Ni Shani Fintu Waishiba Bwino Baibolo?

‘Ibuku lya kwa Toma? Mu kushininkisha, ilyo lyaliba muli Baibolo. Lelo ibuku lya kwa Yona talyabamo. Icifulo ca kufyalilwapo ica kwa Kristu? Oo, ni Yerusalemu—nelyo bushe caali ni Nazarete? Nshili uwashininkisha mu cituntulu nampo nga ibuku lya kwa Esaya lyaba mu lubali lwa kubalilapo nelyo ulwa cibili ulwa Baibolo. Impendwa ya batumwa? Mu cituntulu nshaishiba.’

“UKU kusanga pambi kuti kwaisa nga ukushili kwa kupapusha nga ca kuti ifyebo fyalonganikwe fye pa kati ka bashili Bena Kristu,” e fisosa magazini ya Christianity Today. “Icilepapusha—kabili ica kupumfyanya—cili bukulu bwa bumbulu mu malembo ubo ubwasangilwe pa kati ka Bena Kristu bafyalwa libili.”

Ku ca kumwenako, 22 peresenti ya Bena Kristu ba mwi shina abafwailishiwe batontonkenye ukuti mu cituntulu kwaliko ibuku lya kwa Toma muli Baibolo, ilintu 13 peresenti tabashininkishe. Ukulosha kuli Yona, 27 peresenti batile talyali muli Baibolo, kabili 12 peresenti tabaishibe icili conse. Amaperesenti mutanda tabali fye na maka ya kutunganya uko Kristu afyalilwe, ilintu 16 peresenti balumbwile Yerusalemu, kabili 8 peresenti basosele ukuti ni Nazarete. 13 peresenti wakumanina tabaishibe icili conse uko ibuku lya kwa Esaya lingasangwa muli Baibolo, ilintu 11 peresenti balibikile ku Malembo ya Bwina Kristu aya ciGreek (“Icipingo Cipya”). Kabili ilintu abengi baishibe ukuti kwaliko abatumwa 12, 12 peresenti bapeele impendwa imbi, ukufuma pali 2 ukufika ukucila pali 20, kabili 10 peresenti tabaishibe icili conse nakalya.

Icipusho capeele impika ikalamba cali nampo nga inumbwilo “Lesa afwa abayafwa” yali muli Baibolo nelyo iyo. Ni 38 peresenti fye epela iya “Bena Kristu” bafwailishiwe e baishibe ukuti tayali no kusangwa apali ponse muli Baibolo, ilintu impendwa ikalamba, 42 peresenti, batontonkenye ukuti yali kwambula kwa Baibolo. Abashala tabaishibe.

“Mulandu nshi kwabela ubumbuulu bwakulishe fyo pa lwa Baibolo?” e fipusha Christianity Today. “Mu kupalishako nga nshi, bufuma ku kubulisha kwa mibele ya kubelenga iya Baibolo. Citika wa bena America bonse tababelenga Baibolo. Ubwingi bwa Bena Kristu bafyalwa libili babelenga Baibolo umuku umo nelyo ibili mu mulungu, nelyo ukukanabelenga fye. Te ca kupapa ifyo Abena Kristu abafulisha baishibila ifinono pa Malembo!”