Bakabilisha Ba Bufumu Bacita Lipoti

“Alishuko Muntu Uusanga Amano”

IPINDA ili lyalishininkisha ukuba ilya cine mu Korea, uko nomba ukwaba Inte sha kwa Yehova isha nsansa ukucila pali 71,000. (Amapinda 3:13) Kabili elenganya, 42 peresenti uwa aba batumikishi baba mu mulimo wa nshita yonse! Ifya kukumanya fyakonkapo fyalalangisha ukuti insansa e cipendwilo ca abo abasokota amano ya cine.

Umwanakashi mu Pusan alisangilwe ku macalici ya Kristendomu pa myaka 16. Aali namona ifibelesho fishili fya mu malembo ifingi kabili atendeke ukutontonkanya ukuti limbi takwaba Lesa. Pa lubali lumbi, taali na maka ya kukaana ukubako kwa kwa Lesa, e co mu kufumaluka apepele kuli Lesa pa kuti engasanga icalici lya cine nga ca kuti kwaliba icintu ca musango yo. Pali aka kashita mu kupumikisha atontonkenye pa lwa Nte sha kwa Yehova, kabili aibukishe ukuti icalici lyakwe lyalibasuulile kabili lyasokele abaleisa ku calici pa lwa bene pantu Inte tabasumina muli Bulesa Butatu, umulilo wa helo, ne fifundisho fimbi ifya Kristendomu. Napamo bali e calici lya cine? Mu kuba no kwaafwa kwa mwina mupalamano, asangile ukwabela Iŋanda ya Bufumu. Ubushiku bwine ubwakonkelepo, alisangilwe ku kulongana.

Alisungwike pa kumono muyano wa kulongana. Takwali ukupunda kwalaluka nelyo ukwimba kwa kubalamune nkuntu nga fintu cali mwi calici lyakwe. Alilondolwelwe kuli Nte uwali uwaitemenwa ukusambilila Baibolo na wene, kabili isambililo lya kubalilapo lyapoosele amaawala ayengi pa mulandu wa fipusho fyakwe ifyafulisha. Pe sambililo lyalenga bubili, abilishe ukuti aali no kuyafuutisha ishina kwi calici no kusanguka Inte. Aebele nkashi ukuti taali no kukabila ukusambilila na wene na kabili, apantu aali no kulasangwa fye ku kulongana. Nangu cibe fyo, alilangilwe ubucindami bwa kukwata isambililo lya Baibolo ilya pa ŋanda ukulunda pa kusangwa ku kulongana. Alipokelele ukutubulula, aliibikilisheko ku masambililo yakwe, kabili mu kupita kwa nshita alibatishiwe.

Nomba ali uwa nsansa nga nshi apo alisanga amano ya kwa Lesa wa cine, Yehova, kabili alikwata isubilo lya kwikala kuli pe na pe mu calo cipya ica kwa Lesa.

Mushika Walambuka Asambilile Cine

Umukashi wa kwa mushika wa fita abatishiwe mu 1962. Umulume wakwe alemukaanya pa kubalilapo, lelo pa numa alilekele ukumukaanya, kabili mu manshintula pa myaka yakonkelepo 28, bamunyina balekanalekana balisambilile na wene, ukwesha ukumusekesha mu cine. Alesangwa ku kulongana kumo kumo na mabungano, lelo aali ni umo uwa balya bashimba ukufuma ku kusende cine mu kukatama. Mu 1990 wene no mukashi wakwe baile ku Japan, uko bailesangwa kwi bungano lya citungu. Pali aka kashita alikutike mu kusakamanishisha ku malyashi—icintu ico ashalecita pa kubala. Alitulumushiwe ku malyashi yashipa ayalesansalika ubutotelo bwa bufi, lelo aya mu kushininkisha yaiswile amenso yakwe ukumona ubumbimunda bwa Kristendomu. Alyebekeshiwe ku muyano ne nsansa sha bantu ba kwa Lesa mu Japan, icali fye cimo cine na cintu amwene ku Korea. Ukubwelela ku Korea, atendeke isambililo lyasakamanisha ilya Baibolo kabili mu kupelako alibatishiwe.

E co pa numa ya lubatisho lwakwe cinshi alingile ukucita? Alilekele umulimo wakwe nga presidenti we hotela lyalumbuka ilya batandashi bafuma ku nse ya calo kabili ailundile ku mukashi wakwe mu butumikishi bwa bupainiya bwa nshita yonse. Ayumfwa ukuti ukuba painiya wa nshita yonse e nshila yawamisha iya kufuta imyaka 28 alufishe ilintu aleshimba.

Nomba alimwensekesha ukuti ipinda lya kuti “alishuko muntu uusanga amano” lilabomba na kuli wene!