Icitabo ico Abacaice Abengi Bashangwako

UMUKASHANA we shina lya Beate atile: “Kuti naishiba shani nga ca kuti Baibolo cine cine Cebo ca kwa Lesa? Ici citabo nshacitemwa.”

Ku Germany, uko Beate ekala, abacaice abengi e fyo bayumfwa; e co, tabamona ukuti ukubelenga Baibolo kwalicindama. Ukufwailisha kwa nomba line, kwasokolwele ukuti, mupepi na pesenti umo uwa bacaice e babelenga sana Baibolo, amapesenti yabili balabelenga ilingi line, amapesenti 19 limo limo fye, kabili mupepi na mapesenti 80 tababelenga nangu panono. Ifi fipendo kuti fyaba fimo fine na mu fyalo fimbi, napamo na kuntu wikala. Cailanga fye ukuti Baibolo citabo ico abacaice abengi bashangwako.

E mulandu wine, abacaice abengi baishibila ifinono sana pa lwa Baibolo! Ku kutendeka kwa mwaka wa 2000, inyunshipepala ya Lausitzer Rundschau yalandile pa kufwailisha kwa mpendwa ya bantu abaishibe Amafunde Ikumi kabili abaleyabomfya ngo butungulushi mu bumi bwabo. Amapesenti 67 aya bacilile imyaka 60 baliyeshibe kabili baletungululwa na yene; pa bashafishishe myaka 30, pali fye amapesenti 28. Ca cine, abacaice abengi, tabaishiba Icebo ca kwa Lesa.

Bamo Te fyo Baba

Lelo mwi sonde lyonse, mwaba abacaice imintapendwa abasanga ukuti Icebo ca kwa Lesa calicindama sana. Ku ca kumwenako, Alexander, ali ne myaka 19 kabili alabelenga Baibolo cila lucelo ilyo ashilaya ku ncito. Atila: “Kuli ine e nshila isuma iya kutendeka ubushiku bumo na bumo.” Sandra alibelesha ukubelengako Baibolo lyonse icungulo. Alondolola ukuti: “Pa fyo ncita cila bushiku paba no kubelenga Baibolo.” Kabili Julia, uuli ne myaka 13, alitendeka kale ukubelenga icipandwa cimo ica mu Baibolo ilyo ashilasendama. “Ndaipakisha sana ukubelenga, kabili ndefwaya ukutwalilila.”

Ni cili kwi icilungeme kabili ica mano? Bushe Baibolo isuma ukubelenga? Bushe ilafwa kabili bushe yalicindama ku bacaice? Uletipo shani?