Mwaiseni ku Mabungano ya Citungu aya “Bakatemwa ba Buntungwa”!
UBUNTUNGWA! We kumfwika kwawama kuntu ilyo ishiwi lyakwata! Takwaba nangu umo uuipakisha ukuba mu busha nelyo muli bunkole. Imyaka ya nomba yalimona ukusela kwakulilako ukulola ku buntungwa bwasubilwa ubwa bupolitiki ukucila iili yonse imbi iingebukishiwa.
Nangu cibe ifyo, ukufwaikwa nga fintu ubuntungwa bwa bupolitiki bwaba, kuliko ubuntungwa ubo ubuli ubwacilapo ukucindama no kufwaikwa. Buli buntungwa ubo Yesu Kristu, Umwana wa kwa Lesa, alandilepo lintu asosele ku basambi bakwe ukuti: “Nga imwe mwaikalilila mu cebo candi, muli basambi bandi cine cine; kabili mukeshibe cine, ne cine cikamulenga abantungwa.” (Yohane 8:31, 32) Ubu buli buntungwa ukufuma ku fisumino fya butotelo bwa bufi, ubuntungwa ukufuma ku kutiina umuntu, ubuntungwa ukufuma ku busha bwa kukunkuma ku lubembu, na fimbi ifingi.
Cili ni ubu buntungwa e buli umutwe wa Mabungano ya Citungu aya “Bakatemwa ba Buntungwa” ayali no kucitwa ne Nte sha kwa Yehova ukupulinkane calo conse ukutendeka mu lusuba lwa 1991. Ukutula mu mwaka wa 1919, uwaishibishiwe no kufumishiwapo kwa fibindo fya kamfulumende pali abo abaletungulula pa kati kabo, abantu ba kwa Lesa baliipakisha ubuntungwa bwaingilishako ukulosha ku kupepa kwabo ukwasanguluka.
Cili icacilapo kulingisha ukuti umutwe wa lyashi uwa buntungwa walyebekeshiwa ukucila pa myaka pa mabungano ya teokratiki, ku mitwe ya musango uyo pamo nga “Ukulongana kwa Teokratiki ukwa ‘Uluko Lwalubulwa’” na “Ukulongana kwa Citungu ukwa ‘Abana ba kwa Lesa aba Kulubuka.’” Ubuntungwa na kabili bwalilanshanishiwapo apakalamba mu mpapulo sha musango uyo pamo nga “The Truth Shall Make You Free” na Ubumi bwa Muyayaya—Mu Buntungwa bwa Bana ba kwa Lesa.
Ubuntungwa bwapeelwa na Lesa ubo ababomfi ba kwa Yehova bakwata te bwa ku busuma bwabo fye no kuipakisha. Pamo nga fintu tubelenga pa Abena Galatia 5:13 ukuti: “Pantu imwe, mwe ba bwananyina, mwaitilwe ku kubo buntungwa; ici fye, ubuntungwa bwenu mwisangula apa kwingililo buntunse, lelo mu kutemwa e mo mubelane abasha.” Ibungano lya Citungu ilya “Bakatemwa ba Buntungwa” likatwaafwa ukutesekesha imifwaile ya buntungwa bwesu, ukutwafwilisha ukwikatilila ku buntungwa bwesu ubwaumo mutengo, no kutulanga ifya kububomfya mu kuwamisha.
Ibungano likatendeka pali Cisano ulucelo pa 10:20 mu kuba na programu wa nyimbo uyo akatubika mu mibele ya muntontonkanya iyalinga ku ca kulya ca ku mupashi icili no kukonkapo. Umutwe wa bushiku bwa kubalilapo wa kuti “Ukwishiba Icine Icitulenga Abantungwa,” ukushimpwa pali Yohane 8:32. Inshita ya lucelo ikakwata ukulandapo kwa kwa ceyamani ukwa kusengela ne ilyashi likalamba, “Imifwaile no Kubomfya kwa Buntungwa Bwesu Ubwapeelwa na Lesa.” Ili lyashi likebekesha ubupusano pa kati ka buntungwa bwa kwa Yehova ubwakumanina no buntungwa bwaampanako ubo Lesa atupeela. Likatukoselesha na kabili ukucita ukubomfya kwawamisha ukwingacitikako ukwa buntungwa twakwata. Programu ya cungulo kasuba ikabomba ne mbali shalekanalekana isha buntungwa bwesu no butumikishi bwesu kabili ikasondwelela ne cilangililo, Abalubulwa ku Kusumbula Ukupepa kwa Cine.
Umutwe pa bushiku bwalenga bubili wa kuti “Ukwiminina Abashangila mu Buntungwa Bwesu Ubwapeelwa na Lesa,” ukushimpwa pali Abena Galatia 5:1. Programu wa lucelo akakwata ukukonkana kwa malyashi ukulanga fintu ifilundwa fya lupwa cimo cimo bengaipakisha ubuntungwa bwapeelwa na Lesa mu kati na nkati aka cinshingwa-ŋanda ca lupwa. Abo abali abaipekanya ku kubatishiwa ukucilisha bakatesekesha ukulandapo ukulosha ku fintu ubuntungwa bunonkwa ukupitila ku kuipeela no lubatisho. Icisanshiwe muli programu ya cungulo kasuba cili kulanshanya kwa kucincimusha ukwa nampo nga icupo e lufungulo ku nsansa nelyo iyo. Kukabako na kabili ukukonkana kwa malyashi pa mbali shapusanapusana isha buntungwa kabili lyene ilyashi lya kusondwelela ilisanikila pali Kelengenya Mukalamba uwa kwa Lesa ku kupayanya ubuntungwa no bumi bwa muyayaya.
Ubushiku bwa pa Mulungu bukwete umutwe wa kuti “Ukubomfya Ubuntungwa Bwesu mu Kumfwana no Mupashi wa kwa Lesa,” ukushimpwa pali 2 Abena Korinti 3:17. Programu akakwata ukukonkana kwa malyashi ayacilishapo ukucincimusha pa mulumbe wa kwa Yesu uwalembwa pali Mateo 13:47-50, ukusokolola fintu Inte sha kwa Yehova babomba pamo nga balondo ba bantu. Ilyashi lya Baibolo mu cungulo kasuba lileti “Ukwawila Icalo Cipya ica kwa Lesa ica Buntungwa!” Likakonkwapo no lubali lupya ulwe bungano lya cintungu: ukusupawila kwe sambililo lya Ulupungu lwa kwa Kalinda ulya uyo mulungu. Kabili programu ikesalila no kukonkomesha kwa mu Malembo kuli ifwe bonse ukutwalilila ukulalunduluka mu kubomfya bwino ubuntungwa bwesu ubwapeelwa na Lesa mu myendele yesu na mu kucitila kwesu ubunte.
Kuli bonse bakatemwa ba buntungwa, tulesosa mu mashiwi ya kwa kemba wa malumbo Davidi ukuti “Sondeni no kumono kuti aliwama Yehova.” (Ilumbo 34:8) Citeni icili conse ukufika pantu mwingapesha mu kubombesha kwenu ukusangwa kuli ili ibungano. Cipangeni ubuyo bwenu ukusangwapo ukufuma pa nshita ya kukumana kwa kwiswila pali Cisano ulucelo ukufikila ilyashi lya kwisalila pa Mulungu icungulo kasuba. Nga ca kuti mwaisa ne nsala ya cine iya ku mupashi, abaibukila mu kukumanina ulwa kukabila kwenu ukwa ku mupashi, mukaba aba nsansa mu cine cine! (Mateo 5:3) Kabili twiesha ukusuulako icishinte ca kuti, “Uutanda alefusha, akaseepe fyafula.” Ici na kabili cibomba ku fintu tupekanya mu kusakamanisha mu kubangilila ku kusangwako, ifyo mu mukoosha tukutika kuli programu ilyo ilepeelwa, na fintu mu kucincimuka tubomba pa mashuko ayali yonse aya mulimo wa kuitemenwa ayaisuka kuli ifwe mu kulundana ne Bungano lyesu ilya Citungu ilya “Bakatemwa ba Buntungwa.”—2 Abena Korinti 9:6.