Ubuseko bwa mu Cibulungwa Conse

“MONENI, ababomfi bandi bakaanga ku kubuuta ku mutima.” (Esaya 65:14) E fyasosele Yehova ukupitila muli kasesema wakwe Esaya, kabili mwandi kufikilishiwa kukalamba kuntu amashiwi yakwe yalekwata pa kati ka Nte sha kwa Yehova! Ni kwi kufuma ubuseko bwabo ubwa ku mutima? Ukufuma ku kupepa kwabo ukwaikatana ukwa kwa Yehova Lesa. Wene ni “Lesa wa nsansa,” kabili abo abamupepa ‘baangila muli Yehova.’ (1 Timote 1:11, NW; Sekaria 10:7) Uku kuipeelesha kwa buseko kulabekatanya mu luko lumo ilyo bonse capamo baleshimikile mbila nsuma iya Bufumu no kubilikisha iciunda ca mu cibulungwa conse ica kulumbanya kuli Lesa wabo.—Ukusokolola 7:9, 10.

“Ubuseko Ubo Tapali Uwingapokolola”

Mu cine cine, ukusabankanye shina lya kwa Lesa no Bufumu ni ntulo ya buseko bwatwalilila ku Nte sha kwa Yehova. (Marko 13:10) Balankulako ku mashiwi ya kwa kemba wa malumbo aya kuti: “Takishisheni mwi shina lyakwe lya mushilo, imitima ya bafwaya Yehova isamwe.”—Ilumbo 105:3.

Ilingi line, balacimfya ifipindami pa kucite ci. Mu Spain, Isidro aipeele umwine kuli Yehova, kabili afwaile ukulanda kuli bambi pa lwa Wene. Lelo ni namutekenya wa cimbayambaya mu kuba ne nshita inono iya bwanalale, ukupanga inyendo shalepa ukupulinkana ubushiku kabili ukusendama mu kati ka kasuba. Isidro afwaile ukucitilo bunte kuli bakensha bambi aba fimbayambaya, lelo ni shani fintu aali na maka ya kucite ci?

Abikile ku cimbayambaya cakwe umulabasa wa radio uwa CB (citizens band) uyo aali na maka ya kubomfya ku kulanda kuli banamutekenya bambi. Mu kwangufyanya asangile umulabasa wa radio 13, uubomfiwa lyonse, kabili apingwilepo ukuushukila. Kwena, lintu atubulwile ntanshi kuli bakensha bafimbayambaya bambi ukuti balanshanye pa lwa Baibolo ukupitila mu mulabasa wa radio uwa CB, ukwankulako kwali ukwapusanako nga nshi. Lelo bamo balikutike. Ishiwi lyalyanene, kabili abafulilako na bambi aba muli balya bakensha ba fimbayambaya fya ku Spain bakutike ku mulabasa 13. Mu nshita ya nomba line, Isidro aishibe ukuti mu kucefyako umo alebuule ntampulo sha kutwala pa ntanshi isambililo lyakwe ilya Baibolo.

Mu Italy umwaume umo aumfwile ulwa Nte sha kwa Yehova ukupitila mu kulanshanya akwete muli basi. Umukashi wakwe abakumenye ukupitila muli cibusa. Bonse babili basambilile Baibolo kabili baali abafwaisha ukwakana ico basambilile na bambi. Baali abafwaisha nga nshi ica kuti umwaume akene ukusumbulwa mu kampani kakwe kabili umukashi alekele incito ya malipilo yasuma pa kuti bengaba na maka ya kupoosa inshita yakulilako ukwebako bambi imbila nsuma iya Bufumu. Bushe caali icawamina cene? Ee. Umwaume asoso kuti: “Ukutula apo twaishibile cine, umukashi wandi na ine twalikwata ubuseko bwa kwaafwa abantu 20 ukwisa ku kwishiba kwalungikwa ukwa mifwaile ya kwa Lesa. Lintu icungulo bushiku caisa, kabili nabwelela ku ŋanda pa numa ya kasuba mu mulimo wa kwa Yehova, ndayumfwa uwanaka, cili ca cine. Lelo ndabo wa nsansa, kabili ndatootela Yehova pa kumpeela ubuseko ubo tapali uwingapokolola.”

“Ukufika ku Mpela ya Pano Nse”

Abo ababa mu luko lwa buseko ulwa kwa Lesa balalanga ukupimpa kwapalako ukuli konse uko bali, nelyo fye “ku mpela ya pano nse.” (Imilimo 1:8) Incende shinono shalibesho kutali ukucila Greenland yabela ku kapinda ka ku kuso. Nalyo line, nelyo fye ni kulya, amakilomita 320 ku kapinda ka ku kuso aka Arctic Circle, kwaliba icilonganino cinono ica Ilulissat, icapangwa na bantu 19. Balashimikila imbila nsuma imo ine ukupala balya babili abaupana abena Italy, kabili baali abacincimushiwa umwaka wapwile ukumona abena Greenland babatishiwa mu kulangilila ukuipeela kwabo kuli Yehova.

Amakana ayengi aya bamailosi ukufuma ku Greenland, pa cishi ca miceele yakaba panono ica Mauritius mu Indian Ocean, Anjinee alikwata ubuseko bumo bwine. Ifintu intanshi fyali ifyayafya kuli Anjinee. Mu Mauritius ukusangwa ku kulongana kwa Bwina Kristu no kushimikila apabuuta pa lwa kwa Lesa takumonwa nge mibombele yalinga ku mukashana umushimbe uwa ntuntuko ya buHindu bwa ku India. Lelo Anjinee alikoselele. Nomba, imyaka pabula pa numa lintu atendeke inshila yakwe iya Bwina Kristu, bamo aba mu bantu bakwe na bo bene balesambilila Baibolo.

Mu kulundana na Anjinee kufwile kwalumbulwako Emilio, pa lubali lumbi ulwa calo, mu Honduras. Emilio aumfwile abanankwe ba pa ncito balelanshanya Baibolo pa ncito kabili alombele ukusanshiwamo. Taali na maka ya kubelenga lelo akutike mu kuba no kusekelela lintu amalembo ya Baibolo yalebelengwa. Ilyo icine ca Bwina Kristu capekele mu mutima wakwe, Emilio alekele umusango wakwe uwa bumi bwa bucisenene kabili alekele ukunwa mu kucishamo. Inte sha kwa Yehova shamusambilishe ukubelenga no kulemba, kabili nomba ali mutumikishi mu luko lwa buseko ulwa kwa Lesa.

Amakana ya makilomita pa kati ka kapinda ka ku kuso na masamba aka Honduras, nyina umuEskimo mu Alaska asambilile icine cimo cine ica Bwina Kristu. Uyu namayo aikele mu mushi waba weka nga nshi, kabili ukumfwana fye kwakwe kweka ne Nte sha kwa Yehova kwali ukupitila mu makalata. E co asambilile ukupitila mu makalata, aipwishe ifipusho fyakwe ukupitila mu makalata, kabili nomba aleakana mu kupimpa cintu aishiba na bena mupalamano bakwe. Ifya kumwenako pamo nge fi kuti fyafushiwa mupepi no kukanakwate mpela. Bonse ukushinguluke cibulungwa conse, aba mitima yafuuka baleisa ku “kubombela Yehova no kusekelela.”—Ilumbo 100:2, NW.

‘Kwateni Ukutemwana’

Icintu cimo icicebusha aba bonse cili kutemwa ukwabako mu luko lwa buseko ulwa kwa Lesa. Yesu atile: “Muli ici e mo bonse bakeshibilo kuti muli basambi bandi, nga mwaba no kutemwana.” (Yohane 13:35) Ukutemwa kwa Bwina Kristu kulamonwa mu bumi bwa cila kasuba ubwa aba Abena Kristu bene bene, ukucilisha mu nshita sha kayofi.

Mu calo cimo ica Africa uko imibombele ya Nte sha kwa Yehova, ku ceshamo, yabindwa, kwaliko icilala cabipisha. Abantu amakana ikumi balifwile, kabili imikuni iya ŋombe yonse yalilobele. Ni shani fintu Inte shapusunswike? Pa kulya imishila ya fimenwa ne nseke sha makotapela ishaipikwa! Lelo ukupelelwa kwabo kwalyangushiwe apakalamba nga nshi lintu, mu kuba no kwaafwa kwa kwa Lesa, Inte mu fyalo fimbi mu kukanaenekela bapokele ukusuminisha ukutuma amatani 25 aya kupayanya kwa kukumbusuka. Mu cine cine, te mulandu ne cibindo, uku kupayanya kwashindikwe ne fita pa kushininkisha ukufika kwa kuko ukwabulamo busanso!

Mu cine cine, isho Inte sha mu Africa bakwete ubuseko bwacilapo pa kupokelela ubu bushinino bwa kutemwa kwa bamunyinabo kuli bene ilyo bakumenye ukufikilishiwa kwa mashiwi ya kwa Esaya aya kuti: “Moneni, ukuboko kwa kwa Yehova takwaipipa ku kupususha, kabili ukutwi kwakwe takwakoma ku kuumfwa.”—Esaya 59:1.

Abantu ba Mutende

Aba mitima yafuuka na kabili balacebushiwa ku luko lwa buseko ulwa kwa Lesa pantu ifilundwa fya luko balileka inshila shapale nkondo isha ici calo kabili ‘balifule mpanga shabo shibe ifya kuliminako umushili.’ (Esaya 2:4) Mu El Salvador, iŋanda ya wali umwaume wa fita yaiswilemo ifinkosonkoso fya kwibukishishako umulimo wakwe uwa fita. Lelo lintu atendeke ukusambilila Baibolo ne Nte sha kwa Yehova, alundulwile ubuseko bwa mutende. Mu kupelako, afumishe mu ŋanda yakwe icili conse icalebomba ne nkondo kabili mu kupimpa abuulile umulimo wa kushimikila.

Lintu imilalo ya kulwisha kamfulumende yapokele umushi wakwe, asendelwe umufungwa—mu kumonekesha umuntu umo alimusontele pamo ngo wali umwaume wa fita. Alondolwele, nangu cibe fyo, ukuti taali na kabili umushilika lelo umo uwa Nte sha kwa Yehova. Aba kupinuno buteko bamupeele umulandu wa kukwata ifyanso mu ŋanda yakwe, lelo ukusapika takwasokolwele icili conse. Umukalamba wa ba kupinuno buteko lyene aipwishe abena mupalamano pa lwa wene. Ukulandapo kwine kwine kwali kwa kuti: “Aya fye aleshinguluka mu musebo aleshimikila pa lwa Baibolo akasuba na kasuba.” Uyu mwaume alikakwilwe. Ukwabulo kutwishika, ukupimpa kwakwe kwabombele ku kupususho bumi bwakwe.

Lipoti ukufuma ku calo ca mu Africa ishimika ulwa bashilika babili abasambilile Baibolo ne Nte sha kwa Yehova. Umo abombele mu mulalo wa kamfulumende, umbi alwilile bacipondoka. Mu kupelako, bonse babili bapingwilepo “[ukufule] mpanga shabo shibe ifya kuliminako umushili” kabili balekele ncito ya fita. Lintu basangilwe ku kulongana kwa Bwina Kristu umuku wa kubalilapo, umushilika walelwisha kamfulumende aipwishe umbi ukuti: “Cinshi ulefwaya kuno?” Ayaswike ukuti: “Nga iwe, cinshi ulefwaya kuno?” “Lyene,” e fisondwelela lipoti, “ukuikumbata, baponeshe filamba fya buseko pa mulandu wa kuti baali na maka ya kuba pamo mu mutende.” Aba bonse babili abaali kale abaume ba fita ukwabulo kutwishika bapepele kuli Lesa ukuti: “Mpokololeni ku cilopa, mwe Lesa, Lesa ipusukilo lyandi; e lyo ululimi lwandi lukaawilo bulungami bwenu.”—Ilumbo 51:14.

‘Mwalimono Kucula Kwandi’

“Ndeyanga no kusamwa mu luse lwenu, mwe bamono kucula kwandi, mwe baishibo mweo wandi mu kumanama.” (Ilumbo 31:7) E fyapepele kemba wa malumbo, kabili abengi ilelo balasekelela pa mulandu wa kuti Icebo ca kwa Lesa cilabaafwa ukubomba ne fya kucula kwabo. Mu France umo uwa Nte sha kwa Yehova alatungulula isambililo no mwanakashi uucula ku bulwele bwa kufulunganishiwa umuntontonkanya (schizophrenia). Uyu mwanakashi aali pe samba lya kundapwa kwa bulwele bwa bushilu pa nshita imo, lelo ici tacayafwa. Umulungu pa numa lintu atampile isambililo lyakwe, shiŋanga wa mashilu aipwishe ukuti: “Bushe mu cituntulu ulomfwikisha cintu uyu mwanakashi alelondolola kuli iwe ukufuma muli Baibolo?” E co umulungu wakonkelepo, Nte aile kwi ofesi lyakwe no kusambilila Baibolo na namayo mu kubapo kwakwe.

Pa numa ye sambililo, shiŋanga wa mashilu aebele Nte ukuti: “Ukucila pa myaka iingi nalikwata ubuseko mu mabutotelo ya balwele bandi, lelo namwene ukuti takwali ukwafwilisha kwine kwine ukwapeelwe no butotelo ubuli bonse. Mu mulandu wenu, nangu ni fyo, ifintu fili fyapusanako. Mrs. P— esako imiku ibili mu mulungu ku kwipusha, kabili alandipila pali cene. Lelo, ku kusambilisha kobe ukwa Baibolo no kupanda amano kusuma, ulebomba umulimo wawaminako ukwabulo kulipilisha. Alecito kulunduluka kusuma. Twalilila, kabili ndekwebekesha ulwa kubombela pamo kwandi ukwakumanina nga ca kuti wakukabila.”

Baibolo isoso kuti: “[Ba nsansa, NW] abantu abaishiba akapundu ka mushilo; mwe Yehova, mu lubuuto lwa cinso cenu e mo bendela. Mwi shina lyenu e mo baleangila akasuba konse.” (Ilumbo 89:15, 16) Uuli onse uwa Nte sha kwa Yehova alishiba ukuti ili lumbo lya cine. Ukufuma pa tunwa twabo akapundu ka mu cibulungwa conse aka buseko kaleya ku kulumbanishiwa kwa kwa Yehova. Abengi na bambi balekonkoloka ukufuma mu nko ukwisa ku kulumbanya Lesa pamo na bene. Mulandu nshi te kubishanya na bene no kukumanya ubo buseko pa lobe?

[Icikope pe bula 07]

Inte sha kwa Yehova mu Eastern Europe balesekelela nomba mu buntungwa bwabo ubupya ukupokelela no kusambilila “Ulupungu lwa kwa Kalinda” mu lulimi lwabo lwine