Cinshi Cacitika ku Cifyalilwa ca Buntunse?

“Mulandu nshi cabela ukuti twalikwata ubunkalwe bwa bana muli ino nkulo? Mulandu nshi cabela ukuti twalikwata ubunkalwe bwa bunama? Mulandu nshi cabela ukuti twalikwata ulukaakala? . . . Mulandu nshi cabela ukuti abantu balukila ku kululunkanya? Mulandu nshi cabela ukuti abantu babomfye miti ikola? . . . Mulandu nshi, ilyo walikwata fyonse, ico abantu bamo balukila kuli ifyo fintu fyacindama ifibotelesha ukutumpuluka konse?”

AYO mepusho yaipushiwe mu kupongomoka na minista mukalamba uwa ku Britain. Nakalimo walipusha amepusho yapalako inshita ishingi. Bushe walisanga ifyasuko ifili fyonse ifya kwikusha?

Ukubika ifipusho fyakwe mu kulingulula, minista mukalamba asosele ukuti: “Pa myaka lintu nali umwaice kabili mu mapolitiki mu kuba na masubilo yandi ne filoto no kuibililika, camoneke kuli ine na ku bengi aba nshita yandi ukuti nga ca kuti twalikwete inkulo uko twakwete amayanda yasuma, amasomo yasuma, imikalile ya bumi iyalinga, lyene icili conse nga calipekanishiwe kabili nga twakwete inshita ya ku ntanshi iyalinga kabili iyacilapo kwanguka. Natwishiba nomba ukuti ico te fyo cili. Tuletiinishiwa ne mpika sha cine cine isha cifyalilwa ca buntunse.”—Utulembo tunono twesu.

Icifyalilwa ca buntunse kuti calondololwa ngo “kupikana kwa mibele yacindama no kukongama kwa bantunse.” Ukwabulo kutwishika, imibele ipinkana no kukongama kuti fyalenga impika pa cipimo ca umo umo, pa nko, nelyo pa kati ka nko. Lelo kufika ku cipimo nshi icifyalilwa ca buntunse cingaba no mulandu mu cine cine ku mibele ya cinkumbawile iya busanso mu lukaakala lwa ilelo, ukululunkanya, ukufyusha imiti, ne fyapalako?

Bushe icifyalilwa ca buntunse ceka e cakwato mulandu ku mibele iyo iletiinya “ukubotelesha ukutumpuluka konse”? Nelyo bushe kwalibako ifya kusangwilako fimbi ifyo tulingile ukulanguluka ku kulondolola umulandu abantu mu kwanguka bakongamina ku fibelesho fibotelesha, ifyabamo akaso ilintu bengafwaya ifikonkelelo fyasumbuka, ifya mucinshi? Natumone.