Ifipusho Ukufuma ku Babelenga

◼ Bamalaika baba mipashi, ukwabula imibili ya munofu, e co mulandu nshi mubalangila mu filangililo nga bakwata amapindo? Bushe ici caba fye cishilano ca butotelo?

Ilingi line tulangisha bamalaika mu fikope na mapindo pa mulandu wa bulondoloshi bwa cimpashanya ubusangwa muli Baibolo.

Naulungika mu kusoso kuti ifibumbwa fya mupashi tafyakwata imibili ya munofu mu kuba na mapindo ya cine cine—atemwa ifinso, amaboko, amakasa, nelyo imbali shimbi isha mubili. Nalyo line, pa tushita tumo, lintu bamalaika bamonekele ku babomfi ba kwa Lesa, bafwile bamoneke ukupala abantu ba lyonse, pantu balimwenwe mu cilubo ukupala ifyo.—Ukutendeka 18:2, 22; 19:1; Abapingushi 6:11-22.

Pa nshita shimo, nangu cibe fyo, abantunse balipokelele ifimonwa fya bamalaika kabili balifilondolwele. Kasesema Esekiele amwene “fya mweo fine,” kabili mu cimonwa ca pa numa, aishibishe ifi nga bamalaika ba cifulo caishibikwa nga bakerubi. (Esekiele 1:5; 9:3; 10:3) Umo umo uwa aba bamalaika akwete amapindo yane, ayo yalangilile amaka yabo ku kwankula mu kwangufyanya mu ntunga iili yonse ku kukambisha kwa kwa Lesa. “Tafyayalwike mu kwenda kwa fiko; fyonse ukwalola ifinso fya fiko e ko fyaya. . . . Konse uko umupashi walola ku kuyako e ko fyaya, tafyalelwike mu kuya.”—Esekiele 1:6, 9, 12.

Lelo bamalaika bamwenwe mu fimonwa tabalemoneka lyonse abapalana. Ifibumbwa fya bumalaika ifitwa baserafi ifyo Esaya amwene fyakwete amapindo mutanda. (Esaya 6:1, 2) Kwaliko fye no bupusano pa kati ka fimonwa fya kwa Esekiele. Mu ca kubalilapo, bamalaika balikwete amakasa, amaboko pe samba lya limo limo ilya mapindo yane, ne finso fine (ukupala icinso ca muntu, inkalamo, iŋombe ilume, na kapumpe). Mu cimonwa cakwe icakonkelepo, cimo ica finso capalile ico ica kwa kerubi ukucila ŋombe ilume, nakalimo ukulangilila amaka yakalamba aya bakerubi. Mu cimonwa cimbi ica pa numa ica fya kuyemfya fye tempele lya cimpashanya, Esekiele amwene bakerubi abakwete ifinso fibili, cimo ica muntu na cimbi ica nkalamo. (Esekiele 1:5-11; 10:7-17; 41:18, 19) Umwashilisha mwi hema lya kulaishanya, pamo pene ne tempele ilyakuulilwe na Solomone mu Yerusalemu, mwali bakerubi abakwete amapindo yabili. Aba bali pa nkupiko ya golde iya cipao (imbokoshi) caleitwa icipao ca cipingo. Bakerubi babili aba golde balolenkene ifinso, kabili bonse babili bakwete amapindo yabili ukufimba pa Cipao. (Ukufuma 25:10-22; 37:6-9) Pa mulu wa Cipao (ne nkupiko ya ciko) mwi tempele lya kwa Solomone paiminine bakerubi babili abakulu abafimbwa na golde, umo umo akwete amapindo yatambululwa yabili.—1 Ishamfumu 8:6-8; 1 Imilandu 28:18; 2 Imilandu 5:7, 8.

Josephus alembele ukuti: “Na kuli [abo] bakerubi bene, takuli nangu umo uwingasosa nelyo ukwelenganya fintu bamoneke.” Muli fyo, abasambilila bamo na bakalenga bashimpa ukulangilila mu fikope fyabo ukwa bamalaika (ukucilisha bakerubi) pali ifyo ifitwa ifya kumwenako fya kutendekelako ifya pa kale ifya ku Near Eastern ifya balesa mu musango wa finama fya mapindo. Lelo ica kutungulula cacilapo kushintililwapo caba kulandapo kwa kwa Esekiele ukuti ifyo fyonse amwene “fyali ne cipasho ca muntu.” (Esekiele 1:5) E co lintu bamalaika ba mu myulu balangililwa mu mpapulo shesu, mu cinkumbawile tubalangilila mu fikope nga abantunse ku cipimo cikalamba mu mimonekele. Tubalanga na mapindo pa mulandu wa bulondoloshi bwafula ubwa Baibolo ubwa bamalaika balekanalekana pamo nga bakwata amapindo kabili pa mulandu wa kulandapo pa lwa bamalaika ‘ukupupuka.’—Ukusokolola 14:6; Ilumbo 18:10.

Mu kupelako, ibula 288 ilya citabo Revelation—Its Grand Climax At Hand! lilangisha icibumbwa ca mu mulu ica mapindo, icakwata icilongwe pa mutwe wakwe no lufungulo mu minwe yakwe. Uku e kwimininako kwamonekesha ukwa Ukusokolola 20:1: “Namwene malaika aleika mu mulu, ali no lufungulo lwa cilindi ca ku Mbo no munyololo ukalamba mu minwe yakwe.” Tumfwikisha uyu malaika wakwata ulufungulo ukuba Yesu Kristu wakatamikwa. Icilangililo cimulanga na mapindo mu kumfwana ne cishinka ca kuti bamalaika bamwenwe mu cimonwa ilingi line balikwete amapindo.