ukufuma ku Norway

IFYAKUKUMANYA ifingi ifyawamisha filekwata na bakabilisha ba mbila nsuma ukucila pali 9,500 mu Norway. Aba mitima ya bufumacumi beshiba ubukombe bwa Baibolo ububilishiwa ne Nte sha kwa Yehova nga icine kabili nga icasuko ku mapepo yabo, nga fintu camonwa mu fyakukumanya fyakonkapo.

◻ Abaupana babili abacaice bapepele kuli Lesa ku kubaafwa ukusanga imifwaile mu bumi. Umulungu umo pa numa Inte sha kwa Yehova balitandele, kabili umukashi alibalalike ukwingila. Umulume alisokelwe pa lwa Nte, e co alifumine mu ŋanda ku kusamfya motoka yakwe. Umukashi afyalilwe mu Lebanon kabili alikwete impika ya lulimi, e co Inte bamulangishe ishina lya kwa Yehova muli Baibolo yakwe iya ciArab. Imilungu ibili pa numa Inte balibwelele, umulume na kabili aliile pa nse ku kusamfya motoka yakwe. Inte baipwishe umukashi nga ca kuti kuti alanguluka umulume wakwe ukusangwapo inshita ikakonkapo pa kuti engelula, kabili alaile ukumwipusha.

Pa kutandala kwa citatu, motoka yali iya busaka nga nshi ica kuti uyu mwaume tayumfwile ukubomfya cene ngo bwelelo ku kufumapo, e co aliikele no kwipusha ifipusho fyafulilako ku kusanga ubupusano pa kati ka Nte ne calici lya Buteko. Ukutandala kwapwile amaawala yatatu, kabili broshuwa yalishalikwe ku baupana babili. Lintu Inte bafuminepo, umukashi aile ku kusendama lelo umulume atendeke ukubelenga broshuwa, no kusapika amalembo yonse. Pa kati ka bushiku ashibwishe umukashi wakwe no kusoso kuti: “Ufwile ukubelenge ci.” Alishibwike, kabili babelengele capamo ukufikila 5 koloko ulucelo. Pa kumwensekesha ukuti nabasange cine, baponeshe filamba fya buseko no kupepa kuli Yehova, ukubomfya ishina lyakwe. Isambililo lya Baibolo ilya lyonse lyalitendekwe na bene, kabili batendeke ukusangwa ku kulongana. Umwaume alekele ncito yakwe iya bushilika, kabili balifumine mwi calici no kuleka ukupeepa. Nomba balibatishiwa kabili mu nsansa balebombela Yehova capamo na bamunyinabo ne nkashi ukupulinkane calo conse.

◻ Bankashi babili mu butumikishi bwabo ubwa ku ŋanda ne ŋanda mu Norway bakumenye umwanakashi uwalangile ubuseko. Alibalalike ukubwela kabili aipwishe nga ca kuti kuti alalikako abanakashi bambi. Pa kutandala kwakonkelepo, abanakashi bambi bane balisangilwepo. Umo uwa bene aali uwacincila nga nshi mu calici. Alondolwele ukuti ukutula apo abelele umunono, afwaile ukumfwila ikambisho lya kwa Yesu ku kupanga basambi. Ici camutungulwile ku Africa no mulume wakwe pa mulimo wa kwafwilisha uwa mu fyalo fimbi. Abanakashi bonse balikwete amepusho ayengi, kabili catantikwe ifyo bankashi baali no kubatandalila pa numa ya milungu yonse ibili. Abena mupalamano abapya balilalikwe, kabili bamo batwalilile ukwisa ilintu bambi balilekele ukusangwako, lelo icilundwa ce calici uwacincila alitesekeshe ukuti alesambilila icine. Ubushiku bumo, lintu minista we calici lyakwe alondolwele ukuti aali no kwafwilisha inkondo no kuti asumine mu cisambilisho ca Bulesa Butatu, alifuminemo mwi calici. Atendeke ukusangwa ku kulongana kwa Nte sha kwa Yehova kabili mu kwangufyanya atendeke ukwakanamo mu mulimo wa kushimikila. Mu kwipipa pa numa alibatishiwe. Mu kupelako nomba, pa numa ya myaka 30, kuti acankwa mu kumfwila mu cine cine ikambisho lya kwa Yesu ku kupanga basambi.—Mateo 28:19.

Yehova alepaala bamunyina mu Norway mu mulimo wabo uwashila capamo na abo abalekutika ku mbila nsuma!