Ukulongana na bakatemwa ba Buntungwa Bwapeelwa na Lesa

INTE SHA KWA YEHOVA shaliba ishaibela mu nshila ishingi nga nshi. Ni beka fye e balanda “ululimi lwine lwine.” (Sefania 3:9) E beka fye baba abaikatana, abakwata icishibilo camonekesha ica kutemwa icalondololwa na Yesu Kristu. (Yohane 13:35) Kabili ni beka fye e baipakisha ubuntungwa ubo Yesu Kristu atile icine cali no kubuletako, nga fintu calembwa pali Yohane 8:32 ukuti: “Mukeshibe cine, ne cine cikamulenga abantungwa.”

Ayo mashiwi yantu Yesu Kristu, Umwana wa kwa Lesa, alungatike ku basambi bakwe, yalishininkisha ukuba aya cine. Kabili yalatesekeshiwa nomba ukucila na kale lyonse ku Nte sha kwa Yehova bonse abo basangilwe ku Mabungano ya Citungu aya “Bakatemwa ba Buntungwa.” Programu ye bungano yabalenga ukumfwikisha imbali shalekanalekana isha buntungwa bwabo, fintu bali no kububomfya, ukulubulula ukwendela pamo no buntungwa bwabo, kabili fintu baba abapaalwa ukuba abantu balubuka.

Aya mabungano yalingana ne nshita kabili aya kufumamo cimo yatendekele mu Ciputulwa ca Calo ica Kapinda ka ku Kuso pa June 7, 1991, mu Los Angeles, California, U.S.A. Programu yaiswilwe pa 10:20 a.m. mu kuba no kwimba kwa nyimbo, ukukonkwapo no lwimbo ne pepo. Ilyashi lya kwiswila lyali lya kukumbamo ukushimpwa pali Yakobo 1:25. Ukulingana na The Jerusalem Bible, ici cikomo cibelengwa ukuti: “Umuntu uulolesha mu kushikimana pa malango yapwililika aya buntungwa no kupanga ico nge cibelesho cakwe—te kukutika kabili lyene ukulaba, lelo mu kucincila ukucibika mu kubomba—akaba uwa nsansa muli fyonse ifyo acita.” Nga fintu fye tulolesha mu cilola ukumona apo tulekabila ukucita ukuwamyako mu mimonekele yesu, e fyo tulekabila ukutwalilila ukulolesha mu malango yapwililika aya kwa Lesa aya buntungwa ukwishiba apo tulekabila ukucita ukwaluka mu buntu bwesu. Kabili tulingile ukutwalilila ukulolesha muli ico cilola.

Mu kukonkapo kwaishile ilyashi lya kwa ceyamani, “Mwaiseni, Imwe Bonse Bakatemwa ba Buntungwa.” Inte sha kwa Yehova balitemwa ubuntungwa, kabili bafwaya ukwikala abalubuka. Kalanda ayambwile amabulashi ya mwi funde ayalangile ukuti te kuti kubeko ubuntungwa ukwabula ifunde. Ee, Abena Kristu tabalubuka ukucita ukulingana ne fyo batemwa lelo baliba abalubuka ukucita ukufwaya kwa kwa Yehova. Bafwaya ukucita ukubomfya kwakumanina ukwa buntungwa bwabo lelo te kububomfya bubi bubi. Ukucilisha ukutula 1919 Inte sha kwa Yehova baliipakisha ubuntungwa bwaingilishiwako. Kalanda akomaile pa buntungwa mu mitwe ye bungano ne mpapulo sha Bwina Kristu. Abakubungana bonse kuti basambilila ifyalundwako pa lwa buntungwa bwapeelwa ba Lesa ne fya kububomfya.

Uko kulandapo kwalingana ne nshita kwakonkelwepo no kwipusha ukwa bakatemwa ba buntungwa abasekelele ukuba palya pe bungano. Amabungano ya musango uyo yaba ni nshita sha kusekelela, nga fintu fye imitebeto itatu iya cila mwaka iya bena Israele yaishibikilwe ku buseko bukalamba. Ukwipusha kwafulilako kwashininkishe ukuti amabungano yaba ni nshita sha kusekelela isha kukuulilila kwa ku mupashi.

Lyene kwaishile ilyashi likalamba, “Imifwaile no Kubomfiwa kwa Buntungwa Bwesu Ubwapeelwa na Lesa.” Ukufuma kuli ili lyashi abakubungana baishibe ukuti Yehova e ka ewakwata ubuntungwa bwakumanina pantu aba Ubulashi Bwacilamo kabili wa maka yonse. Pa mulandu we shina lyakwe na ku kumwenamo kwa fibumbwa fyakwe, nangu cibe fyo, inshita shimo alapeleesha ubuntungwa bwakwe pa kuba uukokola ukukalipa no kubelesha ukuilama. Ifibumbwa fyakwe fyonse ifya mucetekanya fyakwata ubuntungwa bwayampanako, pa kuti bailamfisha kuli Yehova kabili balipeleela ku mafunde yakwe aya ku mubili na ya mibele isuma. Yehova alibapeela ubuntungwa ku kuipakisha kwabo lelo ukucilisha pa kuti pambi bengamuletela umucinshi no buseko pa kumupepa. Pa mulandu wa kubomfya bwino ubuntungwa bwabo, Inte sha kwa Yehova shalinonka ukushimikwa kusuma ukwa mu kusaalala kwa calo ku myendele isuma no kupimpa mu butumikishi bwabo.

Pali Cisano Icungulo

“Abapamfiwa—Mu Milimo Yafwa Nelyo mu Mulimo wa kwa Yehova?” wali mutwe wa lyashi uwa kubimbula umuntontonkanya uyo waiswile iciputulwa ca kulongana kwa pali Cisano icungulo. Imilimo yafwa isanshamo te iyo yeka fye iya ku mubili lelo na kabili imbi iyafwa lwa ku mupashi, iya fye, kabili iishitwala ifisabo—pamo nga amapange ya kukwata indalama. Muli uku kuloshako, ukuiceeceeta kwa bufumacumi kuli ukwakabilwa pa kupima nga ca kuti tulebika Ubufumu intanshi mu bumi.

Ilyakwete ubuyo bumo bwine lyali lyashi lyakonkelepo, “Ukufikilisha Ukutumwa Kwesu nga Batumikishi ba kwa Lesa.” Kalanda alangile ukuti Abena Kristu tabalingile ukuikusha fye no mulimo wa kabepekesho nelyo ukukumanisha fye ifipimo fya maawala. Balingile ukufwaya ukuba aba kufumamo cimo mu mbali shonse isha butumikishi bwabo ubwa Bwina Kristu. Ifi fishinka fyalilengelwe ukumfwika ukupitila mu cilangililo no kwipusha. Bonse balikonkomeshiwe ukufikilisha ubutumikishi bwabo ukufika ku cipimo cakumanina icingacitikako.

Mu lyashi “Abantu Balubuka Lelo Abali no Kulubulula,” kalanda aebekeshe ukuti nangu cingati abantu ba kwa Yehova balateesa ubuntungwa ubo icine cabaletela, bafwile ukwibukisha ukuti bwendela pamo no kulubulula. Balingile ukubomfya ubuntungwa bwabo, te kuba nga ubwelelo bwa myendele yabipa, lelo kwi lumbo lya kwa Yehova. Pamo nga Abena Kristu, bakalubulula ku “mabulashi yacilamo” kabili balingile na kabili ukubombela pamo na baeluda ba cilonganino. (Abena Roma 13:1, NW) Mu kulundapo, bakalubulula ku mifwalile yabo, imisakwile, ne myendele. Tabalingile ukulaba ukuti “ifwe bonse umo umo tukalubulula kuli Lesa.”—Abena Roma 14:12; 1 Petro 2:16.

Lyene pakonkele ukulanshanya kwa kukabila kwa Bena Kristu bonse ukuba “Ababulwa Umwenso Ilyo Impela ya ici Calo Ilepalamina.” Ilintu umutundu wa muntu uli uwa mwenso pa lwa cintu inshita ya ku ntanshi pambi ingaleta, Abena Kristu balekabila ukuba ababulwa umwenso ukubomba ubutumikishi bwabo. Ukubulwa umwenso kwaba nga ica kufumamo ca kucetekela muli Yehova, pantu ukukulilako Umwina Kristu aba no mwenso wa kufulwisha Lesa, e kucepelako akaba no mwenso wa fibumbwa. Ukwibukisha amalembo ya kusansamusha kuti kwakosha umuntu ukuba uwabulwa umwenso. Pa kuba abakosa lwa ku mupashi kabili ababulwa umwenso, ababomfi ba kwa Lesa nabo bene bakabila ukucita ukubomfya kusuma ukwa mashuko ya mu nshita aya kubishanya na basumina banabo. Umo umo na kabili alekabila ukwibukisha ulubali ulo ipepo libomba mu kuba ababulwa umwenso. Pa kutwalilila ukuba ababulwa umwenso, Abena Kristu basungilila ukwampana kusuma na Yehova Lesa.

Programu ya bushiku bwa kubalilapo yasondwelele ne cilangililo cabamo kufunda icikalamba Abalubulwa ku Kusumbula Ukupepa kwa Cine. Calangilile fintu ulupwa lwa muno nshiku lwasambilile isambililo ukufuma kuli Esra ne bumba lyakwe ilya 7,000, abaipeele ilambo ukubwelela ku Yerusalemu. Calengele umo umo uwa kubungana ukubebeta ifise ntanshi fyakwe no kumona fintu engengilishako amashuko yakwe aya mulimo. Ici cilangililo calikwete icintu cimo icapalana ku bakalamba na banono.

Pa Cibelushi Ulucelo

Pa numa ya programu ya nyimbo, ulwimbo, ipepo, no kulanshanya kwe lembo lya Baibolo ilya cila bushiku, programu ya lucelo iya pa Cibelushi yapeele ukukonkana ukwa mutwe wa kuti “Ubuntungwa mu Kuba ne Cishingamo mu Cinshingwa-Ŋanda ca Lupwa.” Mu lubali lwa kubalilapo, “Ifyo Bashibo Bengapashanya Yehova,” bashibo balifundilwe mu nshila shalekanalekana umo bengapashanya Shibo wa mu mulu. Timote wa Kubalilapo 5:8 afwaya ukuti bapayanye te lwa ku mubili fye lelo na lwa ku mupashi. Bapashanya Yehova pa kuba bakasambilisha basuma aba lupwa lwabo na pa kupeela ukusalapula kwabamo kutemwa ilyo kulekabilwa. Ifi fishinka fyalilangililwe ku kwipusha kwafulilako.

“Ulubali lwa Kwafwilisha Ulwa Mukashi” lwali e lubali lwakonkelepo ulwa uku kukonkana. Lwatendeke no kwebekesha ukuti umukashi alikwata icifulo ca mucinshi mu lupwa lwa Bwina Kristu, ica kuba uwa kwafwilisha. Cinshi cintu ici cifwaya kuli ena? Ukuti abe mu kunakila kwalinga, ukukanabala atitikisha umulume wakwe ukucita icintu cimo ico alefwaya fye. Alekabila ukusakamana bwino ifishingamo fyakwe ku mulume wakwe na bana, kabili kuti akwata ukwikushiwa kutuntulu ukufuma ku kusunga iŋanda yakwe iya busaka kabili iyapempenkana. Kabili nga umutumikishi wa Bwina Kristu, kuti pambi akwata amashuko ya mu nshita ayengi ukuibimba mu mulimo wa mwi bala. Ukwipusha kwa lupwa kwaebekeshe amano ya kufunda kwa mu Malembo ukwa musango uyo.

Abacaice bapokelele ukusakamana mu lubali “Abana Abakutika no Kusambilila.” Pa kukansha abana babo ukukutika no kusambilila, abafyashi baleta umucinshi kuli Yehova no kulanga ukutemwa kuli bamunyinabo ba ku mupashi na ku bana babo. Icikakilo cakosa cikabako pa kati ka bafyashi na bana nga ca kuti bapoosa inshita ikalamba capamo. Abafyashi balingile ukuba abaipangasha ukwasuka ifipusho fya bana no kucincimusha icilaka cabo ica kwishiba. Na kabili, ukwipusha kwalangilile fintu ici cingacitwa.

Mu kukonkapo kwaishile ukufunda kushaiwamina “Isunge we Mwine Uwalubuka ku Kubombela Yehova.” Ni shani fintu ici cicitwa? Pa kuisunga uwalubuka ukufuma ku kukonkelela incito sha ku calo, ifya kuleseshamo icitendwe ifisende nshita, na mabuyo ya kutemwe fimoneka. Yesu no mutumwa Paulo baimike ica kumwenako cishaiwamina pa kuba aba kuipeela bulilambo. Abantu ba kwa Yehova bakabila ukusunga ilinso ilyayanguka, ilyatontwa pa mabuseko ya Bufumu. Lintu caisa ku kukwata ifikwatwa fya ku mubili, caliba ica mano ukusunga indalama nomba no kushita pa numa ukucila ukushita nomba no kulipila pa numa. Imisepela ilingile ukupempwila ku kwelenganya pa lwa musamwe wa kwampana kwa bwamba ne ncito sha ku calo. Ukwipusha painiya umushimbe kwalangilile amapaalo ayo yesa lintu umo aisunga uwalubuka ku kubombela Yehova.

Programu ya lucelo pa Cibelushi yasondwelele ne lyashi “Ingileni mu Buntungwa pa Kuipeela no Lubatisho.” Abaleya ku lubatisho balicinkwilweko ukuti ilintu ububumbo bwatumpikwe mu busha kuli bucipondoka bwa kwa Adamu, Kalubula wa maka, Yesu Kristu, aliswile inshila ukuya ku buntungwa ukupitila mwi lambo lyakwe. Kalanda alangilile icabimbilwemo mu kupaatukako ku kucita ukufwaya kwa kwa Lesa kabili aebekeshe ukukakililwako na mapaalo ayakaba ayafulisha kuli abo bonse ababatishiwa.

Pa Cibelushi Icungulo

Programu ya cungulo pa Cibelushi yatendeke ne cipusho ca kusapika umuntontonkanya “Busuma bwa kwa Ani Ulefwaya?” Icalo cibelebesha umupashi wa kwa Ciwa uwa bukaitemwe. Nangu cibe fyo, Abena Kristu bali no kupashanya umupashi wa kuipeela bulilambo uwa kwa Yesu Kristu. Mwandi ca kumwenako ico aimike! Ashile ubukata bwa mu mulu kabili lyene ukupeela ilambo ubumi bwakwe ubwa buntunse ku kumwenamo kwesu. Ukusonsomba ukulosha ku busuma bwa kwa ani tuletwaya kulasokoloka lintu kwabako ukukanaumfwana pa kati ka Bena Kristu mu milandu ya bukwebo nelyo iya mu fya ndalama, lintu kwabako ukupunkana kwa buntu, na fimbipo. Ifintu fya musango uyo fileesha ukutemwa kwa Bwina Kristu. Lelo pa kufwaya ubusuma bwa bambi, umuntu aba uwashininkisha ukumwensekesha ipaalo lyakulilako ilya kupeela, kabili akanonka ukusuminisha kwa kwa Yehova.

Lyene pakonkele umutwe wayampanako mu kupalamisha, “Ukwishiba no Kucimfya Ubunake bwa ku Mupashi.” Ili lyashi lyakomaile pa kwishiba ifishibilo fya bunake bwa ku mupashi kabili lyene ukubomba mu mupampamina mu kulwisha kwa kucimfya Satana ne fiteyo fyakwe. Ababomfi ba kwa Yehova bafwile ukukusha ukutemwa kwashika ukwa kuli wene no lupato ku cabipa. Ici cifwaya ukuti baishiba Yehova ukupitila mwi sambililo lya Baibolo ilya lyonse, ilya pa lwabo ilyabamo imifwaile ne lya lupwa. Bafwile ukusengauka imisango yonse iya kusekesha iyo isumbula ulukaakala na bucisenene bwa bwamba. (Abena Efese 5:3-5) Ipepo lya lyonse no kusangwa ku kulongana na fyo fine fyaliba ifyacindama mu kutunguluka kwa kucimfya amabunake ya ku mupashi.

Nakalimo ilyaluminishe kulanshanya kwakulilako ukucila ilyashi lyonse limbi ilyapeelwe pe bungano ni ilyo lyakwete umutwe wa kuti “Bushe Icupo E Lufungulo ku Nsansa?” Abacaice abafulisha nga nshi e fintu batontonkanya! Lelo kalanda acilengele ukumfwika ukuti kwalibako iminshipendwa ya fibumbwa fya mupashi aba cishinka ababa aba nsansa nangu cingati tabaupa, kwati fye ni fintu Abena Kristu abengi abaipeela baliba aba nsansa nga nshi nangu cingati tabalundanishiwa mu cupo. Mu kulundapo, abaupana abengi tababa aba nsansa, nga fintu calangililwa ne cipimo ca kulekana icasumbuka. Umo alekabila fye ukubelebesha pa mapaalo ayengi ayo Abena Kristu bonse abaipeela baipakisha pa kumwensekesha ukuti icupo, nangu cingati kuti caba ipaalo, tacaba e lufungulo ku nsansa.

Ici cakonkelwepo no kukonkana “Ubuntungwa bwa Bwina Kristu mu Kasuba Kesu.” Kalanda wa kubalilapo alandile pa “Ukupimununa Imbali sha Buntungwa Bwesu Ubwa Bwina Kristu.” Ici cisanshamo ubuntungwa ukufuma ku fisambilisho fya butotelo pamo nga Bulesa Butatu, bumunshifwa bwa mweo wa buntunse, no kulunguluka kwa muyayaya. Lyene kwalibako ubuntungwa ukufuma ku busha bwa kucucutika ku lubembu. Nangu cingati Abena Kristu baba abashapwililika, baliba abalubukako ukufuma ku fibelesho pamo nga ukupeepa, ukuteye njuka, ukukolwa, na bucitobo bwa kwampana kwa bwamba. Kwalibako na kabili ubuntungwa ukufuma ku kubulwa isubilo, pa kuti balikwata isubilo lya Paradise ilyo ilibakunta ukwebako bambi pa lwa yene.

Kalanda wakonkelepo aipwishe icipusho ca kuti “Bushe pa Lobe Ulateesa Ubuntungwa bwa Musango Uyo?” Ukuteesa cipilibula ukutemwisha, ukulela mu kuba no kusakamana. Pa kucita ifyo, umubomfi wa kwa Lesa afwile ukuibaka ku kutunkwa kwa kuya bushilya bwa mipaka ya buntungwa bwa Bwina Kristu. Ubuntungwa bwa calo bwaba bufi bwa kufutika, pantu bufumamo ubusha ku lubembu no kubola.

Kalanda wa kupelako muli uku kukonkana alandile pa mutwe wa kuti “Abatemwa Ubuntungwa Beminina Abashangila.” Pa kucita ifyo, Abena Kristu bafwile ukulambatila mu kupalamisha ku bafyashi babo aba mu mulu, Yehova no kuteyanya kwakwe ukwapala umukashi. Abantu ba kwa Yehova te kuti baisuminishe abene ukupumbulwa ku kukubanya kwa busangu; bafwile ukukaana abo abesa ne mitubululo ya bucisenene. Pa kwiminina abashangila mu buntungwa bwa bukapepa, Abena Kristu bafwile ‘ukwenda mu mupashi.’—Abena Galatia 5:25.

Ilyashi lya kupelako ilya kasuba lyali ni ntulo ya kucankwa. Lyali no mutwe wa kuti “Umuntu Wakulisha Uwabalile Abako Uwa Mweo.” Yesu Kristu aali umuntu wakulisha, pantu ayambukile ubumi bwa mutundu wa buntunse apakalamba ukucila imilalo yonse, ifita fya pali bemba, amayanda ya mafunde, ne shamfumu ukubikwa pamo. Aali Mwana wa kwa Lesa, uwaliko mu mulu pa ntanshi ya kwisa kwi sonde. Yesu apashenye Wishi wa mu mulu bwino muli ico alandile no kusambilisha na fintu aikele ica kuti aali na maka ya kusosa ukuti: “Uwamona ine, amona na Tata.” (Yohane 14:9) Fintu Yesu alangishe bwino ukuti “Lesa kutemwa”! (1 Yohane 4:8) Pa numa ya kulanda mu kulepelako pa mibele ya kwa Yesu, kalanda alangilile ukuti ukukonkana kwa fipande “Ubumi bwa kwa Yesu no Butumikishi” fyalisabankanishiwa mu Ulupungu lwa kwa Kalinda ukutula mu April 1985. Mu kwankulako ku kwipusha ukwingi, Sosaite nomba yalekakula icitabo cipya Umuntu Wakulisha Uwabalile Abako Uwa Mweo. Cakwata ifipandwa 133 kabili capulintwa mu kubalabata kwayemba. Ifyebo mu kukonkana fyalilembululwa, kabili conse capangwa mu mabula 448 aya citabo. Ca cine, ubu bushiku bwe bungano bwapwile mu kuba no buseko bwaingilishiwako!

Pa Mulungu Ulucelo

Mu kubangilila mu ciputulwa ca kulongana ica pa Mulungu ulucelo kwaishile ukukonkana “Ukubomba nga Balondo ba Bantu.” Ilyashi “Ukwikate Sabi—Ilya Cine Cine ne lya Mampalanya” lyaimike umufula ku malyashi yakonkelepo. Kalanda alangile ukuti pa numa Yesu alengele ukwikate sabi kwa cipesha amano, alaalike abalondo babimbilwemo ukuba abalondo ba bantu. Pa nshita imo, Yesu akanshishe abasambi bakwe ukuba abalondo ba bantu, kabili ukutendeka na Pentekoste 33 C.E., bali abatunguluka mu kwaafwa cinkupiti wa baume na banakashi ukuba abasambi.

Kalanda wakonkelepo abombele no mulumbe we sumbu uwalembwa pali Mateo 13:47-50. Asonteleko ukuti isumbu lya cimpashanya lyasanshishemo bonse Abena Kristu basubwa na Kristendomu, aba kulekeleshako pa mulandu wa mulimo wacitilwe mu kupilibula, ukusabankanya, no kwananya amaBaibolo, nangu cingati uku kubombesha kwalonganike cinkupiti we sabi ilibi. Ukucilisha ukutula mu 1919 kwalibako umulimo wa kupaatukanya, mu kuba ne sabi ilibi ukupooswa, ilintu ilisuma lilonganikwa mu filonganino fyapala ifipe ifyo fyayafwilisha ukucingilila no kubakilila Abena Kristu ba cine ku mulimo wa bulesa.

Ilyashi lyalenga butatu, “Ubulondo bwa Bantu mu Menshi ya mu Cibulungwa Conse,” lyaebekeshe ukukakililwako kwa Bena Kristu bonse abaipeela ukwakana mu bulondo bwa mu kusaalala kwa calo. Nomba ukucila pali 4,000,000 baleyakana muli uyu mulimo mu fyalo ukucila pali 200, kabili mu myaka ya nomba line ukucila pali 230,000 balibatishiwa cila mwaka. Abantu ba kwa Yehova bonse balicincishiwe ukuwamyako ukulamuka kwabo ukwa bulondo, kabili “abalondo” abafulilako ukucilisha abatunguluka balipushiwe.

Mu lyashi lyakonkelepo, ilyali no mutwe wa kuti “Twalilileni Abalola mu ‘Nshita ya ku Mpela’” kalanda atantike ifya kwaafwa cinelubali ku kwaafwa abantu ba kwa Lesa ukuba abalola: ukulwisha ifipumbula, ukupepa, ukubilisha ukusoka pa lwa mpela ya ino micitile, ukukakatila ku kuteyanya kwa kwa Yehova, ukuibebeta abene, ukwetetula pa masesemo yafikilishiwa, no kusunga mu muntontonkanya ukuti ipusukilo lyabo nalipalamisha ukucila lintu batendeke ukutetekela.

Programu ya lucelo yasondwelele mu kuba no kulanshanya kwa kuti “Nani Akapusuka ‘Inshita ya Kumanama’?” Kalanda alangile fintu ubusesemo bwa kwa Yoele bwali ne cipimo ca kufikilishiwa mu nshita sha butumwa, fintu buli no kufikilisha kwalundwako nomba, kabili ukuti bukafikilishiwa mu kukumaina mu nshita ya ku ntanshi iipaleme.

Pa Mulungu Icungulo

Progamu ya cungulo yatendeke ne lyashi lya cintubwingi, “Ukwawila Icalo Cipya ica kwa Lesa ica Buntungwa!” Ili lyashi lyatwalilile umutwe we bungano uwa buntungwa. Calisontelweko ukuti Icebo ca kwa Lesa casobela icalo cipya umo mukaba ubuntungwa ukufuma ku kutitikisha ku fibombelo fya butotelo bwa bufi, ifya bupolitiki, ifya bunonshi, ne fya mushobo. Na kabili kukabako ubuntungwa ukufuma ku lubembu ne mfwa. Ubutuntulu bwa bumi bwapwililika bukabweshiwa pa kuti abantu bakaba na maka ya kwikala mu nsansa pe sonde. Muli ifyo, bakatemwa ba bulungami balikwata umulandu uuli onse uwa kwawila Kalenga wa calo cipya pa kubilisha ukuti: “Twamutootela, mwe Yehova, ku buntungwa bwa cine mu kupelako!”

Ilyashi lya cintubwingi lyakonkelwepo ne cintu cimo icipya ku mabungano ya citungu—ukulanshanya kwe sambililo lya Ulupungu lwa kwa Kalinda ilya mulungu. Lyene ibungano lyaishile ku mpela ne lyashi lya kukumbamo mu kuba no kukonkomesha kwa kuti “Bakatemwa ba Buntungwa, Twalilileni Ukulunduluka.” Kalanda mu kwipifya alandile pa fishinka fikalamba ifya mutwe we bungano uwa buntungwa. Aebekeshe fintu abantu ba kwa Yehova baba aba nsansa pa mulandu wa buntungwa bwabo, atantike inshila muli isho Abena Kristu bacita ukulunduluka, kabili abacincishe ukutwalilila ukulunduluka mu kwikatana pa kuti bengaseepa amapaalo yalundwako. Asondwelele mu kuba na mashiwi ya kuti: “Ilyo tulecite ci, shi Yehova natwalilile ukupaala ifwe bonse pa kuti twingatwalilila ukulunduluka pamo nga bakatemwa ba buntungwa.”

“Ifibumbwa fyalengelwe ukulamba ku kuicusha fye, te ku kuitemenwa iyo, lelo pa mulandu wa wafilamfishe, pa kucetekelo kwa kuti ifibumbwa na fyo fikalubulwa ku busha bwa kubola no kutwalwa mu buntungwa bwa bukata bwa bana ba kwa Lesa.”—Abena Roma 8:20, 21.

[Icikope pe bula 25]

Inkombe yacaice kwi bungano mu Prague, Czechoslovakia

[Ifikope pe bula 26]

1. Abaleya ku lubatisho baleya ku cifulo ca lubatisho mu Prague, Czechoslovakia

2. Ukupita mu lubatisho nga umo uwa Nte sha kwa Yehova mu Tallinn, Estonia

3. Impapulo shipya shaletele ubuseko ku bakubungana mu Usolye-Sibirskoye, Siberia

4. Ukukakula “New World Translation of the Holy Scriptures” mu ciCzech ne ciSlovak pe bungano mu Prague