Ubumi bwa kwa Yesu no Butumikishi

Ukumoneka Kwalundwapo Ukwa kwa Yesu

ABASAMBI bacili abakungumana. Tabomfwikishe ubupilibulo bwa nshishi yabulwamo akantu, kabili tabasumine amalipoti ya banakashi. E co pa numa pa Mulungu, Kleopa no musambi umbi bafuma ku Yerusalemu ukuya ku Emao, apaba intamfu mupepi na makilomita 11.

Mu nshila, ilintu balelanshanya pa fya kuponako fya kasuba, umweni ailunda kuli bene. “Kwa nshi ukulanda uku muleyankulana pa kwenda?” e fyo aipusha.

Abasambi baiminina, ifinso fyabo ifyakontama, kabili Kleopa ayasuka ukuti: “Bushe uli mweni uwaba eka mu Yerusalemu, apo ushiishibe ifyaponamo mu nshiku shino?”

“Fintu nshi?” e fyo aipusha.

“Ifya kwa Yesu umwina Nasareti,” e fyo bayasuka. “Bashimapepo bakalamba na ba cilye besu bamupeele ku kupingwilwo kufwa, no [kumupopela, NW]. Na ifwe twalecetekela ukuti wene e walaswa alubule Israele.”

Kleopa no munankwe balondolola ifya kuponako fya kusungusha ifya kasuba—lipoti pa lwa kumoneka kwacila pa cifyalilwa ukwa bamalaika ne nshishi yabulwamo akantu—lelo lyene batumbula ukupelenganishiwa kwabo ukukuma ku bupilibulo bwa ifi fintu. Umweni ashimaula ati: “Mwe bapelwa amano, kabili abafine mitima ukutetekela fyonse ifyo bakasesema balandile. Bushe Kristu tali no kucule fi fintu, no kwingila mu bukata bwakwe?” Lyene abapilibwila ifiputulwa ukufuma mu calembwa cashila icakuma kuli Kristu.

Mu kupelako bafika pa Emao, kabili umweni acita kwati aletwalilila no lwendo. Ukufwaya ukuumfwa ifyafulilako, abasambi bacincisha ukuti: “Ikaleni ku mwesu; ico ni ku cungulo, na kasuba kacepa.” E co aikala ku kulya ica kulya. Ilyo apepa no kumokaula umukate no kubapeela, baishiba ukuti mu cituntulu ni Yesu mu mubili wa buntunse uwayaluka. Lelo lyene afumapo.

Nomba baumfwikisha ifyo umweni acishiba ifingi nga nshi! “Bushe imitima yesu taibilime mu nda,” e fyo baipusha, “ilyo aletulandila mu nshila, no kutukupukwila amalembo?” Ukwabula ukushingashinga, baima no kukwankwanya ukubwelelamo ku Yerusalemu, uko basanga abatumwa na abo abalongene na bo. Pa ntanshi Kleopa no munankwe tabalasosa icili conse, bambi mu kucincimuka bacita lipoti ukuti: “Cine cine Shikulu nabuuka, namoneka na kuli Simone.” Lyene babili na bo bacita lipoti ifyo Yesu na kabili amoneke kuli bene. Ici calenga umuku walenga ine mu kati ka kasuba lintu amoneka ku ba mu basambi bakwe abapusana.

Nangu cingati ifiibi nafikomwa pa mulandu wa kuti abasambi baletiina abaYuda, Yesu mu kupumikisha acita ukumoneka kwalenga busano. Aiminina pa kati na nkati kabo no kusoso kuti: “Umutende ube na imwe.” Batiinishiwa, ukwelenganya ukuti balemona umupashi. E co, ukulondolola ukuti tali mulungulwa, Yesu asosa ukuti: “Nga cinshi mwasakamikilwa? Cinshi ico amatontonkanyo yaimina mu mitima yenu? Moneni, indupi shandi na makasa yandi. Ni ine wine. Ntonyeni no kumona; ico umupashi tawakwata munofu na mafupa ifyo mulemona ine ndi na fyo.” Nalyo line, bali abashimunuka ukusumina pa mulandu wa kuti ukuba kwakwe uwa mweo kwamoneka ukuba icawamisha ukucila pa kuba ica cine.

Pa kubafwilisha ukumfwikisha ukuti mu cituntulu ali ni Yesu, aipusha ukuti: “Bushe pano mukwete ica kulya?” Pa numa ya kupokelela isabi ilyakangwa no kulya, atendeka ukubasambilisha, ukusoso kuti: “Ifi e fyebo ifyo nalandile kuli imwe, ilyo nali ncili pamo na imwe, [pa ntanshi ya mfwa yandi], ukuti fili no kufishiwapo fyonse ifyalembelwa ine mu Malango ya kwa Mose na muli bakasesema na mu sha Malumbo.”

Ukutwalilila ico, kwena, cilelingana ne sambililo lya Baibolo na bene, Yesu asambilisha ukuti: “E fyo calembwa, ukuti Kristu ali no kucula, no kubuuka ku bafwa mu bushiku ubwalenga shitatu; kabili ukuti ukulapila no kulekelelwe membu kukabililwe mwi shina lyakwe ku nko shonse, ukutendeka mu Yerusalemu. Awe imwe muli nte sha fintu ifi.”

Pa mulandu umo Toma talipo pali uku kukumana kwakatama ukwa pa Mulungu icungulo bushiku. E co mu kati ka nshiku shakonkapo, bambi mu buseko bamweba ukuti: “Natumona Shikulu.”

“Nshatetekele, kano namona mu ndupi shakwe ifibala fya nsunga,” e fyo Toma akaana, “no kubike minwe yandi mu fibala fya nsunga, no kubike minwe yandi mu lubafu lwakwe.”

Cisuma, inshiku cinekonsekonse pa numa abasambi na kabili balekumana mu kati. Iyi nshita Toma ali pamo na bene. Nangu cingati ifiibi nafikomwa, Yesu na kabili aiminina mu kati kabo no kusoso kuti: “Umutende ube na imwe!” Lyene, ukwalukila kuli Toma, alaalika ukuti: “Leta kuno umunwe obe, umone ne ndupi shandi; ne minwe yobe leta kuno, ubike na mu lubafu lwandi; kabili wiba uushitetekela, lelo ube uutetekela.”

“Mwe Shikulu wandi, [kabili, NW] Lesa wandi!” e fyo Toma apunda.

“Ico wamona ine, e co watetekela? e fyo Yesu aipusha. “[Ba nsansa, NW] abatetekela, nelyo tabamona.” Luka 24:11, 13-48; Yohane 20:19-29.

◆ Kwipushisha nshi kuntu umweni acita ku basambi babili pa lwendo ukuya ku Emao?

◆ Cinshi umweni asosa icalenga imitima ya basambi ukubilima mu kati kabo?

◆ Ni shani fintu abasambi bailuka ukuti umweni ali Yesu?

◆ Lintu Kleopa no munankwe babwelela ku Yerusalemu, ni lipoti nshi iya kucincimusha baumfwa?

◆ Kumoneka nshi ukwalenga busano Yesu acita ku basambi bakwe, kabili cinshi cacitika mu kati ka kwene?

◆ Cinshi cacitika inshiku cinekonsekonse pa numa ya kumoneka kwalenga busano ukwa kwa Yesu, kabili ni shani fintu Toma mu kupelako ashininwa ukuti Yesu ali uwa mweo?