Yehova Alomfwa Ukukuuta Kwesu Ukwe Pamfya ku Kwaafwa

UKWAAFWA kwalekabilwa mu kubamo ipamfya. Ico cali icamonekesha ukufuma ku bulanda bukalamba ubwa cinso ca kwa kasumika wa mfumu. Ukwipushiwa icalubene, kasumika alandile ukulilishika kwakwe pa mibele yapomonwa iya Yerusalemu na malinga ya iko. Lyene kwaishile icipusho ca kuti: ‘Cinshi ulefwaya ukucingilila?’ “E ico napepele kuli Lesa wa mu mulu,” e fyalembele kasumika Nehmia pa numa. Uko kwali kukuuta ukwa mu kwangufyanya, ukwa mutalalila, ukwe pamfya ku kwaafwa kwa kwa Yehova. Kabili icakufumamo? Kwena, imfumu ya ku Persia Artakishashete ukwabulo kushingashinga asuminishe Nehmia ukukuula cipya cipya amalinga ya Yerusalemu!—Nehemia 2:1-6.

Ee, Lesa alomfwa ukupaapaata kwe pamfya ukwa abo abamutemwa. (Ilumbo 65:2) E co nga ca kuti ica kwesha camoneka ukuba icacilapo bukulu ukucila fintu wingashipikisha, kuti pambi wapepa nga fintu kemba wa malumbo Davidi acitile mwi Ilumbo 70, lintu ali mu kukabila kwa mu kampampa ukwa kwaafwa kwa bulesa. Utumashiwi twa pa mulu utwa ili lumbo tulanga ukuti imifwaile yayako yaba “kwibukisha.” Mu kuba no kwaluka kunono, tubwekeshapo Ilumbo 40:13-17. Lelo ni shani fintu Ilumbo lyalenga 70 lingatwaafwa pamo nga bantu ba kwa Yehova?

Ukupaapaata ku Kulubuka Kwa Ilyo Line Fye

Davidi atendeka mu kuba no kupaapaata kwa kuti: “Mwe Lesa, iseni ku kumpokolola; mwe Yehova, endesheni ku kunjafwa.” (Ilumbo 70:1) Lintu tuli mu kumanama, kuti twapepa ukuti Lesa mu kwangufyanya atwaafwe. Yehova tatwesha ne fintu fyabipa, kabili “alishiba ifya kulubula abantu ba kuipeelesha kwa bukapepa ukufuma ku ca kwesha.” (2 Petro 2:9, NW; Yakobo 1:13) Lelo ni shani nga ca kuti asuminisha ica kwesha ukutwalilila, nakalimo ku kutusambilisha icintu cimo? Lyene kuti twaipusha wene amano ya kubomba na cene. Nga ca kuti twaipusha mu citetekelo, alatupeela amano. (Yakobo 1:5-8) Lesa na kabili alatupeela ubukose bukabilwa ku kushipikisha ifya kwesha. Ku ca kumwenako, ‘alatutungilila pa busanshi bwa kutembuka.’—Ilumbo 41:1-3; AbaHebere 10:36.

Ukubembuka kwesu ukwa cifumanda, pamo pene no kusansalikwa kwatwalilila kwi tunko no kubombesha kwa kwa Ciwa ku konaula ukwampana kwesu na Yehova, filingile ukutusesesha ku kupepela ukwaafwa kwa kwa Lesa cila bushiku. (Ilumbo 51:1-5; Abena Roma 5:12; 12:12) Icawamino kumona ni aya mashiwi ye pepo lya cilangililo ilya kwa Yesu aya kuti: “Mwitutwala mu kweshiwa, lelo mutupokolole ku [mubifi].” (Mateo 6:13) Ee, kuti twaipusha Lesa ukuti tatusuminishe ukunakilako lintu twatunkwa ku kukanamumfwila no kuti acilikile Satana, ‘umubifi,’ ukufuma ku kutushukila. Lelo natubike pamo ukukuuta kwesu ku kulubuka ne ntampulo sha kusengauka imibele iyo ikatusansalika mu kukanakabilwa kwi tunko ne fiteyo fya kwa Satana.—2 Abena Korinti 2:11.

Abo Balesoso kuti, “Eya!”

Kuti twaeshiwa apakalamba pantu abalwani balatusaalula pa mulandu wa citetekelo cintu tubelesha. Nga ca kuti ico cacitika kuli iwe, belebesha pa mashiwi ya kwa Davidi aya kuti: “Lekeni balengwe insoni no kufwilama abafwayo mweo wandi; balengwe ukufutatukila ku numa, no kusaalulwa, ababekelwo bubi ubwamponena. Lekeni bafutatwilwe ku numa pa mulandu wa nsoni shabo abatila, Eya, eya!” (Ilumbo 70:2, 3) Abalwani ba kwa Davidi bafwaile ukumona wene nafwa; ‘balefwaya umweo wakwe,’ nelyo ubumi. Mu cifulo ca kwesha ukulandula, nangu cibe fyo, abeleshe icitetekelo ukuti Lesa aali no kubalenge nsoni. Davidi apepele ukuti abalwani bakwe “balengwe insoni no kufwilama”—baseebane, bapapushiwe, basakamikwe, bafulunganishiwe mu kwesha ukupwishishisha amapange yabo ayabipa. Ee, lekeni abo abalefwaya ukucenwa kwakwe no kubekelwa mu kayofi kakwe babe abapelenganishiwa no kukumanya ukucendwa.

Nga ca kuti twakwete ico pambi icingetwa ubuseko bwa kucenwa lintu akayofi kaponena umulwani wesu, kuti twalubulula kuli Yehova pa lubembu lwesu. (Amapinda 17:5; 24:17, 18) Nangu cibe fyo, lintu abalwani basaalula Lesa na bantu bakwe, kuti twapepa ukuti pa mulandu we shina lyakwe ilya mushilo, Yehova ‘abalenge ukufutatwilwa ku numa no kucula ukucendwa’ mu menso ya bantu abo bafwayako ubukata. (Ilumbo 106:8) Icilandushi ca kwa Lesa, kabili kuti apelenganya no kucenda abalwani bakwe na besu. (Amalango 32:35) Ku ca kumwenako, intungulushi ya ciNazi Adolf Hitler afwaile ukulofya Inte sha kwa Yehova mu Germany. Fintu mu kubipilwa afililwe, pantu amakana ayengi aya bene nomba balashimikila ubukombe bwa Bufumu kulya!

Mu kupumfya kwa musaalula, abalwani besu pambi kuti basoso kuti: “Eya, eya!” Apantu baseebanya Lesa na bantu bakwe, lekeni abo babembu “bafutatwilwe ku numa pa mulandu wa nsoni shabo,” ukucula umusebanya. Ilintu tulepepela ici, natusungilile bumpofu bwesu no kulenga umutima wa kwa Yehova ukusamwa, pa kuti engasuka kuli Satana no uli onse umbi ulesebanya Wene. (Amapinda 27:11) Kabili tatulingile napacepa ukutiina abalwani besu aba miiya, pantu “uutetekela Yehova akaba umwatalala.” (Amapinda 29:25) Imfumu ya cina Babiloni iya cilumba Nebukadnesari, uwasendele abantu ba kwa Lesa bunkole, akumenye umusebanya kabili aali no kusumina ukuti ‘Imfumu ya mu mulu ili na maka ya kucenda abenda mu cilumba.’—Daniele 4:37.

“Alumbwe Lesa”

Nangu cingati abalwani besu kuti batulengela ubwafya, lekeni lyonse tulumbanye Yehova capamo na bakapepa banensu. Mu cifulo ca kuisuminisha umwine ukuminwa no kumanama ica kuti afililwe ukulumba Lesa, Davidi asosele ukuti: “Lekeni basekelele no kusamwa muli imwe bonse abamufwaya; kabili abatemwo kupususha kwenu batile pe, Alumbwe Lesa.” (Ilumbo 70:4) Abantu ba kwa Yehova batwalilila ukuba aba buseko nga nshi pa mulandu wa kuti ‘balasekelela no kusamwa’ muli wene. Pamo nge Nte shakwe ishaipeela, ishabatishiwa, balikwata ubuseko bukalamba ubufuma kuli bucibusa bwabamo isenge na wene. (Ilumbo 25:14) Nalyo line, kuti pambi bamonwa nga bakafwaya baicefya aba kwa Lesa. Pa kuba abasumina abasunga amafunde ya kwa Lesa, mu kutwalilila bafwaya ukwishiba kwalundwako ukwa wene ne Cebo cakwe.—Lukala Milandu 3:11; 12:13, 14; Esaya 54:13.

Ilyo Inte sha kwa Yehova bashimikila imbila nsuma, kwena batwalilila ukusosa ukuti: “Alumbwe Lesa.” Balalumbanya Yehova, ukumupeelo mucinshi wasumbukisha. Mu buseko, balafwilisha bakafwaya ba cine ukusambilila pa lwa kwa Lesa kabili no kumukatamika. Ukukanapala abatemwa ukwangala aba ku calo, abantu ba kwa Yehova ‘batemwa ukupususha kwakwe.’ (2 Timote 3:1-5) Ukuba abaibukila ulwa kubembuka kwabo ukwa cifumanda, baliba aba kutasha apakalamba ku kupayanya kwabamo ukutemwa ukwa kwa Yehova Lesa ku kupususha ku bumi bwa ciyayaya, ukwalengwa ukucitikako ukupitila mwi lambo lya kukonsolwela ilya Mwana wakwe uwatemwikwa, Yesu Kristu. (Yohane 3:16; Abena Roma 5:8; 1 Yohane 2:1, 2) Bushe ulelumba Lesa no kulangilila ukuti ‘walitemwa ukupususha kwakwe’ pa kubelesha ukupepa kwa cine kwi lumbo lyakwe?—Yohane 4:23, 24.

Cetekeleni uwa Kupokolola

Lintu Davidi ailumbulwile umwine muli ili lumbo, aumfwile ukukabila kwapelelwa nga nshi ica kuti asosele ukuti: “Lelo ine ndi mulanda, kabili uwabulwa; mwe Lesa, endesheni ukwisa kuli ine. Uwa kunjafwa kabili uwa kumpokolola ni mwe; mwe Yehova, mwishimba.” (Ilumbo 70:5) Ukucushiwa ne fya kwesha ifyo ficululusha—ubucushi bwa musango uyo pamo nga ukupakaswa, amatunko, no kusansa kuli Satana—kuti pambi twamoneka ‘abalanda.’ Nangu cingati te kuti pambi tube abapelelwa, tumoneka ababulwa ukucingililwa ku balwani babula ukupelulula. Nangu cibe ifyo, kuti twaba abacetekela ukuti Yehova kuti kabili akapususha ababomfi bakwe aba busumino.—Ilumbo 9:17-20.

Yehova aba ‘uwa Kupokolola’ lintu twakabila kwene. Ukupelebela kwesu kwine kuti pambi kwatuleta mu mibele ya kwesha. Lelo nga ca kuti ‘ubupumbu bwesu nabulufyanye milimo yesu,’ lekeni umutima wesu ‘wibubukila Yehova.’ (Amapinda 19:3) Tali e wa kupeelo mulandu, kabili aliba uwaipekanya ukwaafwa ifwe nga ca kuti twapepa kuli wene mu citetekelo. (Ilumbo 37:5) Ni shani nga ca kuti tuleshomboka ukusengauka ulubembu? Lyene natube aba kulungatika pa lwa ici mwi pepo, ukulomba ukwaafwa kwa bulesa ku kutwalilila ukusupila inshila yalungama. (Mateo 5:6; Abena Roma 7:21-25) Lesa akasuka amapepo yesu aya kufuma ku mutima, kabili tukaba no lubanda lwa ku mupashi nga ca kuti twanakila ku butungulushi bwa mupashi wakwe uwa mushilo.—Ilumbo 51:17; Abena Efese 4:30.

Lintu tuli mu kushikitika ukwa bwesho bwa citetekelo, kuti pambi twayumfwa ifyo te kuti tushipikishe inshita ikalamba na kabili. Apantu umubili wesu uwa lubembu walinaka, kuti pambi wafuluka ukupususha kwa mu kwangufyanya. (Marko 14:38) E co pambi kuti twapaapaata ukuti: “Mwe Yehova, mwishimba.” Ukucilisha nga ca kuti tuli abayangwako pa lwa musalula pe shina lya kwa Lesa, kuti pambi twaseshiwa ku kupepa nge fyacitile kasesema Daniele ukuti: ‘Mwe Yehova, umfweni; mwe Yehova, beleleni uluse; mwe Yehova, peepekeni kabili citeni, mwishimba, pa mulandu wa mwe bene, mwe Lesa wandi, pantu ishina lyenu lyapeelwa ku . . . bantu benu.’ (Daniele 9:19) Kuti twakwata icitetekelo ukuti Shifwe wa mu mulu takashimbe, pantu umutumwa Paulo apeele uku kwebekesha: “Tupalamine no kupama ku cipuna ca bufumu ica kusenamina, ukuti tumone uluse no kusango kusenamina ku kutwafwa pa nshita ya kukabila kwesu.”—AbaHebere 4:16.

Twibala ukulaba ukuti Yehova aba uwa kupokolola. Pamo nga ababomfi bakwe, cikatuwamina ukwibukisha ici no kuyumfwa kwabamo ipepo ukwa Ilumbo 70. Pa nshita shimo pambi kuti twakabila ukupepa mu kubwekeshabwekeshapo pa lwa mulandu wa kwangwako kwashika. (1 Abena Tesalonika 5:17) Kuti pambi kwamoneka ukukanabako ukupikulula ku mpika imo, ukwabula inshila ya kufuminamo mu bwafya bwesu. Lelo Shifwe wa mu mulu uwakwata ukutemwa akatukosha kabili takatusuminishe ukweshiwa ukucila pali ico twingashipikishako. E ico, mwitompoka ukuya pa ntanshi ya cipuna ca Mfumu ya Ciyayaya mwi pepo lya kuyumfwa kwa ku mutima. (1 Abena Korinti 10:13; Abena Filipi 4:6, 7, 13; Ukusokolola 15:3) Pepeni mu citetekelo, kabili mucetekeleni ukwabula ukutwishika, pa kuti Yehova alomfwa ukukuuta kwesu ukwe pamfya ku kwaafwa.